Tinilaika gi ‘Digital Age’

I hinalom mafanana`an “digital age”, usun modetnu siha na attikulun komunikasion deste computer, iphone, laptop, ipad yan otru siha kosas dañkulu na tinilaika para u afuetsas gi kinalhulu man-hoben siha para mona.

Solu ma-esgaihon satton usun este na kosas siha finenina siempre u faliñgu i usun liñguahen tanu`. Kontodu konbetsasion familia pininu` adumididi`. Mauleg ta hasuye haf` taimanu `nai usun este siha na modun komunikasion modetnu u bintaha para i natibu.

•••

Gi hilu` este na pagyu sige famaguon-ta man-eyag finu` English kumu liñguahen satbasion futtunan niha. Taya` linachiña este. Kontodu i Chinu ha embrasa kabales na una` fan-eyag famaguon niha English kumu liñguahen enteru elmundu.

Puede ti ma-enturompe liñguahen natibu gi karera mona, uttimu sahyan kuttura yan tradision. Lamegai asunto-ta ni debi fotmat ta diskute gi halom hita mismu.

•••

Mauleg i ma-abiban kutturan Chamorro giya Guam (Mes Chamoru). Lamegai sumañgan (gi television) na para u fan finu` Chamorro mientras malalapbla gi finu` Eñglis. Taya` binabaña. Lau para unna` seguru usun liñguahimu, tutuhon umusa antes de u tinake`. Muñga mapusturaye sa` taya` kampu! Yangin ti un` usa, pues siempre naufragu hau gi mismu liñguahimu.

Lokue`, debi u machule` asuntun liñguahe deste konbetsasion hulu` esta i finana`guen matuge` mismu liñguahe. Dañkulu na difirensia i dos attikulu. Mas fotmat i matuge` na finu` Chamorro ke otdinariu na konbetsasion. Chage mañgge` gi finu` Chamorro. Mas dispues lagse hau achog u fattu gi fotmat na inadiñgan siha gi fina` hunta.

•••

I natibu antes man-fafacho`chu` layeye ginen gualu` familia. Megai antes man-hahanau para u gualu` dispues de eskuela yan finagpu` cho`chu`. Man-na`gasgas gi oriyan tinanom siha ya ma-assiste pinegsai antes de u bira siha para i gima` dispues de lemlem tautau.

Na`magof i manadan pinegsai mame manog, babue, yan `nos kuantos chiba. `An Sabalu kanaha` seguru na in` abahu nuebu na lugat para bai`n adelanta i hatdin familia. Deste sune, kamute, mendioka, dagu, diffirientes klasen choda yan nika, tat ti in` tanom.

Ginen kusechan gualu` `nai in` kukubre i sumen dididi` na sueddon i amku`. Lau ayu solu remedio i para inna`e` animu gi gualu`. Dispues, guaha `nai in` dalalag peskadot siha man-chenchulu `sino panag. I dos lugat plaset man-hoben antes.

•••

Sessu si biahu ha sahañg pinendan guihan pat katne gi hilu` foggun guafe gi kusina. Un` modun manala` piot gi tiempon uchan. Diberas ti man`li`e`yu` manñge` totche hina`men guihan yan katne. Entre matunu `sino ma-aflitu. Un` fadeni`i` dispues saulag yan maipen hinegsa. Dios mihu! Magpu` i nobena!

•••

Gi pininu` ga`ga` tat kumu guaka, chiba yan babue, umeyag-yu` muna`gasgas munudensia, patas, ulu yan dadalag. Magahet na mi atburotu i man-ñge` na bokan natibu gi bandan preparasion.

Trabiha makat ma-upos i sabot tradisionat na preparasion motsiyas manog. Kaiha parehu yan ayu i mabalutan tin foil. Guaha `nai in` chage kumadon niyog i sisiug? Esta na`magodai agaga` kadoña. Dios tiampare na pairen boka!

Lau gi uttimu biahe `nai hu soda` este na guihan (medianu na sisiug) sumen guaguan. Dimas de bai` fahan hu birayu` para i gima` yah u chopchup kalulothu.

•••

I man-amku` ginen isla dumimimoria makatdon guihan ni mapega tulanoche gi halom satten. Gi sigiente dia `nai pa`gu para u mutuñg makatdon niyog. Dios mihu na manñge` katdu. Magahet na gai pau pachotmu yan kanaimu dispues de un` gulusune. Cha`mu umatototga mañiku. Chagua hau ginen i tropa.

•••

Sige ma-umenta i numeron man-daibites (type two) yan probleman kanset yan korason gi halom tautau-ta. Este na chinatsaga makat parehu ha` para i familia yan hospitat-ta piot gi bandan gastu. Mauleg umana` guaha estudiu haf` pisun daibites, matai reñihion, yan amanu sessu `nai gaige i dichu problema.

Ma-umenta lokue` kanset pachot, guetgueru, yan estomagu ni finañagu ni usun pugua`, afog, pupulu, amaska yan chupa. Lamegai na famaguonta fuma` usu mafuyut chupa gi pigua` mañaña`. Konsidera probleman kanset antes de u fan echu tautau este siha na famaguon. Mauleg i mañaina uma-ataha este na bisiu antes de u problema i patgon.

Huli`e` mana` suhan kihadas un` prohimu pot kanset pachot. Dispues, mafatinase fustisu na kihadas ginen plastek pot para u disiente ma-ataña i prohimu.

Este i matai reñihion ni fuetsau siempre un` mapega gi makinan daialasisu parehu yan mana`e` hau settifikun finatai. Mauleg `in konbetasione medikun miyu haf` man-homlu` siha na eksisiun hinemlu` pot no u matai reñihion-mu. Makat na finapos gi katkuet manera parehu ha` para i malañgu yan familia.