Sensuran Offisiat Publiku

Pa`gu na sakan eleksion lehislatura. Deste pa`gu ta tutuhon umebalua haf` bidan niha para uma-adelanta kualidat linala` publiku piot gi bandan sueddu.

Oppan gi gaseta siha makontran disision publiko pot casino. Haf` i motibu na taya` respetu gi disision i tautau gi este na asuntu? Na tita chule` i asuntu ginen siha pot dos besis sa` taya` inañgoko-ta gi disposision niha?

Todu malago`ña i kompania ni muna` fan lamlam fasun niha ha chule` sin ditension. Estague` fumañagu nuebu na grupu entalu` siha yan i tautau siha gi señgsoñg. Machanda fitme siha na areglu sa` “hame mangai salape, pues hame lamon ni todu areglu”.

Uttimoña ti siña esta makomprende chinatsagan i tautau sa` man-mikepble ya nina` fan bachet. Man-malefa ni marepresesenta sa` man-mañoda` amun niha ni mikepble. Lastima!

Buente ti mahasñgon lau manginacha` induktu yan minamahlau. Lau siha i manmikepble na biahe mienstras i publiku mas mafondu gi halom sisonyan te`ug na pinepble yan pinadese. Olara mohon ya in` hahassu este na pinadese gi oran botasion na sakan.

Maliñgu sensian hinimidde yan integredat gi kareran destrosiun offisiun niha. Siha fumatinas este na disision. Taya` manesessita disision publiku para umana` offsiat manmalagnos niha sin ditension na sakan.

Inadahen Hanom
Humalom i kliman En Niño na semana. Guiya este i tiempun maipe yan añglu`. Anaku` na tiempu este na mattiru ya mauleg in` tutuhon umadahe todu usun hanom sinaga. Mauleg na tostus para u na`yan hit este na matklima. Hu a`atan na siempre kontodu usun hanom grifu gi señgsoñg siha u fan mahuchom bes enkuando pot para umasaguaniye i tañke siha. Adahe finagten miyu hanom sinaga.

Pisun Natibu
Gi todu kinalamten, petsonat pat linahyan, manotohge hit gi fitme na pisun kuttura-ta mientras ta esgagaihon timon galaide`-ta. Ta fana` chubasku, pagyu, yan linau gi anaku` na karera deste tutuhon. Ni unu sumeha kau katma pat mattiempu. Rason? Man-mau`udai hit gi fitme na sahyan natibu: kuttura.

Deste antes tali`e finattu yan hinanau tinilaika siha. Kontodu kabayeru yan manma`gas relihion manhanau gi minachom atdau. Todu este siha na tinilaika lau gagaige ha` i kuttura-ta intaktu `nai takahlañg inañgugho-ta. Deste bisguelu yan mañaina-ta un` tiempu manhihita dispues manhanau `nai manmadispone. I sustansian achon natibu ni ma-impatta giya hita ginen kutturan natibu hita dispues chumahlau.

Huñgan u guaha siha tinilaika lau i metgot na kutturan natibu u tunog gi todu hinerasion. Estague` `nai gaige i fitme na pisu yan haligen tautau-ta: kuttura yan tradision.

Pot Chaleg:
Guaha ta fagcha`e nuebu na moda siha gi sisienta na sakan. Unu i sapatos bossa nova yan botas Beatles. Kumu un` u`usa unu gi dos hagu i paire. Adahe botas Beatles bidaña gi un` amighu. Mayute` pot ayu ha` guinahaña i sapatos magagu—tennis shoes. Era mattu un` tautau Guam ni sinapapatos botas Beatles. Magpu` todu i nobena sin matucha.

Dispues humalom i nuebu siha na baila tat kumu twist, surf yan chacha. Ke de hemunos kau “F” gradu-mu gi social studies kumu paire hau bumailan twist, hagu i prinsesan eskuela. Adahe, kontodu tatten komun sanhiyuñg `nai hu praktes-yu` twist. Hu sufa` i troñkun choda para bai` na lagse` yeñgyoñg liliku`. Piot `nai in` li`e si Chubby Checker. Dios tiampare!

Hombre, pa`gu man-e`eyag famaguon natibu modetnu siha na moda. Ha katsa siha kadu` prefektu Amerikanun pau asu. Dios mihu!

•••

Man-atminudu i mañelu ya mafahan un` nobiyu para flitada yan totche. Dispues de machuñgat, todu mañaunau man-mamogse yan mapikan tilipas estake todu listu para umana lagu. Mañaña` na katne sa` nobiyu. Todu mana` fan mañage. Paire na dinaña man-afamauleg yan hihot na mañelu.

Dispues in` katdu i patas guaka estake mamatgan getmonña. Man-na`yan i amiguhu ya ha gulusune. Trenta minutos dispues mañila` labaniyun dinalag gi koyenturan dedigoña. Impirau para umakone` para i gima` sa` tiha susuñgun putiña. Che`chu` gulosu.

•••

Mañgone` i bisinu hatdineru ya ha tutuhon mananom. Mauleg na tane`. Sumen magof-yu` `nai huli`e mankapuyo` flores-hu gi menan guma`. Guaha lokue` sinisu siha gi tinanom troñkun patma. Puede ti nina` fan añglu` ni hinalom tiempun maipe.

•••

Guaha `nai tafagcha`e tai ganas hit chumochu. Sige ta aligau fina abreganas deste finadeni` inasnen tukon, kottidun pipinu, papaya yan napa`. Man-mauleg na abreganas ya cha`mu malelefa na abreganas. Gigon un` gulusune tinagam hau otru chetnot.

•••

Dispues de misan matai, mana` guaha kumida gi gima` i gai che`chu`. Ayu `nai man-asoda` todu gi fina` amotsan oga`an.

•••

Tihu komprende haf` i Chamorro na `an man-bisita gi ICU hafaisen papa` i kumeke matai, “Kau mamauleg ha`?” Pot dios!

•••

Dispues `nai humuyuñg i bisita ha sañgane i familia, “Ta aksepta ha` sa`…” Ke lau magahet na umakonsutta hau yan i Saina na taiguenau fino`mu gi familia? Dios mihu!