Respetu gi disision iya Saipan

‘Nai umentalu` Luta yan Tinian dumestrosia disision tautau Saipan pot casino, buente ti mahasñgon pot che`chu` pinalala gi hilu modun muron.

I konstitusion iya Marianas hana` illigat casino soluke mabota ni tautau taimanu masusede Tinian yan Luta.

I tautau Saipan ha ekspressia klaru haf` disposioña gi este na asuntu. Ti hu agradese umentalu` i senadot Tinian yan Luta ya maplacha`e ditetminasion tautau Saipan ni pot dos besis ha disapprueba casino. Debu u guaha respetu gi este sumen sentidu na asuntu.

Klaru na ti umentalu` Saipan `nai mabota gi dos islas para umana` halom industrian casino. Buente ti marepara na `nai maplacha`e asuntun Saipan kontodu siha mismu madestrosian maisa siha.

Yangin ti konfotme hau haf` disposision tautau Saipan, mauleg un` rikonose hafa na chupa un` sosopla sa` mampos natata kinemprendemu direchun sudadanu!

Estague` yuhe na uchan

Kulan mesgu` ñaihon lagohu `nai sige un` sumen na`mahalañg na sunidu madandan mientras hu gigimen i primet na pusuelon kafe un` oga`an.

I kanta ileglegña “Estague` Ayu Na Chata`an” i tiha nanañgga i prohimu. Umafagcha` yan `nai umadespide yan nobiaña. Gi bandaghu, umatotpe yan mana` hanau un` che`luhu para chagu na hospitat pot seriosu na chetnot.

Sige hu konsidera chetnot tautau-ta kontra i megai lokue` lumagnos siha ginen insurance hinemlo`. Haf` mohon para umasusede `an guaha fina` gotpe? Sin fondun familia `sino gobietnu siempre u fan nañgga. Makat na pinadese `nai seriosu mampos chetnot i malañgu.

Estague` un` probleman tautau-ta ni debi umasatba dibuenamente.

Para mona megai u fan hinegse seriosu na chetnot. Poresu na mauleg in` adahen maisa hamyu sa` esta hu pokate ennau na katsada. Mauleg na hu fa` hayuhu manayuyot diariu gi Saina ya ha pipetyu` lamayot patte gi karerahu.

Gi kada unu` siempre u fagcha`e lokue, “Estague` Ayu Na Chata`an”.

Gi katsadan linala`ta

Yangin man-sinsiyu ma-esgaihon mona planun adelantu para i tautau, siempre fitme ginachuchuñge ennau ni sensian espirituat yan pinasensia gi asuntun linahyan.

Lastima sa` masede che`chu` hambienteria gi sumen natata na areglun casino. Seguruyu` na tat ti fufugun manog na ora lau tiempun maipe.

Mahasñgon man-lache gi hilu` trompison ti dinanche dimas mohon de u fan lache gi dinanche. Sotta ya siha u pinila` haf` sustansian i man-sañgan.

Mahasñgon ma-upus pattisipasion publiku kasi pot matuñgu` klaru na pot dos botasion i botadot Saipan ha punu` lai casino. Dispues, mafitma lai gi halom homhum! Dios mihu na insuttu gi intellihenten publiku!

Ke na ti magahet na todu ini`ina ni atdau siempre u paguan mana`na` malumot? Finu` i Chinu, “`An para un` fan hafot, pues guadog dos hoyu; unu para guiya, i otru para hagu”. Lau ti u lache na i tatatte umasusede!

Siniñgon Hinimidde

Ha kone`yu` tatte haf` sensian hinimidde gi un` biha ni mafattu gi Ora Santa `an Dameñgo dispues de man-hanau todu i tautau. Tanoresyu` guihe na tiempu `nai hu soda` este na amku`.

Hana` fan ñgiñge`yu` dispues ilegña, “Chamu e`esun nu guahu laihu pot atrasasauyu`. Este ha` chininahu ni todu mancha yan kulot aplacha` ya tiyahu na u guaha masa` pot trahihu”.

Ha pañgun sensian yinea`se giya guahu sa` kulan parehu pinadesen mame. Era, kada pueñgen Noche Buena (pot kuattru años na tiempu) kumu tanores, ni unu limi`e matiteg chininahu sa` tinatampe ni magagun tanores. I Saina tumampe tatalo` mame gi bespiran kompliañosña. Ha komprende haf` fina`pos famaguon mamoble.

Man-hanau ham dispues para i gima` man-na`lagu kafe ya inna` chineneg sinetnen suni yan kamute antes de bai` fan deskansa. Tatfoi i didog na pineble lau ni unu maribaha minagofña gi selebrasion Noche Buena!

* * *

Tat katsada gi linala` poble tihu pokate. Estague` na taduñg halom tanu` diariu hu faposgue. Para todu mattiru, ti mañakeyu` pot para u fañaluda ni tihoñg i otru. Man-magof ham gi hilu` guinahan un` poblen guma`. Mit grasias para i mañainan mame ni kumonduse mona ha`anen mame gi halom sumen didog na chinatsaga.

I para u kuentos pot pineble, chinatsaga yan diskriminasion, na ali`e` ham ya guahu bai` leksiona ennau na prohimuhu. Ginen ennauyu` mage na katsada ya tat inetnon basula yan aplacha` tihu `rempua.

Magahet lokue` na ni unabes `nai hu ñega sumañgan haf` direchoghu ya mauleg na gaige i sinantusan na nanahu ni umataha listun sikoshu. Gi hilu` pinasensian, hinimidde yan esperansa `nai siempre un` soda` ginefsagamu. Kasse hagas hayuhu respondot sa` makat unna` famatkiluyu` gi direchoghu. Dispues haf` siña muna` atlibes i minagahet? Si Iku.