Riku na gualu` natibu

Megai gi familia-ta bumira siha tatte gi gualu` gi hiniyuñg i Navy guine gi 1961. Taya` otru offisiu `nai mana` fan para gi che`chu` niha. I gualu` yan peskan tasi solu remediu.

Bastara ke payun luma`la`, ensegidas ha tanum haf` chadeg na agu`un haya para mantension familia kontodu pinegsai. Deste choda, sune, kamute, dagu, nika, yan gulusina sinparant man-matanum. Dispues mafalague kanton tasi man-chenchulu `sino talaya.

`An pueñge man-peskan fisga `nai makone buyada na guihan sanhalom ni man-ladañkulu. Guaha lokue` man-peskan halom tanu` man-e-ayuyu `sino binadu, manog hatsadu yan babue. Brabu kalamten i patriakan familia gi satbasion familiaña gi bandan mantension.

Maseha man-hinegse didog na chinatsaga, ti mafnas i sensian ayudu gi entalu` familia siha. Mas oppan este na sensia gi halom tautau-ta. I modetnu na modun linala`ta adumididi` fumunas este na linala`ta pa`gu. Enfin, trabiha ta`lu memetgot ha` sensian familia yan ina`ayuda gi entalu` todu.

Tai malefaghu ni asun kusinan lanchu `nai o`oppan mañge` na tininun katne yan guihan. Popble i tanu` lau riku mantension naturat i natibu. Metgot i pegsi` ina`ayuda gi entalu` tautau-ta. Estague` sustansian yan sumusteteni i tautau Marianas esta pa`gu na tiempu!

Fitme na kuttura
`Nai hu bisita iya Palau un` tiempu, sumen gatbu na tanu` gi todu guinahaña. Deste plasan batkon aire esta i primet siuda (Koror) ma`lag na betde enteru i oriya siha. Inadotna ni gatbun tasi gi kantun tanu`. Abundansia guinahan mantension i tautau siha.

Huli`e mauleg na kustumbren peskan guihan halom rubentason. Ayu ha` makone para usun familia guihe na ha`ane. Mapatte haye na atuñgo` gaige dispues i pumalu machule` para i gima`. Guaha ha` lokue` `nos kuantos metkao guihan. Lau rektu na areglu guaha gi disposision minan tasiña piot guihan

Gi oriyan guma gi enteru isla puru tinanom choda, mendioka, sune, kamute yan gulusina. Estague patte gi mantension familia gi enteru i sakan. Tatnai man-fatta nu este siha na agu`un. Kustumbren tanu`. Estague` sumoyoyu` mananom choda gi oriyan gima`hu. Siempre u tatatte mendioka, sune yan kamute gi manu `nai mauleg i edda` gi oriya.

Esta dos biahe hu hoñggu` chodan galayan yan manila. I tinegcha` mañga sessu finatoigue lalu` fruta ya mofo`na dinestrosia antes de u to`a. Na`e animu maseha dididi` para usumu.

Deste ‘value’ esta ‘dialu’
Hu e`ekuñgog un` sabiu sige pumalapa pot “land value”—balin tanu—ayu na ha sappopotta matulaikan attikulu dose. Ha danche i asuntu pot balin tanu` lau gueku kumu katsu gi majustifikan tinilaika. Ti rason este na eskusu!

Dispues, ha sañganeyu` i amiguhu Muron na i mismu tautau ni fumafama “balin tanu” fuma`um halom kuchinun adeñgña gi sikosña. Era, mamahan tanu` ni balin $30-mit lau pot emerensiha na nesessidat, $5-mit ha` tinasa ni dueñu.

Anog na maliñgu gi santatte i “value” ni tinebus huyuñg ni “dialu” gi este na estrakada. Ai, ke lau mañgge` i suspichosu na esplikasion pot balin tanu`? Gai konsensia i plumacha`e i mismu ha fafama na asuntun linahyan? Dalai `ste!

Pot fabot, fanachu` gi hilu` integredat yan sensian espirituat sa ni ñgai`na `nai in` fan lache. Dispues, un` tantan hau gi uttimun ha`ane gasgas konsensiamu. Paire na siñiente gi minachom atdau. Dumeskansa hau pas gi halom katman konsensiamu!

Man-ñahlalañg
Estaba un` lahen mame gi oriya gai kinamten, era atotgante yan pitbetsu. Mamaisen haye numesessita siboyas golai. Ha insiste na uma`apase ensegidas esta i dispues i produktu. Ni unu umatrebigue` pot todu tumuñgu` na si tataña i guagualu` ti si pindehote!

Sessu antes huli`e si biahu man-utut eskobiya ya ha bale halom guma`. Sumen gasgas yan lamlam i satgen i sala. Kasse, gai laña i hagun ayu na tinanom na nina` lamlam i satge. Eskoban antigu ni todu umu`usa gi mabalen halom guma` antes na tiempu.

I gima` antigu na mañaina-ta tatkilu`. I fina` satge ma-usa entre kusina yan fanliheñg pinegsai. I tampen atuf tinifog hagun niyog yan sakaten sisonyan. Fresku na guma` lau ti guiyaya figu` gi halom mattirun fotte na pagyu. Pa`gu puru padet ni kulan hotnu dispues de `las dies gi ega`an. Dios mihu!

Antes, taya` `nai ma-eskohe haf` na trahe para ta usa. Man-praktiku i mañaina chumoneg na `an gasgas, pues usa ya un` sige para eskuela `sino doktrina.

Pa`gu, debi u parehu kulot deste sanhilu`n todu papa`. Ai ya in` chage yori` mame antes ni papagpag `an magtus i pinegan chubu` gi sanmena. Lau ti na`mamahlau sa` ha konfifitma na patgon popble hau. Taya` riku gi entre hame guihe na tiempu ayu na manbrabu ham gi halom mattirun pinepble yan hamagtus yori`.