Unestamiente

Inadayao gobietnu biyon pot biyon pesus na fiñkas para adelantun tano`ta. Ha gu`ot attension-ta kondontodu esperansa-ta un` ratu.

Dispues de ta analisa i man-sañgan parehu yan ruplanu gi aire sige lumiliku` ha espipiha i plasa. Ti siña tumunog sa` mampos potput yan atiluñg na trosun mapagahes kumukubre enteru i tanu`. Debi u hanau guatu gi otru lugat.

Gi hilu` este mampos taduñg tipu` dibin iya Marianas. Dispues, atan sa` menos ke $140 miyon pesus humahalom gi kaha gi sakan. `An unna` fan daña obligasion kobransa para i Settlement Fund ti u menos ke $12 biyon pesus para i sigiente dies años na tiempu. Makat na obligasion.

Ti humahalom trabiha obligasion $27 miyon na dibin CUC, $27 miyon para apas man-ritirau pa`gu na sakan, $38 miyon pesus para i hospitat CHC, $30 miyon para i PSS, yan $779 miyon pesus na dibi para i Settlement Fund. Kontodu guahu esta hu guiguife na maliñgu mohon este siha na dibi pot para tafan lalibianu kinalamten-ta. Lau obligasion na u fan ma-apase este siha na dibi.

I biyon pesus ni gumugupu gi aire tai plaset. Estague` chathinassoghu. Para ñgai`an `nai siña ta konduse halom pot para ta adelanta kinalamten-ta.

Rason? Mofona inapprueban casino ke umasuda`e tanu` yan uma-asegura na kabales fasilidat hanom, kandet, chalan yan paip aplacha` (sewer) maseha manu na lugat `nai para umahatsa. Iya Magpi taya` nu este siha na fasilidat ni tampoku iya Obyan. Yangin para Garapan pues debi ensegidas uma`atan sa` inestotba dañkulu usun hanom yan kandet.

Yangin u fatsu este siha na planu, pues isau-ta sa` mampos hit man-hasupak sin propiu na finotman planu taimanu `nai siña libre humalom felis este siha na biyon.

Kau siña ta sustene casino?

Siakassu na guaha probleman metkau gi mas man-mikepble na tautague ginen nasion siha gi oriya, kau guaha yan nahoñg miyinariu gi entalu` natibu para u katsu kinalamten casino?

Estague` na patte i mampos paska gi tablon `sino pisun este na industria. Debu u lamegai man-riku para u sinestene kinalamteña. Lau hu huñgog na guaha 15 mit na tautau-ta rumesisibe food stamps. Makat tana` fañaunau i los probes guine na huegu.

I tetehnan gi tautau-ta tat ti hinehegse dibin guma, kareta, insurance hinemlu` yan otru siha obligasion familia. Nasuha lokue` este na tropa. Haye sosopbla? Estague` na kuentas ti mali`e ni man-sabiun hegsu` I Deni`.

Taimanu lokue` mali`e na duru dibatde na karera para Hong Kong, Macau yan Manila. Dios mihu tihu tuñgu` na siña mabenden ñaihon i natibu pot lasan biradan salon. Taiguenau baratuña dignun natibu?

Man-ñahlalañg

Man-masoda` tres membron sanpapa` na guma` man-a`afulu` gi halom komun haye otru biahe para speaker. Dispues ma-ippe` dos kulan lañayon na mañga. Ti mapot i asuntu: Na`eyu` ya bai` fanu`e hamyu taimanu mamatinas satton na disision para benefisiun i linahyan.

***

Sige diniskuten problema siha giya Luta. Hu komprende i chinatsagan taya` setbisiun ruplanu yan batku pot materiat mantension familia.

Debi in` demanda ginen man-ma`gas miyu haf` planun niha diberas fuera de gueku na biba ni ti siña in` chile` para i bañku `sino tenda.

Cho` chu` i sumen appenas pa`gu. Estague` `nai gaige primera sensuran kau kapas i in` elihe na tropa pat parehu yan hagas pañgpañg napu gi kanton tasi. Direchun miyu dumimanda kabales na ineppe ginen siha.

***

Siempre Marianas mana` fan asufa` tres na bisnis casino: Dos Tinian yan unu Saipan. Haye lagse` siempre u fan rikohe dididi` sinsiyu para apas gaston operasion bisnis. Pa`gu `an parehu man-mañufa` hit mattiñgan pues na atog patman kanaimu mientras un` kakasas tatten ilun miyu. Hu nanañgga iya Luta para ngai`an `nai u tutuhon bisnesña casino pot hu huñgog na paire na industria sa` “globus”. Globus pat gurupus? Manu gi dos lai?

***

I linala`ta gaige na kada ratu matumbulu mona yan tatte. `An poduñg `sino kahulu` presiun laña, un` ratutu ha` sulun pat matmos i apas kandet. Taya` asegurau na pisu. Fitmeña ti asegurau ke asegurau. Tiempun tai finagpu` na chukan mona yan tatte. Dios mihu!

***

I fotte yan maneñgheñg na guinaifen mañglu` gai tinatte na esta hana` deskalentau hinasoghu. I eku kulan hanana`e hit notisia pot preparasion hinalom un` dañkulu na napu ni para u prensa todu ha soda` gi kareraña halom and huyuñg. Ke pula` hafa este na mensahe sa` na`mañau i mamamaila`.

***

Yangin un` gugu`ot pa`gu pisun disposision asuntun linahyan, siempre un` fanna`e kuenta gi uttimu besis. Ti magpu` i huegu gi huramentu. Bai` gaige gi puntan fila numañgga haf` para un` esplikaye i linahyan. Taya` pinasensiaghu diskuidon man-sabiu.

***

I tunas na tautau disposisioña mas oppan gi halom silensiu ke unu ni a`gañg ha faman maisague` gi halom sisonyan linache.