Sasyan Tradision

Kumareran chagu` na lugat gi sasyan galaide` gai preparasion. I kapitan ha asegura na listugue` para ayu na biahe. Deste layag yan mantension hana fan listu para usuña yan pasaheru.

Ha tuñgu` usun mañglu` gi layag para u lagse hinanau galaide. Ha usa i luseru yan pution gi lañget an` puenge. I kilulog kurente gi ha`ane, paluma, yan pañgpañg mañglu`.

Maseha modetnu na estau `nai man-gaige hit i usun sasyan tradision asta pa`gu sumen benefisiosu usuña. Tai modetnu na trastes lau siempre u fattu gi maseñala na isla.

Gi hilu` tanu` antes, karetan guaka usun familia piot para i gualu`. Todu mantension man-makatga deste ramienta yan neñkanu` gi taftaf oga`an. Siempre u fattu gi lanchu antes de `las dies gi ega`an. Ma-disonse i guaka ya mapastu mientras sige familia machogue che`chu` gualu`. I mismu sasyan mana setbe gi minachum atdau para tatte gi señgsoñg.

Tat gi dos sasyan tihu chage. Banidosu-yu` sa` huli`e usuña galaide` yan karetan guaka gi kinalamten familia.. Este na ineyag yan hafa siha ha apagat ham i dos sinatusan yan sumen popble na sainan mame mina` fitme i pisu gi dos adeñghu. Siha muna` fitme i espiritu gi masimientun kabales na linala` yan disposision patgon natibu.

Ginen ayu na gualu`–usun i edda`–`nai hu komprende hafa i natibu na satton relasioña yan i tanu` kontodu tasi. Estague` i dos lugat `nai gaige espiritun guelu yan guela ni umestablese riku yan fitme na kuttura yan tradision Chamorro.

Ni haf` taimanu gaige hale` yan pogse` fitme na espiritun natibu guine gi dos lugat. Tatnai in` repara na gigon baba i kinalamten ensegidas ta falague i gualu` yan tasi? Na ti kulan silensiu na mensahe ginen man-mofona na mauleg ta bisita tatte manu `nai gaige hale`ta pot satbasion?

Bisita hatdin familia

Yangin chatkomprende i tautau pot siknifikasion tanu` yan natibu mauleg u egaga` umestudiaye este na asuntun pot kinemprende haf` tinate-ta.

I manadan mattirun tinilaika deste finagpu` geran dos fumunas relasionta yan tradisionta gi modun linala`ta. Maseha masusede este chatmiyu fan malelefa ni riku na tradision natibu ni inestablesen guelu yan guela. Tat mas fitme ke haf` pinegan niha para hita.

Pot ihemplo: `An guaha probleman batkon katga ginen lagu menos pugas yan mantension siha gi tenda. `Nai ni mona ni tatte siempre un` aligau haf` guaha gi gualu`. Poresu na maseha adumididi` cha`mu ti umoffisiona mananom para `an tiempun pagyu `sino chata`an.

`An katma i tasi ya peskadot hau, usune mañgone para mantension mattiempu. Todu i tiempu pot preparasion i tita lili`e mamamaila` na ta chochogue haf` presisu pot no u gacha` hit induktu. I tautau man-lolotge hanom gi tiempun uchan.

Mauleg ta ta`lun umestablese hatdin familia. Esta namatman `an mattu mattiru ya gaige nesessidatmu gi tinanom-mu kamute, sune, choda yan golai gi hatdin familia.

Areglon Tasi

Sige hu akanteha haf` na matai i mattiñgan deste Obyan, Afetña yan Chalan Piao. Appenas guihan guine siha na tasi. Kau usun deris, dinamita yan binenu na attifisiu pumunu` i rubentason (reef)?

Ayu ha` kulan asientadu na tasi immidiatmente lichen pantalan Susupe. Gi ge`lichan haf` na kandadu entalu` i inai yan rubentason. Hasan tali`e tropan guihan. Guaha `nai anog tarakitu `an ume`eboka. Taya` otru fuera de este.

Hana` matmanyu` lokue` un` talayeru (ti natibu) ni ha dadadagau talayaña de hemunos kau gaige i guihan. Buyadan tasi yan unai ha batsala halom. Lau mauleg tana` ma-atan haf` guaha na kulan man-matai todu kinalamten gi rubentason este siha na lugat.

Kanastran Konbetsasion

Huna` listu gi un` botsiyu mama`hu deste fotte na pugua` ugam, pupulu, kalerun afog, yan amaska. Era, hagas hu faisen un` kompaireghu unu gi dos paireña gayu. Sen tiha ho`ye-yu` guihe na finatoghu. Debi bai` eluye fina`n laime para bai` pula` mahetog sensiaña.

`Nai ha tutuhon sumomukegue ni mama` sige ham dispues kumonbetsasion. Uttimoña hana`eyu` ni finaisenhu kontodu puyitos i paire. Ayu `nai hu komprende usun kanastran mama` gi tutuhon konbetsasion bisita antes gi gima` mañaina-ta. Kulan kanastran para un` pula` hila`mu `an esta nina` bulachu ñaihon hau ni mama`.

***

Estaba un` patgon yan pisau tañgantañgan gi kanton unai sige umesuette. Mientras tantos, hu faisen kau guaha esta kinine`ña. Chumaleg ya ilegña taya` trabiha. Hoben idatña lau `an esta umeyag maseha peskan tupag pisau siempre u fañgone` para mantensioña para mona.