Pinadesen Eskases

Diariamiente manhanau gi bisnes-ta man-ensinahyau gi inaligau mantension familia gi halom katotse (14) años na mattirun eskases. Inipos popble kinalamten i tanu`. Kumeke fama` rekueddon Republican Party gi tautau-ta i sumasapet hit pa`gu.

Ya yahu humuñgog haf` para ineppen niha gi hu apupunta huyuñg na pinadese. Inipos oppan punta pot punta guine siha na perlas.

Yangin guaha diskuidu, pues todu che`chu` miyu guahlu (would fail) `nai los uttimu i tautau ti siña ma-aguanta (endure) i didog na pinadese. `An mattu gi este na eskalera pues siempre u finañagu ti mañgombene siha na aksion ginen i publiku! Gaige i katgu gi apaga` miyu.

Hu suspepecha na este na pinadese maplanuye para umana` popble i tanu `nai todu u fan mamadese. Ginen este na pinadese fuetsau siempre makonduse i industrian casino halom. Inipos na disonru i para umana` fan tekun i publiku pot planon casino. Este ha` solu uttimu nina` siñan niha `nai uttimoña siha i benefisiu ya i publiku poñgpuñg `ansopbla gi hilu` satge?

Dispues de fuetsau mana` popble i tanu`, sige pa`gu mañguentos na mampos didog probleman pinepble guine. Ke lau hamyu manresponsable ni futtunan i tautau. Kau guaha mas dinage dispues de todu malabidan miyu? Hamyu umesague i publiku gi hilu` miserapble na modun lina`la` ya para in` sasañgan kondision ni hamyu umafuetsas gi tautau siha?

Gi hilu` este na insuttu, manmalefa na pot katotse (14) años taya` adelantu gi linala` familia siha. Mientras tantu todu gastu deste hinemlu` yan fektos siha sige manpakpak kuetis hulu` gi mapagahes kulan tiempon feria! Lau, manmalag un` banda ya mañguentos (speech) na popble i tanu`.

Haf` defektoña este na mañan manma`gas? Dudayu` kau gueku (empty) na speech siña umaregla diskuidon niha. Lau metgot lokue` sentimientoghu na i publiku ha sentuñgu` haf` asuntoña. `An ma`hu i tautau, ni kuanto na speech pot hanom ti sinetta ma`hu estake unna` gimen! Ti mapot este na kuentas ya diariu masusesede.

Sahyan Esperansa
Hu pokate tatte finapos-ta 37 años deste ke manhalom hit petmaniente gi papa` un` relasion yan Estados Unidos De America. Guaha manmauleg na tinilaika siha. Guaha lokue` manhinegse diskuidu. Unu hu a`atan na debi ta aregla prontu: ma-abiban kuttura yan tradision tanu`. Presisu na ta pañgon tatte i hagas añgoghuyon na sahyan natibu.

I kutturata i solu sahyan esperansa gi futtunan tautau-ta. Tumestitigu deste antigu na tiempu yan pa`gu na siglu na fitme este na sahyan gi todu halom mattiru. Ginen este na galaide` `nai tasoda` adumididi` hinagoñg-ta. Sige pa`gu ta kuestiotiona haf` masusesede gi hegsu` I Deni`? Kau sige ta`lu manlosus i mansabiun Best Sunshine?

Ti mana mapot ni mansabiu numa`en ñaihon i sagradu na naftan antigu na mañaina-ta pot casino. Ta dopbla este na insuttu `nai ha emplea tautau-ta mismu para u fan mamana`gue responsablidat sudadanu. Na ti hagas sahyan kuttura yan tradision solu kompas `nai man-eyag hit echu che`chu` tautau?

Diberas! Kau tulaikayon dignun yan integredat natibu pot guaguan na sueddu yan sineyu` lache na pinetsige? Finu` man-amku` “fan egaga`” ya in` atan haf` dichu dignun yan integredat natibu!

Destrosiun Linala`ta
Oppan yan plantau didog na chetnot yan che`chu` destrosiu siha kinikilili` halom gi komunida maseha manu `nai ma-establese casino. Deste mamunu`, amot binenu (drugs) ni mana` fan imbeninau i manhoben, che`chu putaria yan destrosiun uttimu guinahan familia mañasaunau gi papa yan dadalag este na modun industria.

Silensiu manhalom este siha na destrosiu kulan finatton afnu` tasi, adumididi` sige` ha` bumula i tasi esta`i kanton unai. Gi bandan publiku, siempre u hatme salan yan apusientun familia siha. Huli`e` este siha na chinatsaga entalu` Los Angeles, Las Vegas, Reno, yan Atlantic City. `Nos kuantos sahyan (bus) `nai manunog i manginen Las Vegas. Kanton chalan `nai manmata`choñg sa` kontodu guma` niha ma-apostan ñaihon.

Hu konsidedera gi biradahu haf` mohon na tinituhon guaha gi halom ayu na batkada. Ni un` sen gi betsan niha. Mantai gima`, sahyan pat salape` para siha mismu. Malachai ma-apostan ñaihon kontodu rilos yan otru siha alahas gi tatautau niha. Tai bali tinayuyothu sa` ti ufan inayuda gi mismu diskuidon niha. Estague` na daño manfinañagu gi komunida ni umatrebi siha chumansa kosas familia gi lugat casino.

Deste antes hu atan i difirensia giya guahu kumu danderu gi bonitun hotel yan i fina` fanliheñg ni ma-ekstende gi gima` i amku` `nai pa`gu umasaguayu`. Dios tiampare na difirensia macarpet i satgen hotel. I lugathu kontodu halom bañu fache`. `An uchan, duru lokue`uchan i halom sala. Dios tiampare!

Huñgan guaha siha fumatinas manmauleg kinalamten niha ginen sensian animu gi kada pasu. Lau mayotmiente manchatsaga gi halom tautau-ta pa`gu. Estague` na tropa i mampos hana` chatsaga siñienteghu. Siña mohon tana` fan daña` hinassota yan fuetsata tumutuhon ayudu para i mayotmiente guine?