Tradision: Satbasion Natibu

Sessu umadiñgan ham yan un’ biha teñga dispues de finagpu’ misa. Umasoda’ ham un’ biahe gi fina’ fiesta. Sige i amku’ ha na’ye platuña agu’on haya, tinala’ katne yan inaflitun guihan. Ha tanchu’ i agu’on haya, golai yan fresku na katne yan guihan dispues ilegña: “Mafattu ginen tradision natibu, fangualu’an yan tasi. Estague’ ’nai gaige esperansa yan satbasion natibu.”

Pagu na tiempu ’nai ta-fagchae’ didog na chinatsaga ’nai kulan hoñgga ekun hafa fino’ña i amku’ giya guaha mas ke trenta años antes. Lau kumonbetsasion ham dispues para bai’ ke taka’ sustansian fino’ña sa’ taduñg yan sustansiau mampos ’an un’ repara.

“Deste antes, i gualu yan tasi ’nai man-malulog i famaguon natibu. Chechu’ gualu yan peska ’nai man-mafana’gue pisun lina’la’,” ha esplika giya guahu.

“I gualu ’nai gaige i pisun tradision natibu ni hana’ inayuyuda ginen hafa’ kinine’ña gi sanhalom ’sino chagu’ na tasi”, ha esplika mas. “Mananom agu’on, golai, gulusina yan mamamogsai ga’ga’ para uson familia; estague’ likidu modun lina’la’ natibu antes.”

“Ti komprendiyon i mampos chadeg yan metgut na tinilaika ginen hafa hagas kumatsu lina’la’ natibu deste antigu na tiempu”, ha apunta huyoñg. “Todu matulaika modun linala’ña, kontodu i taimanu ’nai ha krea’ansa famaguon niha.”

Ha apunta i amku’ na antes i famaguon man-malag i gualu ya marempesa entalu tinanom yan manafañochu i ga’ga. Pagu sali ke television, video yan todu klasen huegu, rap yan reggae na klasen dandan. “Magtos i hagas fitme na pogse’ ni gumu’ot yan umesgaihon mona kinahulu’ famaguon natibu.”

Ilegña i amku’, “I che’chu gualu sumen dañkulu benefisioña gi maseha haye na patgon. Fuera de nina’ humidde, umeyag uson trastes gualu, mananom, mañgusecha, mamogsai yan man-ayuda gi mañainaña che’chu familia.” Dispues ha apunta sin ditensiion, “Ennau na patgon malulog mauleg gi che’chu’ tinituhon modun lina’la’, sustansian finana’guen mañainaña, linala’ espirituat, ya mas fitme mañaña achog ha’ hu diñgu i pettan sanmena.”

Sige dispues hu atetuye manu chiña ayu na finu’ amku’. Dispues giya guahu ha’, konfotmeyu ni sustansian konsehuña sa’ dididi’ ha’ mohon ya gai pinasensia i natibu, tat gi che’chu pisun tradision ti uma-adelanta deste ayu siha na tiempu. Tat ti matanom ti umakusecha’ sa’ mas siempre atbansau modun sisteman fangualu’an gi halom manlancheru. Dididi’ kulan hana’ fan hassuyu’ ni dañkulon maliñgun tradision na pisun natibu deste antes esta kase ennau in 1960 siha na sakan.

Sinahguan pottanmoneda 

’Nai machuchuda’ pottanmonedamu, kada pueñge i tininun katne, kelaguen guihan yan maneskada gi hilu’ minagof suetten familia. Lamegai man-gai suette mabende ’sino ma-atkilan tanu’ familia. De dios na kantida machuda’ guihe na tiempu. Man-mafahan deste kareta, boti yan trela (trailor), alahas, bakasion para sanlagu, yan man-guaguan trastes dandan yan video.

Guaha tomtum disposisioña ya ha inbesta lamayot patte gi ayu na suette ’sino ha pega gi bañku para u fan gagana interes. Gi uttimon i sakan, marikonose kuantu guaha na ganansia ya man-apatte i familia. Tatnai ma-estotba i prinsipat pot para umana’ fan gana interes. Siña lokue’ membron familia man-ayau kontra ayu na pine’lu. Libianu finapos este na familia.

I dumiskuida siha gi hilu’ che’chu’ dispetdisiu, gaige na mana’lu tatte gi hagas hayun niha. Sessu makasas ilun niha sa’ taya’ mana’ sahñge para usun familia dispues ’sino ’nai guaha gotpe pat chinatsaga. Maseha tatatte i siñetsut dididi’ atrasau. Magahet na lamegai na kes kustiyas babue, manog, kachu’ yan sitbesa magulusune guihe na tiempu. Kontodu guahu man-ayuda gi oriyan guafe man-bira tininu.

Pagu na tiempu ’nai ta nesessita ayu na suette. Lau kulan minachom atdau gi sanlagu, maliñgu gi finatton pueñge ha homhum i mapagahes. U guaha mohon agupa’ otru suette ’an manana si Yuus agupa’?

****

Yangin para u birague’ tatte i natibu gumualu’, magpu’ ensegidas i nobena sa’ fuera de buente memegaiña esta hagas man-ma-atkila tanu’ niha ya taya’ plaset para hatdin familia.

Huñgan, guaha ayudon food stamps lau siempre mas menos ennau na ayudu para mona. Listu i republican gi kongresson Amerika umutot este na ayudu pot para u asegura na ti mapua i batkon gobietnon federat gi halom napun biyon pot biyon pesus na dibi.

****

Yangin ma’tut un dia pagamientun man-ritirau, hafa mohon para umasusede ’nai mas ke dos mit na familia ensegidas man-pinalo’pu’ lina’la’ miserable? U guaha mohon satbasion ginen i man-sabiun i Hegsu’ I Deni? Adahe na siha finenina fumalague fina’ halom tanu’ pot no u fana’ publiku dibuenamente ya uma-oppe i estau ni siha kumonduse halom pot che’chu’ diskuidu.

Diberas, este na programa siña ha’ tumachu ta’lu dos, tres anos lau ti u mas ke ennau na tiempu. Siempre u dimu sa’ pot 32 dos años maletke fondu ni man-sabiun i Deni’. Siña ha’ ilelegña i gobietnu na guaha sinida’ña satbasion, lau kau petmanente ennau na asuntu pat para un’ ratu ha’? Guseña gi segundu patte sa’ ni guiya i gobietnu ti ha tuñgu’ hafa sessu taimanu ’nai siña i programa tumachu gi dos adeñgña.

Mauleg ebalua kabales hafa para u fan mapropone antes de ta hala ta’lu talañgata’ sa’ man-hasupag hit gi un’ asuntu ni debi u mana’ guaha kabales na inestudia.