Rineskatan Inañgoghu

`An chatsaga hinasoghu hu arastreha lastrun biuhu gi inai `nai hu dalalag tumalaya antes. Hu tatiye kada pasu mientras hu rikokohe i guihan siha. Ayu na lastrun amku` pot direksion.

Dispues de katma hinasoghu `nai hu tutuhon manaitai gasetan elmundu yan estudiu siha gi inayeghu na asuntu. Sige teñga hu ebalua tat asuntu kumu sueddu, pinepble yan satbasion, appenas appottunidat para i famaguonta ni man-magradua gi koleho, kuttura yan tradision. Hu ebalua todu patte pot para bai` komprende i asuntu.

—

Diniseha: Hu tatitiye kinalamten un` grupu giya Guahan ni chumochoneg tinilaikan modun linala` ni pinegan nasion siha ni dumispone i tanu desde 400 años tatte.

Dañkulu na chanda mafafana` `nai umatotpe pinayun niha pa`gu yan dinisehan para umareskata dignun natibu. Magahet na fuetsau na tinilaika maputa` gi entalu` `nai independente i natibu yan dispues de mana` dependente.

Mientras sige matrabuka i asuntu, mafattu lokue` kuestion haf` kuttura yan tradisioña i natibu pa`gu na tiempu? Hagas ta diñgu tradision linala` gualu` yan peska. Estague` ginen tradision natibu. Haf` pa`gu kuttura-ta yan tradision-ta?

Kase inafuetsas nuebu na modun administrasion chumoneg i natibu guatu gi bandan dependente kumu planun Amerikanu. Masusede este taimanu mapega gi Solomon Report desde antes. Haf` dichu i planu gi papa` este na pinetsige?

Gi halom rimulinu i natibu lokue` ha embrasa manu i siña umatbansague` de hemunos kau hafa` basula dignoña yan tradisioña. I Amerikanu (Navy) ha choneg finana`guen bisnis lau para i natibu libianuña macho`chu` `nai garentia na guaha pagamientu.

I popble na modun linala` umatisa dinisehan tinilaika guine kontodu dinaña` yan Guahan sisienta anos malofan. Ti masusede lau dispues mafotma kontrata yan Amerika gi mediu sisienta siha na sakan. Guaha mohon kampu para ta reskata dignun natibu? I kuestion katgadu ya haf` na chispas dañkulu na kakaguetes gi lañget paraisu!

Komplikau: Kada kalamten tumobet i tanu` ta añgog-hu na todu felis i karera-ta. Sige mona tasoda` na tai hanom i redi`eta`, ti nahuñg mañglu` un` reda. Dispues, man-malefa hit ni teñguañg-ta amotsan talo`ane.

I namanman i kada ratu ta repite i mismu diskuidu kulan mohon nuebu na kustumbre. Hita ha` sumapet mamaisa hit pot diskuidu-ta. Anog na taya` sattun na areglu gi megai na asuntun linahyan. I tautau gi señgsoñg pumadedese todu diskuidun hegsu` imperadot I Deni`.

Ke lau malag manu i sentidu na sensian tinemtum yan konsensia gi halom este na rimulinu? Kuantu mas na sapet para in` afuetsas gi publiku pot diskuidu?

Pinepble: Ripot gaseta ilelegña na guaha mas ke 300-500 na natibu mantai fanliheñg (guma`) giya Guahan. Gi halom este na tropa guaha siha ginen sankattan na Marianas.

Sige hu guadog manu `nai gaige hale`ña este na pinadese. I dumiñgu tano`ta pot inaligau appottunidat cho`chu`. Lau finagcha`e mantai che`chu pues makat apas atkilon guma. Ni kareta taya` para u fan malag i che`chu`. Manginacha` induktu gi katkuet kinalamten.

Masuñgun mañaga gi fina` atukan (guma` gi halom tanu`). Ayu `nai manhuyuñg man-epineduñg mantension ginen hagas tautau guine ni mangaige na felis kinalamten niha giya Guahan. Che`chu` yine`ase` pot manginen este sumatban ñaihon pinadesen niha.

Puntu? Pot diskuidun man-ma`gasta na manhanau lau otru pinadese ni mas chatsaga pumalo`pu` ha`anen niha.

Dios Mihu: Hu e`ekuñgog huntan sanpapa` na guma` pot CW (hutnalerun ginen hiyuñg). Anog klaru na ti makomprende fuetsan lai federat gi este na asuntu. Dispues, mafama dos palabra kulan mohon nuebu na konseptu. Lau i mismu palabras kehan pot diskuidun niha lokue`.

Gaige gi kontratan i Covenant na lai konstitusion yan federat supremu ke lai iya Marianas. Guiya este mafanana`an “supremacy of laws”. Haf` ti u bulalachu asunto-ta `nai ni mismu para man-mamatinas areglu taya` kabales na kinemprende pot areglu!

—

Hombre: Sige dinaña` manrikohen fondu (fundraising) para `nos kuantos kandidatu siha. I kuestion: Haf` makomple ni sustansiau para uma-adelanta linala` publiku fuera de manadan diskuidu? Namanman i sensian banida lau taya` makomple ni bintaha para i tautau siha.

Gi mismu tiempu, hita ni botadot umesaguen mamaisa hit sa` kada ratu ta pega tatte gi puestu ni ma-abusa pot interes niha. Malagu`yu` humuñgog haf` bidan niha i sais gi presente na representadot sanlichan na patte giya Saipan. Halo? Tinahuñg ni biba yan biliba! Binaya` i publiku sinparat na promesa ni kada ratu mana mamtu` sin mapañot!

Hafa Mas? Hu nanañga para umadandan kampanan pattida yan haf` para u fan mapresenta gi señgsoñg siha na biahe. Muñga iya` na para ta huñgog ma-introdusen kandidatu para u adiñgan ya ha lachai tuma`lun umitroduse todu i otru siha kandidatu. Dios tiampare!

Guaha lokue` mama` sai`antes karisu ya sige ha pasalista asuntu siha sin u diskute. Lau hagas ha fama na menhalomgue` pot asuntun linahyan. Mattu gi hana` disganau-yu` ni natatan hinassoña. Finu` i kanta “humalom mepplu, humuyuñg dañgas”. Masusesede sa` patte este gi kustumbren Chamorro i banida!

—

Politikan Isla: Politikan dikiki` na komunida gai tine`ug lokue`. Ma-agañg un` amku` para u bendise lamasa. Gi uttimun tinayuyotña ilegña, “ya na fan mapedi todu ayu siha i mangaige gi otru banda”. Dios mihu!

Gi ge`mage, ma-agañg un` amku` para u adiñgan. Sige ha diskute pot sisteman gobietnamentu yan chinatsagaña pot diskuidu. Ilegña, “Estague` finaisen-ta, puru hit ha` de gagamen de gagamen (government)”. A`saina!

Guine, huli`e un` prohimu man-gagau kopble gi un` kandidatu. Dispues de ha botsa i bente pesus, ma-introduse i kandidatu ni pa`gu ha fofogse. Ilegña, “Ti u fangana si brutu! Guseña na ha sufa` i mama`te”. Dispues de ha saulag bente pesus?

—

Usun ramenta desde kuha, fusiñus, machete, kama`, kubu, trastes makenista yan katpenteria debi un` eyag pot satbasionmu. Na seguru na un` tuñgu` usun machete. Cha`mu sasague` katkuet direksion sino hagu dada`da`! I puntu pot para un` safu gi kada biahe `nai un` usa katkuet ramenta. Muñga na halom hospitat `nai para tafan a`afana`gue!