I Santo Papa Francis

Si Santo Papa Francis chumoneg pinetsigen ayudu para i tautau ni ha tutuhongue` ginen i korason. Ilelegña na soluke mafattu sinsinyu na palabra ginen i korasonmu kanaha` tai bali fino`mu siha.

Ha soyu` todu katdinat yan o`bispo na u fan huyuñg ginen palasyon niha ya u fan hanau guatu gi tautau ni masesetbe para u li`e kabales haf` modun linala` niha. Ti siña este mali`e gi halom kuatdranten palasyon niha!

Hombre guiya mismu i Santo Papa otru lugat `nai sumaga giya Roma. Ha suhaye i palasyu ni mahatsa para maseha haye na santo papa pot para u siña mas hihot yan i tautau siha. Estague` na mañan papa i lumi`e sustansian koneksion yan tautau siha sumen presisu gi maseha haye na kabesan komunida piot guine.

Yangin taigue i sentimentun i tautau gi korasonmu, pues tai bali i offisiu ni un` okukupa pa`gu. Piot ya tai tiempu hau umekuñgog haf` sessu probleman tautau-mu siha gi señgsoñg.

Che`chu` Atrasau
Dispues de todu, sige pa`gu i bumota casino mañguentos pot inadahen este na industrian kontra kandet, hanom yan sisteman paip aplacha` (sewer) gi mas hihot na soñgsoñg siha.

Ni mas de menos este na hinassu yan mapegan toru gi tatten karetan guaka. Hita pa`gu para tana` maudai i toru en lugat de guiya u fan hala dispues de ma-onse. Estague` siha na finatsu mina` atrasasau kinalamten-ta guine. Pot este na diskuidu mas ma-estira tiempun mahatsan yan mababan este na industria guine.

Poresu na kada ratu hu mente na debi u guaha planu. Ginen fotmat na planu `nai siempre un` li`e haf nesessidat i ma-intended na industria. Magpu` i nobena sa` siempre man-a`hala hit tali gi ge` fena. Dispues appenas lokue` empleau para mahatsan fasilidat casino yan operasion dispues de monhayan.

Estague` mina` mampos lastima i tiempu `nai machoguen hasupag sustansiau na asuntun linahyan taimanu i casino. Marianas ha` `nai hu li`e sessu ta atbansa hit tatte!

Che` chu` fan gualu`an
Maseha haye na lancheru, todu i tiempu ha planeneha hafa para u petsige deste managasgas hatdin, konsiderasion finattun agua de Abrit, haf` fahna na golai yan gulusina yan otru siha nesessidat gualu`. Gaige gi hilu` konsiderau na planu haf` para u chogue pa`gu na biahen mananum.

Deste simiya, abonu, hanom, amot pesti, hutnaleru, yan metkau todu mangaige guenau na planu. Siempre ha tutuhon gi mana` gasgas i lugat, aladu, ma-eñgleran odda`, tinanom simiya gi kahun estake matransplanta gi edda, marega, abunuye, yan otru siha cho`chu`.

Siempre u fofona i chadeg siha na fina` golai pot para u gai ganansia gi halom tres mesis. I otru u fanatatte mientras sige ha rinueba i lugat para u dobla mananum. Otru ayudu gi mantension familia i pinegsai deste manog, babue, ñgañga` yan chiba. Dispues guaha `nai ha dobla tumekin `sino tumalaya layeye pot mantension i tropa gi gima`.

Magahet na na`mase` i prohimu `nai tinetpe mattiempu gi katkuet sakudida. `An anaku` i tiempon fañomnagan mantostus tinanomña. Gigon sinaulag atlibes na klima man-matmos lokue` i tinanom siha. Debi u pogsu` gi tiempu puede mas anchu yan libianu benefisiosu biradan animuña.

Makat na offisiu lau hombre este mau`udai gi hilu` planu.

I chafleg yan inipos na machalapon gueku na kahan iya Marianas mamatmos gi halom chubaskun taya` planu ginen i timuneron hegsu` I Deni`. Mauleg na i publiku u pinadese diskuidun niha? Hagu solu siña umoppe este na kuestion.

Lastima i tiempu
Ti gaganduyu` poker lau hu huñgog na mauleg i natibu humugandu nu este na klasen huegu. Yangin todu este linistoña haf` na ti siña ta danche petmanente na satbasion problemata siha?

Pot fabot: Gi kada sakan na un` luñu` linala` publiku gi aplacha na sadog diskuidumu, garentiha na tres años tatte `un` fondu ha`anen niha. Dinanche este?

Lau sumasaunau hau umesalau “biba” sa` listu hau man-ayuda umatbansa linala` tautaumu siha. Malag manu` ayu na ansia? Kau mauleg infa` esklablun miserapble na ekonomia i publiku pa`gu? Haf` minapotña in` li`e na man-chatchogue hamyu ni dichu asuntun linahyan?

Gi halom 29 na man-malate` kau linala` miserapble ha mirese i publiku pa`gu? Kasse guaha sineda’ miyu lagse` na eskusu ya hagas hu nañgga haf` `nau siha na eskusu. Debi in` esplika pronto diskuidun miyu. Taya` esta tiempu para gueku na dinage siha.

***

Ilegña i amiguhu Magoo, “Muñga nina` chatsaga ni masusesede sa` esta pa`gu ti madadanche na debi i dos kanai parehu kalamten gi dinanche na pinetsigen che`chu` linahyan siha”. Kasse dinanche si Magoo!