Silensiu, katma i mañglo

Desde ’nos kuantos sakan malofan, hu siente maneñgheñg na sirenu ’nai mata’choñg gi entalo’ta un’ sumen katma na klima. Tat hagun troñku ti bumenditu. I tautau lokue’ mañgetu giya siha. I lañget apenanas pution. I pilan uma’atog gi tatten un’ motmut na mapagahes.

I kabayerus gi Hegsu I Deni man-hohotnu gi maipen taloane sa’ ti matuñgu hafa para umachogue para u esgaihon mona appruebau na kinalamten adelantun linala’ linahyan. Esta na’ tañga i katman mañglo sa’ mampos silensiu. Hu konsidedera kau hagas klima i bumalutan hit ’sino kau señat na guaha ira ni fette mamamaila’?

Hu bira i asuntu guatu gi man-kabeyerus, espesiatment, hafa planon niha ni te’ug’ na estau esklabu ’nai ha pega lamayot patte gi tautau-ta? I to’a yan antau na kabayeru libianu ha taitai hafa gai señat i mampos silensiu i tanu. Yangin enfin satton nu i tautauña, siempre u muebague’ ya u sede adelantu na u falofan mona. Yangin este na asuntu presisu na u suha gi un’ banda, sin ditension siempre sumuha pot para u sede nuebu na mañglo’ umesgaihon halom fresku na kinalamten adelantu. Dispensayu’ un’ ratu sa’ un’ gagacha’ pindehu i damagashu!

***

Gi mapos na semana, hu lie’ mas ke disi-sais na guma’ familia para u fan machule’ tatte ni NMHC, MPLT yan banko. Guiya este siha na guma’ i primet na gima’ familia ’nai ni unu gi dos umasagua machochochu’.

Rason na man-tai che’chu’ sa’ taya chochu’ gi todu atmos banda. Dispues, ti namatman yangin mana’ fan basta gi offisiun niha sa’ mampos kohu i kinalamten i bisnis.

Na ti magahet na tradision natibu i para un’ gai gima’ para i familiamu? Haye gai isau i man-tai chechu’ este siha na patriatkan yan matriatkan familia? Na ti obligasion gobietnu i para u adelanta kinalamten ekonomia guine kosake siña este siha na tautau-ta u fan mañoda’ offisiun niha? Lau gaige na ginen gueku na manehanten i administrasion na taiguine mapadese nu este siha na familia.

Maulegña i hegsu i Deni u mafana’an Hegsu Katbariu! Ginen hilu na diskuidu siha man-machuchuda’ papa’ esta i señgsoñg ni humogse yan tumiges sin presisu i linala’ i tautau siha.

***

Gi otru mes desde 26 de Nobiembre matutuhon selebrasion haanen gupot siha. Estague’ ’nai satton i natibu mannae’ mit grasias gi Saina pot todu bendision niha gi mapos yan piot pagu na sakan ’nai todu man-finalulon sumen didog na chinatsaga.

Lau ni unu u malefa nu i signifikasion este na haane i Thanksgiving. Gi silensiu na tinayuyotta tanae’ i Saina fietmente un’ dañkulu na agradesimientu yan ta gagau lokue mas bendision ya u esgaihon hit mona gi talulu’ yan didog na tiempon ha’ilas. Ni unu u seha ginen este na patte gi fitme na tradision-ta.
***
I mañainata finenina gumacha’ eskalera siha gi kinalamten linala’ tautau. I ta pokakate pagu esta hagas mafaposgue. Madimemoria amanu na banda gi plaset linala’ yanu, mihoyu yan hagu’ na lugat. Sin ditension, ma-apagat hau na un’ suhaye hafa piligrosu yan tailaye para hagu.

Gi ayu na kanta, “Para i sainamu muñga ingratu”, ha sasañgan i sensian saina ni esta ha mamattitgue’ pot nesessidat famaguon niha. Mapulan hau pueñge yan haane gi halom todu klasen chinatsaga yan abundansia. Siha i fitme na halige yan pisun familia ni umesgaihon mona famaguon niha sin deskansu.

Ti apasiyun animon niha yan anchu na pinasensia gi halom i mas man-makat na karera. Ya taya’ minagof niha i para umalie’ na todus famaguon niha man-felis lokue’ gi kareran niha Mauleg unna’ satton hau nu siha.

***

Sige i dos amigu mumaneska gi puntan pantalan Susupe. ’Nai talulu’ ’las dose, mampos maipe ya hihot tostus i dos. Ha yute’gue i unu para e’fresku. Gi biradaña hulu, ha lagnos i inaflitun petnan manog ginen betsaña ya sige ha kanu’. Ha sañgane gachoñgña ya esta duru i gipot “guihe papa’”.

Ti apmam, ha yutegue’ lokue i otru. Lau ha birague ensegidas hulu ya sige ha pasensiaye mayamag yan mahaga’ mataña. Finaisen hafa guaha ni amiguña, ilegña, “Lapekaras, esta lai man-bulachu ya i petta ha’ chihu mafueguyu’”. De dios. Era ha sufa’ un’ achu gi fina’ natata”.