`Nai Añglu’ I Kahan Publiku

Kada ratu hit man-ñgaha’ hulu’ gi lañget na u uchan maseha dididi’ sa’ mampos i tanu’ añglu’ ya tat tinanom ti sineñge ni figan somnag.

Estague’ na estau lokue’ ‘nai man-gaige hit na tiempu. Kada ratu marikonose i kahan publiku kuantu humalom diariu para umalie’ kau hafa mas na dibi para u fan ma-apase. Fuera de ennau, i kuentas: kau nahoñg para pagamienton empleau.

Esta man-fatigau i man-sabiu siha gi hegsu’ i Deni na siña ha’ man-hinedan (tailaye na chetnot) kanset kabesa. Lau man-animu hombre mampos man-silensiu gi maneñgheñg na offisinan niha.

Hokog mames i bonitun kotbata. Taya’ sosobla fuera ke para tafan madage mas gi hilu hagas pasadu na dinage deste alacha.
Pagu mas `nai klaru na ti mana’ siña i che’chu’ linahyan. Esta i mañan niha man-matulaika ya kada ratu mapega dadalag doli gi entalu’ chachaga’ niha.

Finu’ Magoo, “Pues ennau na mampos man-hedu gi halom linahyan”.  Makat na kontrariu i sige ha’ mumenos mas i kontribusion tax mientras sige hulu’ i gaston obligasion gi todu atmos banda–gobietnu yan familia. Mauleg umalamse macheten niha.

* * *

I obligasion administrasion yan lehislatura i para u asegura satton na uson fondun publiku gi kaha ‘sino hafa pagu humahalom na kontribusion tax.

Klaru na mampos maribaha i kontribusion ‘nai sige i bisnis mahuchum pettan niha. Gigon mana’ suha apas empleau, kanaha’ taya’ sobla para setbisiun publiku.

Kumeke ilegña este na señat na debi u guaha disision ma-utut numeron empleau. Para hafa manadan empleau ‘nai taya’ setbisiu para umaprebeniye i publiku. Makat na asuntu lau estague’ ‘nai humahalom obligau na disision gi gaston fondun publiku.

Esta makat ta atotga i asuntu sa’ mampos chaleg i kinalamten ekonomiata.

* * *

Entre mampos ñañgon ‘sino man-triste i tautau siha gi señgsoñg kulan mohon guaha mabebela. Komprendiyon sa’ lamegai esta man-yayas hinasson niha pot satbasion familia gi sige ha’ dumidog na mattiempu.

Ilegna i amiguhu Magoo na muñgayu’ muna’ faliñgu esperansaghu sa’ siempre i Saina u na’fatu ausiliu para i kinilu siha gi todu atmos bandan pastahe.

Hu konsidera un’ ratu finoña ya magahet na gai sustansia i para tana’ guaha inañgoghu gi che’chu’ i Saina piot gi oran didog na pinadese. Estague pagu na eskalera solu satbasionta.

Ha sañgane-yu’ finaposña ‘nai sumen chatsaga-gue’ un’ tiempu sa’ taiche’chu’.. “Tat koyentura ti hu bira, tat potta ti hu dakot pot ayudu ya esta umetaimamahlau-yu’ para baina chochu i lahihu”. Kabales na sensian saina pot nesessidat pagoña.

Sige tatte para gima’ lau gaige ha’ gi hinasoghu i sumen a’gañg na fina’ silensiun i tautau siha gi señgsoñg. Tiempon ha’ilas mina mampos silensiu i tanu’.

* * *

Hiniyoñg bapot para Isla

‘Nai estudianteyu’ gi eskuelan Chalan Kanoa, sessu sumaunauyu’ gi Chiko’ dumespide hiniyoñg bapot para “Isla”–sankatan na tanu’ siha.

Ai na nina’ mahalañg ayu na businan bapot dispues ‘nai masotta i tali ya sige huyuñg gi sagua’ Tanapag. Masusesede este gigon bakasion ‘sino antes de mababan eskuelan publiku.

Hu sen agradese i biradan ayu na bapot sa’ bulan naturat na neñgkanu tanu’ man-machuchule’ magi ginen Alamagan, Pagan yan Agrighan.

Un’ tuñgu’ ha’ haye estudianten ginen hilu’ sa’ man-chatgun pot mali’e nuebu na fina’ siuda. Gi halom lalahe, ti mapot un’ soda’ sa’ makachet siha sumen potput na pumadan Menuma’ ya ma-alifog gapotilun niha kulan si Elvis Presley lau megaiña ti man-kakanta. Lau estaya bula pumada yan alifog kulan krestan gayun hatsadu.

Hana’ hahassuyu’ este na modu ‘nai pagu paire i grupon Beatles. Adahe para un’ mayute’ ni nobia pot sapatus Beatles ni ha u’usa i paire ginen Guam. De dios na putin chetnot ayu piot ya taya’ fina’ fiñkas para un’ famahan un’ pat kosake siña un’ kone’ tatte si neni.

Lau unu na okasion hu sen-atetuye guihe na tiempu: i grasiosiu siha na estorian man-amko’ta ‘an man-daña yan i man-ginen katan na mañainata. Duru i chaleg mientras duru lokue’ mafatinas man-paire siha na sentada para amotsan taloa’ne.

Guaha guihe na tiempu mafanana’an talin halaihai–fina’ konbetsason siha–‘nai sige mabati hafa masusesede. Este siha na konbetsasion kontodu che’chu’ imbusteru tat kumu haye gai haga mana’ mapotge’, haye kumeke akamu, kineni’ sagun atulai yan otru siha asuntu. Gigon guaha nuebu, duruyu’ lokue’ hu bati gi halom man-gachoñg kulan mohon ma-apapaseyu’ para bai’ fan ripot.

Guiya lokue’ este na tiempu ‘nai man-hoben ni man-tai keble, siempre umanañga i man-ega’ siha mubi (movie) para umaketuñgu hafa masusede. Adahe ayu na oran estoria sa’ todu man-e’ekunngo pot si John Wayne yan Festus. Hagu un’ batte estoriamu mismu. Dispues de manadan estoria, esta ti parehu i masusede yan man-sañgan siha.

Sumen paire lokue’ ayu na patte ‘nai umachiku i starring yan i nobia. Esta nina’ fan tañga pot makeke ekuñgog taimanu ‘nai umachiku i dos tautau. A`Saina!

John DelRosario Jr. is a former publisher of the Saipan Tribune and a former secretary of the Department of Public Lands.