Sustansian Ma-pa’ug

By JOHN S. DELROSARIO JR.
Special to the Saipan Tribune

Sige hu akanteha haf’ sustansiaña i kustumbren “ma-pa’ug” (pa’ug i orihinat na palabra) gi kutturan Chamorro. Ayu kinemprendeghu i esplikasion Señor Guelon Fadañg ’sino i amiguhu as Tom Mendiola. Guiya este i matatpañgen natibu gi inayegña na na’an Chamorro.

I machocho’gue i antigosu na patte gi kuttura. Hagas otru na’aña i Chamorro esta’i finatton Españot. Dididi’ uma’achule’ yan dobladan kutturan Indian giya America.

I pattisipasion tautau-ta sige ma-umenta. Ginen este na pisu siempre i natibu pinañgon ya ha tutuhon pinetsigen mana’ fitme direchon tautau tanu’ gi todu sustansiau na kinalamten. Estake para u to’a este na kinalamten, taya’ dinidahu na u fañaunau i man-ma-eduka siha na famaguonta. Siha u minantene i timon futturon natibu guine gi O’Perlas Iya Pasifiku kumu sinsiyu na famaguon tanu.

Estague’ sustansian ma-pa’ug ya u saga kumu fitme na pisun satton na dinaña natibu gi enteru atkipelagon iya Marianas. Estague’ fumañagu un’ silensiu na sentimentu pot dignun yan onrun natibu. Estague’ ’nai u saga i sinsiyu na dinisehan tautau-ta.

****

Kulan mau’udai este na sentimentu gi hinasson mafanana’an nasionalista. Este na sentimentu ha choneg satton na pinetsigen u tachu i natibu gi mas unrau na modun gobietnamentu ke haf’ gaige pagu. Gi otru banda, guaha ha’ lokue’ u fanachu gi hafa guaha pagu gi papa’ i kontratan i Covenant. I relasion Marianas yan Estados Unidos De America petmanente segun i ma-apprueba na kontrata. Lau ’nai listu pot adelantoña sa’ hafa na para umachanda i minalago’ña. Naturat este na pasu ’sino eskalera.

Hu diside dumiskute este na asuntu sa’ para mona siempre u kahulu man-loka’ na chubasku na dibate pot onrun yan dignun natibu. Siña ha’ bastus yan metgot na lañgat gi tutuhon lau u katma tatte i tasin iya Pasifiku ya u sedi hit kumayon sinsiyu na dinisehan lina’la’ satton na onru yan dignu. Para i chumahlau este na katgu, hu diseseha bien felis. Fan asustene fitme gi hilu inafamauleg sa’ makat fotmasion nasion un’ grupon isla.

Dispasiu na tinituhon lau fitme na pisu ni para u finañagu ginen ma-pa’ug natibu. Ni unu u seha sa’ taya ta aliligau i fitme na inestablesen onrun yan dignun natibu.

*****

Ma-utut fondun medical referral

Tat nasion tinina’ dimu ’nai mattu gi gastun fondun ritirau yan hinemlu’. I mefe’na makat sa’ megaiña gastu ke humahalom na salape’. Parehu tiru gi segundu na asuntu. Estague’ mina’ dañkulu yan esta rinimulinu gi halom chubasku este na asuntu.

Dimas de tafan sige man-dibaten kulan sabiun i hegsu’ i Deni, hita mismu ta atan haf’ homlu’ na pinetsige pot para tana’ homlu’ kinalamten petsonat yan familia. Taimanu hagas hu repite: este na asuntu gaige giya hagu mismu. Hagu ha’ solu timuneru ya hagu ha’ solu rumesponsasable para unna’ safu biahen batkomu.

****

Magahet na lamegai finaposhu pot asuntun hinemlu’ deste CHC esta UCLA Medical Center giya Los Angeles gi ochenta yan nobenta siha na sakan. Ayu ’nai hu lie’ haf’ sustansiaña hinemlu’. Ayu lokue’ na hospitat ’nai hu lie’ na sin insurance ti un ma-attende. Ayu lokue’ na hospitat ’nai hu lie’ haye para uma-attende emerensiha. Yangin gaige hau gi halom trenta ni finalaguen ambulance ya tai chansa hau la’la’, pues machoneg hau gi un’ banda ya ma-attende otru. Estague tirun man-dañkulu siha na hospitat halom siuda.

Man-suette hit sa’ ni unu mañega setbisiun hinemlu’. Maseha guaha ’nai atrasau ñaihon lau ma-attende hau dispues. I mas puti gi malañgu yan familiaña (ya hu lie’ este masusede giya Honolulu) i uttimu na finu’ i mediku na taya’ esta remediu para umana’ homlu’ i prohimu.

Tumekun i patgon (sutteritu) iluña gi un’ banda mientras sige si nanaña tumañges. Esta hu a’aka’ amañghu para bai’ batbaruye i momentu. Lau kada ratu ha agañgyu’ i patgon para bai’n konbetsasion. Ha tuñgu’ na gi finatoña mage ti apmam siempre u hanau.

Todu malahyu ha’anihu ’nai hu konsidedera i magof mataña guihe na pupueñge. Mañge’ chaka chalelegña ’an sige kumonbetsasion yan nanaña. Magahet na ti apmam deste ke mattu tatte ma-agañg para i tai hinekog na deskansoña. Lau chetton magof mataña gi hinasoghu. Makat na tiru i hinanau dimalas gi bandan hinemlu’.

***

Guaha gi chetnot natibu ginen bisiun linala’ta. Guaha ha’ lokue’ gaige gi haga’ ni ginen as guelu yan guela. I primet libianu ta tulaika. I segundu kanaha’ makat soluke deste tutuhon ta adahe todus kinalamtenta para u menus i chetnot ’an mattu giya hita. Atetuye satton i hinemlu’ miyu.

****

Fitme hu disidi na bai’ deskansa petmanente mañge gi finu’ Chamorro gi uttimun este na sakan. Yangin guaha gai interes kumontinua pues natuñgu’yu’ ya bai’ introduse hau halom gi gaseta. Naturat na maseha haf’ na tinituhon, siempre u gai finagpu’ kulan kinahulu’ yan minachum atdau. Este na disisionhu ti umatulaika.

****

John DelRosario Jr. is a former publisher of the Saipan Tribune and a former secretary of the Department of Public Lands.