Minamahlau Kontra Marianas

Maripot gi gaseta ma-arrestan i MV Luta gi mapos na semana, i akusu ginen untat Takahasi Yamamoto na mafababague` ni salapeña $3.4 miyon pesus.

Malista gi kehan kotten federat si Biktot Hokog, Bill Toelkes konsuttadotña, Fidel yan Adelina Mendiola yan famaguon niha, i batku mismu yan kompanian MV Luta Mermaid.

Mamahlau-yu` ni ripot gaseta pot finababa ni fumatta na tanu` saki` iya Marianas gi kometsianten ginen hiyuñg siha. Dispues para ta pañot i minamahlau `an tafana` otru siha mandañkulu na kometsianten?

Kontodu inañgoghu gi reputasion iya Marianas maliñgu sa` hinafut ni maripot na finababa kontra as Señot Yamamoto ginen Japon.

Ha pañgun kuestion i kehan Yamamoto tat kumu haye gi halum defendante mañuli` ginen $3.4 miyon pesus na salape`? Kuantu kada unu ha chuli` yan manu `nai magasta? Yangin u fan masoda man-isau kau guaha salape` niha para uma-apase tatte gi Yamamoto?

Dispues, sen timana` tuñgu` si Yamamoto na guaha $400,000 pesus para i batku. Haf` na mana`na` este na asuntu kontra i prohimu? Na ti mañisiha gi kompania?

Ai na lamug balutan ya siempre umachalapun publikamiente ginen halum kotte chatdisposision i $3.4 miyon pesus. Ai, tatnai in` hiñgog pot estorian atuli? Kau ti man-tinitinu hamyu pa`gu pot in` gulusuni sin in` rikonose pot ti a`asu?

Kutturan natibu

Sessu man-atotpi hit diniskutin kuttura. Lau haf` na kuttura ta sasañgan kau tradision pat modenu? Debi ta distiñgi kabales manu ta diskukuti. I tradision tineteka peska yan fangualuan. I modetnu `nai ta diñgu i hagas tradision ya ta mueba hit para i moseria.

Desde tatutuhun gi moseria dañkulu na tinilaika fumatoigue hit kumu natibu. Mas anchu na appottunidat edukasion ni prumepara tautau-ta para nuebu siha na offisiu. Mas libianu mangana ginen moseria ke todu dia gi papa` somnag gi gualu` `sino halum napu.

Ta embrasa finattun yan pinegan i Amerikanu guine ni ta usuni kumu modun linala`ta. Gi sisteman ekonomia ni ha batsala halum tai programan para umana` fitme linala` tradision. Ni mismu Amerikanu tiha komprende haf` masusedi dispues gi pinigaña guine.

I modetnu na modelun ekonomia sumen chagu` yan dibutsiau kontra linala` tradision. Gi halum este na rimulinu sige hit man-aronsada kulan dinagau lañgat gi halum taduñg tasi. Gi hilu` este ta aksepta haf` mattu kontodu industrian turista. Mamaisa pa`gu este na pisun ekonomia. Guaha `nai in` atan haf` para ta padesi `an lotgun este na industria gi ge`fena?

Hu aksepta finapus antigu na mañaina-ta. Ti bai malefa mananum pat mamogsai sa` patte este hu fagcha`e gi hinibenhu. Lamegai lokue` biniran i tiempu gi gustu esta la disgustun halum kinalamten familia. Modetnu na modun linala` lau tai finagpu` i obligasion siha tat kumu apas bañku pot guma`, kareta, yan hinemlu`.

Layag sumahñge: Animu i dos saina pumogsai famaguon niha pot preparasion `an madiñgu un` dia i pettan sanmena. Siña masatban maisa siha desde che`chu` halum guma esta manu `nai masoda` offisiun niha.

Sumen namagof `an felis hinanau niha. Ti chathinassu i saina kau u famadesi. Huñgan, guaha gi tropa ti mana`e parehu nina` siña taimanu i pumalu. Estague` na patgon sessu ta bisita pot para ta asegura na felis lokue` hinanauña i prohimu(ma).

Dispues, kada unu hahatsa layagña ya sige huyuñg gi rubentason mafanana`an ni mañaina-ta “sumahñge”. Lau sattun lokue` rinikonosen finapus todu. Guaha `nai hagacha` hit mahalañg lau otdinariu na pañgpañg napun linala`.

Sige mona, mangai famaguon (nietu yan nieta) ni ta trata kumu flores-ta gi hatdin ha`anita. Mañaunau ta`lu manmamulan nu siha. Lau lamayot patte gaige esti na obligasion gi dos saina.

Destrosiun kuttura

Dikiki` komunidat iya Marianas. Lau i fuetsan tinilaika mampus metgot. Maseha animosu i natibu kume gu`ot kutturaña, manmetgot siha na asuntu gumagaput haf` gaige gi kustumbre-ta.

Esta ha` lamegai man-inaminasa usun amut binenu, pinadesin baratu na sueddu yan mamamaila` lokue` destrosiun casino. Este i tres na attikulu, yangin tita guatdia mauleg, siempre ha destrosia petmanente kutturan i tanu`. Man-naufragu hit gi mismu tano`ta. Naufragu kumeke ilegña pasaherun mapua na batku ni man-`e`esuette ausiliu gi kantut kantit.

Olara mohon ya tasoda` sensian hinimiddi gi korason-ta para ta akanteha sumuheta bisiun destrosiu giya hita mismu.

Usun amut binenu, che`chu` puttaria, fuetsau na pinepble pot diskuidun kabisiyu, seriosu na che`chu` kriminat yan nanan todu babarias—casino. Mauleg ta atan kritikatmiente este siha na chinatsaga antes de u sala` i asuntu.

Lokue`, hita mismu umisasague sinistenen kuttura gi atlibes na aksion siha dispues de palabran sattun na inadiñgan. Palabra de chispas uttimoña. Ta sañgane famaguon-ta na u fan finu` Chamorro mientras ta adiñgañgane siha gi finu` Eñglis. Taigue klaru na kinimiti gi este na patte i kada ratu ta hogsin maisa hit sino ta aka` hila`ta!

Mauleg kasi ta deskansaye pot para tali`e manu `nai sessu hit man-fatsu.

Hinemlu` tautau-ta

Para mona, sessu siempre man-afulu` hit yan chenot daibites, korason yan kanset. Ni unu gi entre tres ñahlalañg na chenot ya makat para todus.

Namanman na esta kuarenta años desde ke nina` arapatu` i natibu chenot daibitis, korason yan todu klasen kanset. Kulan mohon pa`gu mañgahuhulu` hit gi kantun tasi pot hinasa boti-ta ya i kantun unai `nai haparada hit.

I daibitis layeye gaige gi modun linala`ta ni tineteka magulusunen neñkanu`, usun fina` mames desde gimen yan otru siha ni sessu ta offisiona diariu. Ta atisa este `an man-galileg hit gi menan i television `nai mas ta sumuke hit mas fina` mames. Dios tiampare!

Patte lokue` i kustumbren yomug `nai tapo`lu na mauleg `an mas ridondu fasuta yan oriyan sintura-ta. Kumu ha` mali`e antes namayaye hau masoyu` na un` usune chumochu sa` kulan malañgu hau. Haf` ti tafan ridodondu estake hana` fan lalañgu hit i chenot daibitis. Mauleg hita mismu ta repara moduta diariu.