Sueddun Hutnalerus

I sueddun popble, mafanana`an “poverty income level” ni federat. Gaige este na sueddu gi $24-Mit gi sakan para dos membro gi familia yan $26-Mit para kuattru.

Segun ripot gaseta, guaha 51 pot sientu na empleau mangaige guine na eskalera. Kumeke ilegña na ti magagana mas ke $26-Mit gi sakan. Lamayot gi empleau manmamagñu` gi halum fache` popble na sueddu!

Esta mas ke 20 años parerehu ha` i sueddu. Gi mismu tiempu i familia umespihan mamaisa siha taimanu `nai para umasusteni linala` niha gi halum te`ug na sapet pinepble pot diskuidun manma`gas iya Marianas.

Este i fuetsau na chinatsaga pot diskuidun manma`gas iya Marianas nahuñg para i publiku para u demanda komplidu na tinilaika gi haye pa`gu timuneru gi batkun iya Marianas. Gaige este na fuetsa gi dos patman kanai miyu ni libianu inna` setbi pa`gu na Nobiembre!

Rekueddun Republican

Guaha `nai mafaisenyu` haf` na ti hu sapopotta industrian casino para este siha na perlas. Gi taduñg na patte gi konsensiaghu hu tuñgu` na este na industria siempre ha destrosia tradision natibu, petmanente. Adumididi` kulan kanset. Siempre funas todu tradision tanu`.

Ti u chalapun ha`anita kulan hinalum tasi. Lau i tasi u bula `nai todu ha lumus. Ni unu soplu. Estague` na puntu i ti a`anog gi halum mattirun kasino kontra tradision tanu`.

Ha baba este un` tailaye na chalan `nai i manma`gas bendidu antin niha `nai ni unu u muebague` para u akude chinatsagan natibu. Potput na sueddu. De hemunos ni pinadesin tautau gi señgsoñg siha. Mas popble kinalamten mayotmiente gi familiata. Mayute` interes publiku pot interes betsan niha.

Adahe para umahasñgune mafachalane petmanente na destrosiu gi tautauta siha. Lau kase estague` rekueddun pattidan republican. No siakassu haf` para u padesi i publiku mientras masaguaniniye buchin niha. Tailaye na cho`chu` lau ti magpu` este na malabida guine. Siempre un` fan man-na`e kuenta gi lamasan manhusga guihe hulu`.

Hombre i poka lamegai ha yamag na linala` familia pa`gu piot ya umatotpe yan usun amot binenu. Huli`e klaru este na pinadesi ya lastima appottunidat niha umadelanta ha`anen niha.

Ti listuyu` dumestrosia tradisionta yan futtunan famaguonta!

Manu Hechura…

Guaha finu` man-amku` pot pinayun petsonat: “Manu hechura esta i seputtura!” Yangin un` fa`fafayimu che`chu` achibau, pues entalu` traision yan tinailaye `nai sessu hau matompu` diariu.

Makat un` petsige un` asuntu ni siña bumenefisia mismu prohimumu. Todu i tiemp i para un` laime pot interesmu. Dañosu hau na tautau piot gi che`chu` linahyan.

Siñaha` ma-elihe hau offisiat. Lau i pinayonmu gaige ha` petmanente kulan anineñgmu gi santatte. Estake un` madispone siempre uttimoña un` batañga halum gi naftanmu haf` pinayonmu: Manu hechura esta`i seputtura!

Katma gi halum rimulinu

Teñga hu dandan suabe na pianu pat gitala mientras mananaitai sino mamañgge`yu` gi chagchag og`gan pat lemlem tautau. Katma yan bonitu na dandan i muna` mamansu i mitituka` na asuntun ni hu estudiadiaye.

I dandan inakompapañia manbonitu na litratun lugat siha gi chagu`. Desde kantun tasi, plaset fangualu`n ni dañkulu, ga`ga` siha gi pastahe yan i hegsu`, likidu na hatdin Japones, flores sakura giya Japon pat Washington, D.C, yan otru siha lugat.

Sessu ha kone`yu` dos lugat: dañkulu na fangualuan yan hatdin Japones. I fina` gualu` giya America miyas pot miyas `nai un` li`e fuetsan manguagualu`. Gi un` kinisecha nahuñg ganansia yan materiat para metkau enteru elmundu.

I dikiki` na hatdin gai areglu desde mapegan achu`, tinanum siha, finalagun hanum yan difirientes kulot guihan gi halum sadog dikiki`. I para un` fatachoñg gi un` banda nahuñg para u inakompaña hinsassomu guatu gi katman tasi.

Paguan Malumot

Maseha haf` na asuntu malagnos gi supin tasi publikamente ya gai minagahet siempre i mantineteka maninestotba seriosamente. Era, masiente na guaha dumedeka` i pisun fondun niha ni maresisibe kada mes.

Matuñgu` na malagnos pau malumot gi hiyuñg i kestatña sa` hagas lamas i sinaguaña. Mañgunanaf manadan ulu` ya makat manmatiges sa` inipus minegaiña. Lau hagas makena`na` ya manginacha` induktu. Mampos mi-ilu` ya mattu gi mutuñg i malumot.

Yangin gi uttimu besis hinegsi hau ni konseptun pañglau pues anog na hagu mismu humalan maisa hau papa`. Ti umahñau siempre u fattu este na namamahlau giya hagu. Si Iku!

Presiun Fektus

Mamamaila` mahatsan presiun nesessidat siha gigun ma-apprueba i nuebu na apas kahun katga (containers) ni Port of Guam. Kasi kahulu` kada kahun katga siete pot sientu na biahe.

I tautau siha gi kada isla para u kinatga este na hatsada gi mafafahan na attikulu siha para mantension familia. Mas makat para i mangaige giya Tinian piot Luta.

Lau guaha huhuñgog sabiun karisu man-offresi kumu promesan politika na para u utut presiun fektus siha giya Luta. Un` ratu ha`, kau in`lili`e guennau si Sen. Steve Mesñgon ya u eksplika gi mañeluta giya papa` manu china planuña?

I asuntun gai tine`ug pot maluñu` gi estomagun yan linala` familia. Mauleg señot un` atetutye haf` ineppemu nu este na attikulu. Yangin atrasasau un` petsige, mauleg kasi un` upus bumiahe para Tinian ya un` tunug gi tanu` `nai siña dibuenamente un` chogue che`cho`mu.

Che`chu` Eskrebiente

Guaha bumatbaruye na ayu bisioghu i umemutuñg. Ahe`, hagas mutuñg malumot ni lumulumus i señgsoñg hu fagcha`e halum. Mattuyu` para baina` gasgas i mahasñgune na tinailaye kontra i maninosiente yan tai esperansa.

Soluke i amiguhu payun mampos ni mutoñgña mismu mina` tiha ñgiñgiñge`-gue` namaisa! Tailaye na lamas yan malumot ya debi tana` suha gi ha`anen linahyan. Taimanu umemutuñg-yu` na hagas gaige gi halum i señgsoñg i mituñg?

Rimotke hau amigu yan un` ayuda mismu tautaumu lumi`e manana na kinahulu` atdau, gasgas yan fresku na mañglu`, yan klaru na mapagahe gi enteru señgsoñg iya Luta. Todu mumirese homlu` yan gasgas na hinaguñg!