Para haye i adelantu?

Sessu hu faisen maisayu` pot kuestion adelantu: Para Haye? Pot ihemplo, sige mana`en ñaihon i mas primera siha na kanton unai para hotel. I chumoneg ennau na disision ya monana pot adelantun ekonomia. Ya hafa na adelantu para i natibu?

Guiya ayu siha na kanton tasi `nai sessu i natibu pumeskan fisga, chenchulu, talaya yan panag antes. Tinilaika este na kutturata ni antala` tatautau siha gi hilu` unai. Esta man-maprohibe hit man-hihot pot bisita i man-gaige guennau na lugat pa`gu.

Esta ti man-obra hit man-peska `sino kumilili` atiluñg la`uyata guatu gi kanton tasi. Guaha lugat `nai sessu ham man-epañglau. Pa`gu lugat kareta yan tinanom flores ni man-madispoñga kada dos semana. Lau hagas lugat peskan pañglau.

Mahatsa hotel siha `nai kometsiante mamatinas ganansia. Ayu ha pegaye hit i fina` kontribusion tax. Dispues ha umpañg kantidan keblen niha ya mana` hanau tatte gi tano` niha. I umestotobayu` i petmanente madisplantu modun linala` natibu pot suspichosu na adelantu. Gaige giya siha ennau na adelantu, `an sopblan poñgpuñg pan patte-ta.

Ginen este na finaposta mohon u guaha kabales na ininan todu planu yan kau enfin diberas i adelantu pat para siha lamayot patte. Ga`oghu katdun pañglau yan tininon guihan ke `antala` tatautau bisita gi hilu` unai. Hokog mames probechun natibu!

Poñgpuñg Adelantu

I lugat kanton tasi malimitte pa`gu giya Paupau, dididi` Puntan Muchot, Inai iya Oleai yan `nos kuantos lugat gi santatte. I impottansiaña kanton tasi i dinaña familia yan dididi` fina` peska. Man-libre famaguon isla man-o`mag gi tasi sa` patte i tasi ti tano` niha. Ha pañgon hihot na dinaña familia `nai masimientu mas inagofli`e giya hita.

Mas paire i dinaña `an guaha peskadot `sino talayeru gi tropa. Mofona humuyuñg man-rikonose ya `nai suette todu umaprubecha kau kelaguen tiau pat satmonitiyun yan tarakitiyun. Piot ya mana` pikaka i kelaguen ni doni` sali. Debi u fan pinalai todu! I natibu metgot na talin pogse` sumustetene deste antes. Dinaña i fitme na haligen yan pisun natibu.

Nesessariu Planu

Pot mas ke 20 años tatnai hu li`e mafotman kabales estudiau na planun adelantu. Poresu, todu kinalamten masaulag supin tasi. `Nai todu lache sige man-afaisen man-sabiun I Deni` hafa guaha. Sessu kumefalagnos gi sikoshu na kalu i totniyon redan san-mena. Lau haf` taimanu na ni unu ume`ekuñgog. Kada kuat konsu hinassoña ni mafañagu gi hilu` supin tasi.

Gi hilu` supin tasi taya` ha sedi fuerake para ta falague tatte manu `nai masge che`cho`ta para tafan e`suette puede dinanche. Gi `nai seriosu asuntun linahyan, magahet na supin tasi na eskalera `nai para umatrata? Haf` na man-ma`añau hit fotmat yan estudiau na planu? Gi finu` liñguahen “computer”, trash in trash out. Basula ke basula che`cho`ta pues basula lokue` uttimo-ta.

Pot para ta komprende: Iya Guam ha deklara 24 pot sientu na adelantu gi ekonomiaña. Iya Marianas parehu figura lau atlibes—disadelantu! Naturat sa` iya Guam gai planu, hita ni papet komun. Manu i ginacha` ayu ha` `nai poduñg sin konsiderasion gi linala` i mas man-chatsaga. Dios mihu na diskuidu!

Finu` kantan tradision

Ayu na kanta-ta “Ti Gi Un` Palasyon I Riku” bonito na sunidu pot o`perlas iya Marianas. Paire parehu ha` i sustansiau na palabra yan dobladan sotfa.

Ilelegña patte, “Ya ti siña hu tulaika sa` tat mas gefsaga, kumu ayu siha na islas i Islas Marianas”. Yangin appuntau pat ma-elihe hau na offisiat publiku mauleg un` sessu kumanta este na sunidu. Siña kasse pinañgon hinassomu haf` sustansian tautau-mu guine siha na islas.

Estague` na tanu` i halom gima`ta, ahe ti siña tana` parehu yan otru lugat siha. Ni kuantu tiempu un` diñgu siempre un` bira hau mage entre tatautau-mu enteru `sino espiritu-mu. Hombre i galagu `an matai todu i tiempu ha fafana` ayu na lugat `nai mafañagu.

Chalan iya hame

Sessu antes i defuntu Digu` ha kanta “Bendise chalan iya hame…sa esta ti bai birayu` mage….” Ti hu tuñgu` i finagpo`ña ayu na kanta ya sessu hu kepula` hafa ilelegña.

Kau hinanau pot umakamu` ya ha diñgu gima` mañainaña pat finatai? Kasse umafagcha` gi dos fina`pos `sino hinanau sumendalu ya tiha tuñgu` kau u birague` tatte lalala`.

Magahet na kada na tiempu hu kanta este na sunidu hu hahassu i chalan iya hame antes. Bendidu i lugat hagas guma`. Ti hoñgiyon na disposision gi un` riku na lugat `nai man-mafañagu ham todus. Hagas hu tuñgu` bai` gu`ot pot interes todu.