Pilean Gobietnu Siha

Sige mañgahulu` offisiatmente na`an siha kumu pilean para kandidatun primet yan segundu gobietnu. Esta i Independent yan Democrat gai kandidatu. I republican mapta` dos sa` guaha otru gai interes malagu gi papa` parehu bandera. Otru estrakadan sanhalom ni debi umasatba. Satbayun mohon pat mas ha` gi ti amtiyun na geran sanhalom?

Makat i republican na u huchum pettaña gi hilu` proteksion i matatachoñg na gobietnu solu gaige ennau gi aregloña by-laws. Sin este, debi u guaha mafanana`an “praimeri” (primary) para u guaha fotmat na disision pattida haye offisitamente kandidatun republican para gobietnu.

Este i praimeri mampos gastu yan tane` gi pattida ya sumen fotte na balan para man-yamag `sino disgrana. Haf` na mapga` inetnon fanihi gi sabana. Ileghu na kase estague` uttimu biahe na dinaña republican intaktu. U machalapon deste pa`gu gi ridun estrakadan praimeri.

John DelRosario Jr. is a former publisher of the Saipan Tribune and a former secretary of the Department of Public Lands.

Guaha gi tropa esta kalu timoña, fatigau, gamla`, naufragu, yan kansadu kakagoñgña. I tetehnan i uttimu na biba yan rinikohen balutan despedida. Unu u fanutuhun mientras i pumalu man-maliñgu kulan sague` ma`ten tasi. Lau mapede pat mangana, estague` naturat na estrakadan politika.

Planun Satbasion

Gi halom rimulinun yinilulog halom fache` aplacha` enteru iya Marianas, obligau kada unu ni dumeklara intensioña malagu para gobietnu na u esplika publikamente haf` planuña satbasion asuntun linahyan siha. Hombre neñkanu` tatnai mapapañot sin mañgañgas. Pues, parehu yan asuntun linahyan i ta sasañgan.

Haf` planun miyu pot ma-utut 25 pot sientu na pagamientun man-ritirau, kumahulu` apas insurance hinemlu` ni tat familia ti nina` gagalileg pa`gu, bira birada na hatsadan kandet yan mamamaila` na hatsadan presiun fektus siha? Debi in` eppe este yan otru siha asuntun familia gi hilu` sensian integredat (integrity) yan diberas na planun satbasion.

Yangin para in` pinu` “biba” yan otru siha eskusu, nahoñg na pinadese esta gi tautau. Klaru na planun satbasion mananañga pa`gu. Na la agañg fan finu` miyu kosake todus u mahuñgog kau akseptau hinasson miyu fuera ke in` ta`lon muna` mamtu` hagas dinage siha deste alacha.

Achu` gi kanton tasi

Gi santatte na patte giya Pagan, guaha `nos kuantos man-loka` achu` gi kanton tanu`. Deste antigun na tiempu pinanag mattirun lañgat `nai adumididi` tinipa ya sige dumalalai. Un` dia siempre u basnag halom gi tasi gigon linachai` pisuña gi troñku.

Taiguine finapos maseha haye na kabayerun politika. `An ti sen mauleg disposision-mu, siempre adumididi` matgan i inai siha gi pisun adeñgmu. Sige poduñg adumididi` estake poduñg hau gi tohgemu. Naturat na pañgpañg mañglu` gi halom lañgat diskuidu.

Esta namatman sa` hanom fumofuñg ayu na achu` lau tinemba `nai tinipa todu inaiña gi fondu. Naturat na sinisede kontodu finapos tautau.

Parehu yan un` hagas masegat na lahe ni adumididi` maliñgu sensin tatautauña piot `nai sige umamku`. Naturat un` tinilaika na ti siña tachoma`.

Dispues de todu, taya` sosobla fuera ke bailan fayao pot para un` huchum i uttimu pahinan leblomu publikamente.

Otru asunto`ta siha

Esta i amiguhu monhayan ha aregla kalendariuña sentada yan gimen ni para umaplanta ni pattida siha. Mampos magof sa` eleksion gobietnu na sakan `nai mas paire i plantadan boka yan kantidan gimen. “Haspog-yu` ta`lu pot siete mesis na tiempu!” Dios mihu!
n n n

Umasuda`yu` yan un` botadot ni umeyag man-laime kandidatu. “Haye malagu` ni botuhu, pega papa` paradaña ya ta akompara yan otru siha kandidatu”. Esta hana` matmanyu` kau taiguine pa`gu politikan i tanu`. Pot fabot!

n n n

Sige dos amigu gumimen gi pantalan Susupe. `Nai esta kulan maipe, ha yute`gue` i unu para una` freskun ñaihongue`. Gi kinakulo`ña, ha lagnos petnan manog ya sige ha ñgagas. Finaisen ni amiguña manu `nai masuettegue` chesaña. Ilegña, “Duru mangupot guihe papa`”.

`Nai ha yute`gue` amiguña, ha fagcha`e natata na lugat ni mi-achu`. Ensegidas ha birague` hulu` mayamag todu mataña. Finaisen haf` masusede, ilegña, “Lapekaras pare todu esta man-bulachu”. Ai, chatkatkula ni lugat.

n n n

Tres man-bachet yan tañga man-masoda` gi fihon un` tautau ni mapunu`. Man-mafaisen ni polisia kau siha pumunu` i tautau, ensegidas man-man-oppe, “Yes, yes, yes!”

Man-mafaisen haf` na mapunu` i prohimu, man-man-oppe ta`lu, “For twenty-five cents for twenty-five cents”.

Ilegña i polisia na debi u fan mapresu ensegidas. Mayagai siha ta`lu, “The sooner the better, the sooner the better”. Man-makotma lau dispues man-dinispensa ni kotte pot probleman niha.

n n n

Humalom un` faye gi sagan soba `nai umafagcha` yan amiguña ni ha didibi mauleg na kantida. Kahulu` i amiguña malag i chikoñke` ya ha dandan, “Kau un` hahassu ha`yu`”. Chumaleg i prohimu. Kahulu` dispues ya ha yemi`, “Kau un` susuñgun ha`yu`”. Tapbla.

Galagun Guma`

Este galagun guma` mauleg na guatdia yan paire na amigun familia. Guaha `nai humauhau `an guaha otru galagu gi oriya. `Sino, umesalau para u fan espanta ni man-malolofan ni ti tautau guma`. Gigon humuyuñg hau, ha chaole dadalagña ya finanu`e hau na fietgue` gi familia.

Guaha na esalauña pot ga`ga`, guaha lokue` pot tautau gi oriya. Ti parehu modun hauhauña entre otru galagu yan tautau gi oriya. Aguaguat mampos esalalauña. Señat na mauleg un` rikonose kau guaha bisita `sino ti mauleg na muron umuririya.