Saludu Para Si Nana

I apaga`ña tat ti umapu`, finu yan yo`ase` kanaiña lumasa ha`ita, kariñosa na palabra muna` fan maggem yan humidde chinatsaga-ta. I mañge` chalegña regaluta.

Halom katma yan pagyu, tumachu` gi fihon asaguaña yan famaguoña, listu. `An presisu ha mattitgue` pot nesessidat todu. Guiya umaregla yan muna` katma todu kinalamten familia. Guiya este na palao`an i ta a`agañg “nañg” `sino nana. Diariu, fitme guiya pumulan todu estake mandeskansa `an pueñge.

Un` nana ni sessu mattu gi hinasoghu (meditation) i fina`pos Santa Maria desde ke masentensia i lahiña sin umisau, makastiga, ma`atane gi kilu`us, mapunu`, mapega gi sagaña estake luma`la` gi mina tres dias.

Hombre hita ni tautau ensegidas man-impirau hit `an guaha umaminasa patgonta. Hassu fan i silensiu kulan kinilu na fina`pos Santa Maria ni gaige ha` gi menaña na sige makastiga lahiña. Ni unu umatrebigue` man-ayuda pot mina`añau. Ha suñgun todu mattrata ya mattiru estake kahulu` i lahiña i lañget. Poresu na este na biahe hu o`onra fietmiente si Santa Maria, nanan todu mañgilisyanu gi enteru elmundu.

I nanan guma`, guiya i kusinera, labandera, infetmera, yan nana-ta ni pumulan hit desde ke mañgunanaf estake manfitme primet pasuta.

Poresu, na achog ta diñgu `nai ta establese mismu familiata sen ti magtos satton na bisita giya guiya piot gi ha`anen gupot siha.

Ni haf` tasañgan ti apasiyun i guinaiyan nana, anchu na pinasensia yan sugat na sensian minesñgon gi halom linau, katma pat pagyu. Finu` inapagat un` kanta, “Ayu na hagu lokue` ni patgon para i sainamu muñga ingratu”. Si Yuus Maase` para todu man-nana pa`gu na Dameñgo. Echa ham bendision mame!

‘Chalan Iya Hame’
Tat ti chumage kumefunas rasan Chamorro desde tiempun Españot. Mattu gi tai respetu España yan Amerika `nai umabende tanu` yan tautau Guahan. Na ti mantautau i Chamorro?

Kasse ti masupone na siempre u fan dañkulu famaguon natibu `nai matutuhon makuestioña anaku` na tratamientun esklabu yan kau este futtunan famaguon niha?

Masusesede este pa`gu giya Guahan. Banidosu-yu` na mumetgot sentimientun natibu umebalua haf` masusede yan mañgge, gi finu` un` kanta, “chalan iya hame”.

I hinalom dañkulu na planun militat yan nina` halom mas pine`lu (investment) gi industrian bisita, dos napu` este ni fuetsau tumulaika modun linala` trañkilu na soñgsoñg siha. Haf` binabaña hihot yan mauleg na amesta entalu` natibu gi señgsoñg? Baba bendision ginen as Tan Maria yan Tun Jose? Na ti patte este gi kutturan natibu? Baba i pas yan trañkilu na linala` natibu gi lugat niha?

Mattu prontu i tiempu `nai i natibu debi u tutuhon fumaisengue` haf` siñienteña gi futtunan famaguon niha. Tai bali i adelantun militat yan industrian bisita yangin para umakontinua mafa` konbiniente na katsu i natibu! Siha i mames na fruta, i natibu lamas yan `ansobla! Mauleg uma-ebalua i kareran yan futtunan natibu!

Asuntun Hineñgge: Ha faisenyu` un` ñietu haf` kumeke ilegña “añklan espirituat”. Para hinebeña satton na patgon gi bandan relihion. Lau gada` para u komprende haf` finaiseña.

Hu pasensiaye umesplikaye gi ti mapot na eskalera na i asuntu pot hineñge gi Saina. `Nai un` aksepta i Saina gi ha`animu ya un` pega inañgoghomu enteramente gi disposisioña, guiya ennau añklan espirituat. Ni u fattu chubasku ti u lailai galaidemu sa` esta un` añkla fitme gi sagaña. Siempre diariu un` fanayuyot parehu ha` ginagau bendision yan agradesimientu.

Kada tautau difirensiau manera `nai ha embrasa añklan espirituat. Gi uttimu besis siempre u esgaihon halom i ayudun i Saina.

Guaha makat sinesedihu gi uttimon ochenta siha na sakan ni bumirayu` tatte gi Saina. Hu appelayu` lokue` bendision gi as Santa Maria ginen i sumen sinantusan na dos patman kanaiña.

Felis yan katma karerahu desde ayu na tiempu. I Saina gachoñghu diariu. I mames yan gloriosa na nanahu as Santa Maria numana`eyu` katma, minesñgon, pinasensia, silensiu yan hinimidde. Añklan espirituat!

Karera: I pañgpañg napun linala` un` klase ha` `nai ni unu soplu. Siempre un` falag un` bandan katsada `an maliñgu hau gi kareramu. Un` halom gi kañada `nai siña lokue` maliñgun ñaihon hau estake siña un` soda` tatte manana na kandet i señgsoñg.

Guaha siña un` tulaika lau los dimas esta monhayan ha dispone todu desde tutuhon i tanu`. Yangin ilegmu na mifuetsa hau, pues chage fan tumulaika dineku` atdau desde sanhaya esta sanlagu. Este na puntu `nai un` lili`e manu china nina` siñan tautau. Un` mafañagu, la`la` yan dispues madispone. Tatnai huli`e mana atlibes este na disposision.

Usun MJ: Fuera de asukat, i agaga` na patte gi haga` i tautau ti komprendiyon haf` na umayuyunat chumochu naturat na asukat ni mafanana`an “insulin”.

Unu gi dos muna` para mayamag asukat man-dañkulu ni siña dispues hana setbe tatautau-ta malimiendan hinemlo`ta.

Masoda` gi estudiun un` grupon tautau ni umu`usa marijuana na menos probleman haga` niha kumanu` asukat naturat. Mas lokue` menos chansan niha daibites sa` mangai ganas mañochu. Inafuetsas i haga chumopchup naturat na asukat.

Ti hu u`usa este na attifisiu lau yangin mauleg sineda` estudiu dispues, sa hafa na para ta ñega gi numesessita. Haf` este `nai humalom fakterian amot siha ya ha lachai muna` tailaye usun niyog. Pa`gu, tat ti umatitisa na paire na patte gi homlu` na neñkanu`. `An baba, pues hagas ha punu` tautau isla siha gi enteru Pasifiku. Lau miyon na kepblen niha maprotetehe`! Chechu miron!

Pot reputasion marijuana mina` mamapot machoneg mas estudiu. Lau siempre uma-estudia mas haf` na taiguine na modun benefisiu yan ayudu mafattu gi mandaibites siha giya America. I kuestion: kau marijuana i sigiente amot para mandaibites gi enteru elmundo? Ti namanman `an uttimoña makonfitma na huñgan propiu na klasen usu para mandaibites.