Tinilaikan Linala`ta

Dos modetnu na kosas siempre u tulaika dañkulu kinalamten familia siha: ipad yan iphone. Mangaige todu gi dos makina deste dos saina yan famaguon niha. Mientras duru gi makina todu man-udu `nai ma`tut konbetsasion saina yan patgon.

Todu ha hatme katkuet eskaleran linala`ta. `An makombida hau para fina` gupot kada ratu un` rikonose iyomu iphone. Gi gima` todu biradamu gaige matamu gi ipad. I famaguon lokue` sige manhugandu huegu gi dos makina.

Este na makina siña un` taitai gaseta, email yan otru siha materiat mientras tantos. Lau ti siña ha analisa haf` na klasen tautau gaige gi me`namu. Kumeke ileghu, makina ayu mina` ti siña man-hassu. Gaige manhassu giya hagu. Mauleg na makinan modetnu piot gi estudiun famaguon. Lau hagu ni saina debi un` manda usuña diariamente.

Gi maseha haf` taimanu, debi tana` guaha inatuñgu` halom familia haf` propiu eksision kinalamten familia. Deste adelantun espirituat, leksion dos saina, areglon halom guma`, yan otru siha che`chu` familia debi ta impatta fitme gi man-gada` na famaguonta.

Halom sirenu
Gi taftaf `an oga`an sessu teñga mamokatyu` gi oriyan guma pot para bai` nafotgun adeñghu ni chiop sirenu. Fresko na hanom ni malagnos gi finatton sirenu gi chagchag chatagmag. Hu li`e finatoña pot `nos kuantos besis. Tat tiha hatme kontodu halom kusinan sanhiyuñg.

Dispues de lemlem tautau, adumididi` umanog ta`lu. Ha kana` ñaihongue` esta i chatagmag. Finalaguña inakompapaña un` likidu na buruka kulan mohon machalapon napun dikiki` gi chepchop tasi gi halom katma.

I chiop maliñgu dispues de muma`lag i atdau. Estaya man-mirese i tinanom kontodu hagun cha`guan. Mauleg na ayudu gi tiempon fañomnagan. Kulan hanom uttimu suspiros ni kumatga nesessidat man-kimasson siha na tinanom hatdin gima`ta yan fangualu`an.

Katman laguna
`Nai un` tiempu sessuyu` tumekin, guaha `nai man-deskansa ham yan i tropa gi kanton tasi. Gi hinanau uttimu ininan kalulot atdau kulan laña i tasi.

`In lili`e ha` ginen i inai kinalamten guihan siha. Sessu i tarakitu `sino taraketiyun umesuette guihan man-dikiki`. I talayeru sige kumahat umesuette ginen sagun tiau `sino mañahag.

Magahet na taya` parehuña fresko na kineni` guihan deste dikiki` esta medianu. Gi katkuet preparasion paire na plantada. Pa`gu `an ginacha hau suette hañgun yan tataga` ni kineni` pueñge pues kasse sumen lamlam sikosmu dispues de un` kalamot pattemu.

Guaha lokue` man-amku` isla `nai mapega gi fina` batde i guihan tulanoche. Gigon gumai pau ensegidas makaddun niyog. Diberas ya un` litiye finadeni` dinanche ya un` tetti hinegsa` ni kaddu esta pagpagpag sekosmu umusune pot no un` madiñgu. Lau sumen nama`aggem i katman tasi gi laguna piot `an un` bisita pot para un` disimula hinassomu.

Che`chu` gualu
Deste finatton mame halom gi gualu`, in` tutuhon umutot, dumesmonta yan humale` man-lodu` tañgantañgan. Todo dia este na cho`chu` esta i lemlem tautau.

I sigiente uttimon semana, in` tutuhon kumuha iñgleran kamute. I oriya inna` mañaña para sune, mendioka yan otru siha agu`on tat kumu nika yan dagu. Mientras tantos, in` apprubecha sinetnen hagas choda ni in` traidute ni latan satdinas tumates yan tininon sumen mantika na abunenman-bakalu na umañg.

Mattu gi makat na tiru lau ni unu sumeha muna` gasgas. Tres mesis dispues in` li`e mañechefla tinanom mame. In` tife` hagas tinanom kafe ya in` tala`. In` testa yan gileg para gimen amotsan oga`an yan mirienda. Magahet na fotte na kafe na esta hana` pisadidiya-yu` `an pueñge.

Dispues man-ñgayu ham para i feggun i gima`. Inna` fañochu i pinegsai antes de in` tilus ham para Chalan Kanoa. Ai na mañge` yayas sa` gigon chetton tatalo`mu gi katre, losus hau sin ditension. Hana` fan figu` ham i che`chu` gualu. Basta ke puru lalahe i man-amku` giya hame tat che`chu` palao`an ti in` tiñgu solu mandiskatga neni. Lau mauleg na kreansa para hame deste muna`lagu, mamagase magagu, man-inkola, atbidon, yan prensa.

—

Gigon man-espiga i mai`es gupot sa` kada unu yan tininuña. Tinatiye este na mañufan, tala` yan eskome. Dispues, saunau manguleg yan mamada` titiyas. Tat cho`chu` ti hafanue` ham si nanan mame. Ti in` tiñgu` che`lun palao`an sa` puru ham ha` toru.

—

Hu gef agradese finapos tinanom siha gi gualu` deste inasahan choda, sakan sune, kamute, dagu, nika, mai`es, golai, yan kalamasa. Paire magahet atmayas yan atulin kalamasa. I sinen agaga` tiha nesessita totche sa` nahoñg ha` ni guiya namaisa.

`An tiempon lemai, tat bisinu ti inatileg fasuña piot ya finagcha`e matife` esta amaririyu na lemai ni dañkulu. Dios mihu ya matunu dispues malomug ya malechen niyog. Para hafa totche! Magpu i nobena! Paire sentadan antes.

—

Megai gi hagas tradision tanu` tat kumu gumualu` appenas na tiempu. Mas dañkulu hatdin todu modun tinilaika ni mauleg ta gef atan kau benefisiosu para i tradision tanu` yan familia. Gaige este na asuntu gi patman kanai miyu.