Misteriun Numeru Tres

Gi pa`gu na semanan kuaresma sige hu dibina i misteriun numeru tres. Era, gaige este na asuntu gi finu` i Saina gi siñku na man-apostoles `nai ha sañgane si San Pedro na antes de u kate mina` tres biahe i gayu siempre niñega-gue.

`Nai man-mattu i sindalu para umakone` si Jesukristo ha ñega si San Pedro na ha tuñgu` i Saina.

Dispues de ma-entrega i Saina guatu gi as Ponsiu Pilatu, ha huñgog si San Pedro katen gayu. Ha hassu i finu` i Saina.

Petsonatmiente, hu tutuhun umakanteha pot miseriun numeru tres. Señat santu kilu`us: ginen I Tata, Lahiña yan Espiritu Santo. Tres man-maklaba gi kilu`us kontodu I Sainata. Dispues de mina` tres biahe ni hafaisen si Yuus Tata haf` “na un`chogue-yu` taiguine” umachigu`. Mahafut ya luma`la` ta`lu gi mina` tres dias.

In` hassu i tres rai ni bumisita i niñu giya Bilen? Dispues de madandan i mina` tres na atban guma` Yuus matutuhun i santa misa. I tautau malofan gi tres eskalera: mafañagu, luma`la` dispues matai.

Tatnai in` repara na `an matai uno tinatitiye ni dos? Tres klasen Chamorro guaha: Matao, Acha`ot yan Mamahlao. Gaigeyu` gi uttimu na tropa!

Dinaña` Isla: I ma-abiban kuttura yan tradision tautau isla gi enteru iya Pasifiku mas lachok gi hatdin tanu` natibu.

I mas dañkulu na animu i para umatulaika pinegan nasion siha ni fumuñut modun linala` tautau isla siha.

Apmam na tiempu mapoñga i tautau isla nu ayu na hinassu i tisiña luma`la` ni siha ha` namaisa. Lau hagas man-la`la` i antigu na mañainata amtau na hinanau sin estotbu ginen hiyuñg.

Na`magof na kinalamten `nai adumididi` sige matulaika hagas mapoñga na hinassu na ti man-siña hit sin siha. No señor! Pot prueba, atan tatte finapos antigu na mañainata pot konfitmasion na hagas mansiña giya hita namaisa.

Fina` Lanchu: Hu soda` i tihu-hu pa`gu humalum ginen tumalaya. Hana`e-yu` kelaguen-hu tiau yan satmonetiyun. Hasañgane-yu` para bai susugu` gi lanchu gi lapupueñge.

Gi finatoghu halum, pa`gu hapula` i gapet gi adeñgña ginen munatunog tuba. Ha pastu i guaka yan sakatiye i chiba. Ha kamyu `nos kuantos niyog ya hana` fañochu i babue yan manog. Ayu dispues `nai mata`chuñg ham umatane`.

Hahatsa tininuña siha ginen i feggun yan saibog dagu. Hu ñgelu` ñaihon kau guaha palao`an umayudadaye. Lau guiya mismu chumogue todu antes de u hanau tumalaya.

Mina` chettun-yu` nu guiya pot pas yan yan katma disposisioña siha diariu. Tatnai huli`e kinaulo`guan. Felis yan magof gi ha`aniña. Ha agradesi yan ha guatdia impottansian inafamauleg. Dispues, kabales yan mauleg fuminu` Chamorro.

Kulan mahalañg ñaihon `nai ha sañgan i fiet na ayudun asaguaña antes de u madispone. “Desde primet pusuelun kafe `an oga`an esta i oran sena ni unabes `nai fatta nesessidat-hu”.

Sige mona, huli`e na hana` sahñgiye-yu` teñguañ-hu gi fina` balutan hagun choda ya ha pega gi kareta-hu, silensiu. Dispues sige ham umestoria pot fina`pos parentela yan tautau-ta siha.

Guiya muna` komprende-yu` haf` kutturan natibu. “I tanu` magualu`e, i tasi peskan totche, dos pisu ni sumusteni i natibu.” Ha afuetsas-yu` umakanteha haf` sustansian fino`ña ni sumen magahet.

Sige mona mumalañgu i amku` palu pot idatña. Hu sen agradesi fino`ña siha yan ma`ug na akonsehu. Bes enkuando mafattu gi hinasog-hu i mauleg na sensian un` saina. Si Yuus Maase` tihu-hu!

Neñkanu`: Dos estudiu masoda` parehu haf` tumututuhun seriosu siha na chetnot gi tautau.

Gaige i problema gi tres klasen na`yen neñkanu` gi todu malataye na totche. Ha inklusu corned beef, spam, satdinas, yan todu otru latan totche.

Mauleg in` adahe haf` in` prepararaye familia desde amot oga`an yan talo`ane yan fina` sena. Mientras mas in` nasetbi fresku na totche mas mauleg para i hinemlu` familia.

Kuttura: Hu e`ekuñgog untat Francisco B. Rabon ha esplika manu `nai ha chule` kantan Chamorro esalau (chant). Ilegña na ha ekuñog finu` Australasian ya ginen Taiwan yan Mongolia `nai ha lagnos kantan esalau gi Chamorro.

Inipus gueku i fino`ña pot mampus chagu` kutturan iya Taiwan yan Mongolia kontra Chamorro. Anog na ha fabrika ayu na modun kanta sin establisau na huñgan gai tinatte kumu patte gi estorian natibu.

Lau manu gi estorian Chamorro `nai gaige añklan kantan esalau (chant)? Manu gi entalu` Taiwan yan Mongolia `nai humuyuñg i Chamorro? Enfin, haye gi entre dos gai kuttura kantan esalau?

Finu` Chamorro: Kumu guaha dinidahu finu` Chamorro, usu pat palabra, sessu hu appela-yu` gi tiuhu as Tom Mendiola pot sumen mauleg gi liñguahita. Rason na hu konsusutta sa` guaha siha `nai huhuñgog palabra ni taya` gi fino`ta lau ma-atrebi siha gi usuña pot inosienteria. Maulegña mamaisen ya dinanche ke linaisen pot atotgante gi lache na finabrikan palabra.