Tinilaikan Kabayero

Gi talulu` `nai sumen chafleg i ekonomia, man-ma-apprueba lai pot gayera yan kinentran matala` saramata’ famalao`an giya Garapan. Lau na ti oppan na i ekonomia i dichu problema-ta? Pues haf` taimanu na taiguine na nina`tatah na modun lehislasion ni mofo`na ke linala` i tautau?

Machoneg casino dispues mañeha ya man-esalau na debi u guaha inadahe sa` dañkulu na aminasu i maguiguige na fasilidat kontra usun hanom gi mas man-hihot siha na soñgsoñg. Na ti mayot patte este na konsiderasion antes mohon de in` apprueba casino?

Mampos inipos appenas sensian menhalom. Ya para este ta`lu na tropa para ta entrega ni linala`ta? Gi uttimu besis siempre i casino na industria u enemigon i tautau gigon hasan hanom gi señgsoñg siha gi latkatan.

Lastima sa` ha pega i Saina ilu-ta gi hilu` apaga`ta ya hana` talag me`na. Dispues ha na`ye kabesa para usun man-hassu. Hana ginachuñge atadog, talañga yan pachot para usun antau na kabayero. Lau ni unu gumai setbi gi `nai ma-apprueba lehislasion casino. Dispues sige man-e`salau “Fana`an hu tatke`yu`!” A`Saina!

Silensiu na milag sadog
Sige umafulu`yu` yan inkabukau na hinasoghu estake mattuyu` guatu gi fina` sadog ni mimilalag silensiu gi hilu` kulot apu na achu. Gaige gi halom lehñgun na tinatampe man-dañkulon troñku gi santatte. Sumen nama`aggem i pañgpañg hanom ni sinigunduduye ni suaben mañglu.

I milag sadog gai leksion ni didog: Ayu na hinanauña ti u na`lu tatte sa` siempre u soda` lugatña gi fondun tasi. Parehu yan hita mismu `nai tita chule` pronto i appottunidat para ta adelanta hit. Maliñgu!

I katen pajaru kulan bos gi chagu` ni numana`e hit abisu para ta adahe pinekatta gi oriyan milag. Gaige i cha`guan kulan guafag para fan deskansota. I fina` lehñgun hana` fresko oriya-ta mientras tantos. Man-gaige hit gi tanu` nana-ta naturat `nai libianu ta petsige haf` otru planu-ta.

Bonitu i oriyan este na lugat ni numana`e-yu` sentimentun katma yan pas. Yangin estague` i kanton lañget, pues yahu ha` lumasaga pot manñge yan felis siñienteghu. Lau gaige obligasion-hu gi un` banda na ume`esalau. Dios tiampare!

Bisnis iya Marianas
Deste ke echu-yu` tautau, hu hassu matratan komunidat bisnis kulan mohon tailaye yan saki na patgon bastatdu. Mas tana` tatkilu` offisiun gobietnu `nai ta umpañg otru lache na hinassu: gaston operasion gobietnu mafattu gi hechuran poduñg fondu ginen i lañget. Esta pa`gu ti hu sosoda` mañgge ennau na lañget.

Man-malefa hit na ginen kalaguag-ta muna` kalalamten operasion gobietnu layeye ginen i kontribusion tax siha ginen bandan bisnis. Sin este na pisu, ni unu na empleau umasueddu `nai taya` moneda gi kaha. Poresu na sumen impottante na ta komprende i sustansian kontribusion bisnis gi kinalamte-ta gi operasion gobietnu.

Dispues, atan sa` ti offisiun gobietnu mama` ganansia soluke para man-gasta. Ya todu ha` tumuñgu` na guaha gi gaston kontribusionta man-lache na disposision. Sumen presisu lokue` na gi todu ta petsige ta impeña gi man-ma`gasta kabales na esplikasion gi todu gastun fondun publiku ni mafattu ginen kalaguag-ta.

Edukau na tropa
I kualidat linala`ta mau`udai gi kualidat areglo-ta. I tatatte mau`udai gi kualidat representante-ta ni ta bobota kada dos años. Este na sistema sumede i publiku mamatinas tinilaika gi man-fatsu siha na representante.

I rason na hu fafama edukasion kolehu para mona sa` i ma-eduka kolehu ya ha gana eskuelaña un` dañkulu na indikasion na antau gi estudiuña ya libianu mañgomprende gi man-sustansiau siha na asuntun publiku. Estague` `nai gaige i difirensia kontra ti sen añgoghuyon na edukasion high school piot ya ni manaitai sumen fatsu.

Ahe` ti guahu in` didibi nu este na asuntu soluke hamyu mismu. Malago hau antau na kinalamten para mona, pues fan ayeg man-edukau na tropa ni gumana eskuelan niha kolehu. Estague` na pisu `nai siña adumididi` ta aregla ha`anen famaguon-ta ginen man-sustansiau yan maplanuye na areglu siha. Pot siha na sumen presisu dinanche na disision ginen hita ni mañaina.

Amigu Magoo
Ha kachetgue` amiguhu bihun hanyiboñg, franela yan tihuñg peskadot. Sige hana` kilulog i talayan tiau kulan mohon hagas lagse na fafayiña. Lau tapbla ham na dos sa` ni unu tumuñgu gugo`teña i talaya antes de un` dagau halom gi tasi. Sige ha banidosuye-yu` taimanu para dagauña.

Hu faisen kau mañule`gue` esta lisensian talaya. `Nai ilegña “ahe’, ileghu magpu` i nobena sa` siempre in`fa` tasi i fina plaset gi oriyan lanchoña.

Hu soñge chipahu sa` esta o`sun titanoshu madage. Guiya lokue` dumeskansa sa` yayas mandage. `Nai hu kaikaiyu` para bai` hanau huna`e agradesimientu ni patteghu tiau. Era, ha repara na in` keni` pachot i tiau ni gaige numanañgu gi halom tasi. Dios mihu na che`chu` muron!

***

Humanau ham dispues para Laulau pot para bai`n atan kau haf` mohon i chansa manampe tiau `sino faya. Ti mauleg sineda` mame kulan mohon antigosu tiniñgu` mame pot klima yan kinalamten guiha. Sumugu` ham gi metkau guihan. Mamahan ham kelaguen mame laggua. Ileghu, “Estegue` seguru sa` esta gaige gi halom karetahu”. Sige chumaleg ni manadan espantu deste oga`an ya ni unu gi entre hame peskadot! Dios mihu!