Suabe na sunidu

`An finagcha`e manadan sustansiau na asuntu man-a`atotpe gi hinasoghu, hu dandan pa`gu suabe na sunidu `nai hohoñgga uchan, milag hanom, katen pajaru, mañglu` yan hulu. Adumididi` hana` pasifiku siñienteghu antes de bai chogue otru `kosa.
Memegaiña besis na i minetgot hinasoghu muna` katmayu` sa libianu hu tobus haf` ti presisu. Lau paire i gaige suabe na dandan piano yan gitala gi santatte mientras sige hu katsayu` para bai` fañgge`.

Kanta yan dandan, dañkulu benefisioña piot gi famaguon. Estudiu siha kumonfitma i adelantu gi patgon ni guimuaiya dandan. Maseha haf` ha dadandan `sino kanta, sotta ya u sige umeyag.

Siña i sotfa kumone` `sino i palabra ni matuge` gumu`ot attensioña. Sige ha kanta katkuet lugat. Dispues repara sa` kontentu ennau na patgon mientras sige ha usune otru siha inayeg. Nae` kampu ya u adelantague`.

***

Kanta yan dandan kulan kuadrun linala`ta ni patte gi ha`anita. Guaha na sunidu ta pega gi lugat, atuñgo`ta, mañainata, cheluta, yan finaposta siha. Estague` na sasyan kumokone hit guatu gi hagas “chalan iya hame”. Motmut memorias kulan mohon nigap ha` `nai man-estabe hit gi hagas guma` familia.

***

Hu huñgog un` palao`an ha kanta, “Maisa Sin Maisa”. Era, sessu guiguiya ha` diariu. Ha tuñgu` na ti amtiyon esta chenotña kanset. Ti nina` chatsaga siñienteña sa` ha pega inañgoghoña entaramiente gi adeñg yan disposision i Saina. Ayu mina` ilelegña “Maisa Sin Maisa”.

Pot man-tautau hit mina sumen nachatsaga `an ta konsidedera haf` mohon gaige gi hinassoña `an ha atan familiaña ni man-patte diariu gi ha`aniña. Buente esta halie` ma`lag haf` mamamaila` ayu na tai tiempu puminite. Magof maseha didog pinadesisiña. Ti komprendiyon. Maisa Sin Maisa. Si Yuus u binendise!

***

I otru sunidu pot un` cowboy ni sessu mañugon tropan guaka gi disettu mas ke sientu miyas diariu. Dispues de bente siñko años, mañgge` kantaña na un` dia u deskansa gi papa` asut na mapagahes disettu ni sessu ha falofangue, diariu.

Bonitu na sunidu hombre esta hana` mesgu lago`hu `nai hu e`ekuñgog pinedoñg sentimentoña. Un` sunidu motmut agradesimientu pot i lugat `nai mafañagu. Magahet, ti tulaikayon i bonito na tanu` `nai mafañagu kada unu.

***

Todu klasen modun ekspressiu ta huñgog gi sunidun natibu siha deste antes. Un` tiuhu sessu hu huñgog kulan ume`e`mahalañg ya ilelegña, “Gi primet agua, bai` birayu` tatte gi lanchun sabana”.

Hagas madispone asaguaña lau tatnai magtos ha kantaye ni intensioña. Sumen bonito lokue` na tunada ha pega gi kanta. Kulan hu dimimoria ya un` dia bai` ke dandan gi gitalahu pot para in` hiñgog. Bonitu na kanta.

***

Hu soda` lokue` un` biha sige kumantan gui`eñg (humming) man-na`mahalañg siha na tunada. Hu atrebiyu` fumaisen haf` tatatmanu-gue`.

Ti matman ha sañganeyu` pot gastun `an umamku` i tautau. “Pa`gu, man-atkililayu` lugathu ni sumasaunau apas kandet. Mauleg na guaha Medicaid ni kumubre apas amot yan setbisiun mediku. Haf no para uttimoghu `an un` diayu` kumama?” Buente ume`emahalañg i amku` pot appenas mabisita ni famaguoña.

***

Antes na tiempu, i lalahe muna` sesetbe kantan natibu para umana` tuñgu` i ma-intendedet na palao`an haf` intension niha. I palao`an pa`gu u hoka i sustansian kanta ya guiya u respuesta. Kulan mohon un` dagau chagu` fino`mu piot ya tataya` kampun konbetsasion. Pues i mensahen i kanta kumilili` intensionmu.

***

Hu huñgog kase mit na membron koru ginen Tonga mañganta gi halom gima` Yuus niha. Diberas, suabe gi kuattru patte kada sunidu. Ayu na biahe `nai masyu hihot gi pettan i lañget. Un` pasu ta`lu ya humalomyu`. Diberas, paire na sunidun kabales na koru.

***

Mina` yahu lokue` kantan Hawaiian pot masen tuñgu` masegunduye todu kantan niha. Bonitu na sunidu gi dos, tres `sino kuattru patte. Yahu lokue` Chamorro mañganta lau man-disintunau. Debi uma-usa mauleg talañgan niha sa` sessu mapega gi betsan santatte. De dios mihu!

***

Guaha gi halom esta man-hanau diberas tai akomparasion boniton bos niha. I mas kumoneyu` si defuntu Juan Teregeyo` (Juan Agida). Suabe na kakanta yan anchu ha taka` hulu` yan papa` i sotfa sin u fontun mientras kumakanta. Taya` trabiha hu lilie` hihot yan si defuntu Iku.

***

Apmam lokue` siha kumondukta korun gima Yuus Chalan Kanoa era i defuntu Señor William S. Reyes yan asaguana, kontodu Tun Josen Fitial yan hagaña Domina. Ta hahassu siha gi tinayuyot-ta pot apmam de man-mañietbe gi gima Yuus.

***

John DelRosario Jr. is a former publisher of Saipan Tribune and a former secretary of Department of Public Lands.