Mattirun Tiempu

Megai besis na tiempu `nai ha fagcha`e hit tai sinahguan i kanastran esperansa. Fuera de ma`te i tasin inañguho-ta, megaiña na lugat man-añglu` ya inatisa paumata` i bendabat mañglu`.

Todu klasen atte yan laime ta chage umestira haf` tetehnan gi pottanmonedan familia. Ni taimanu na atlibesta i kantida parehu tutat—seru!

Gi mismu sakudida, i sueddota tatnai kahulu` pot 20 años na tiempu. Taimanu tana` nahuñge obligasion familia ni linimus ni todu klasen hatsada gi bandan nesessidat? Na ti pot este na problema muna` mampos didog na sapet gi halom todu familia guine?

Enfin, man-mañoda` tampen sinetnan gi hechuran lai casino. Kulan mohon satbasion lau hombre ni este ti kunibre i mas ke $1.2 biyon pesus na dibin gobietnu pa`gu. Dispues, haf` na todu fondun casino lamayot patte para programan man-ritirau? Ya hafa pot nesessidat edukasion, hinemlu` yan proteksion i tautau siha gi señgsoñg?

Kasse hihihot i tiempu `nai u kahulu` i atdau gi sanlagu. `An masusede pues aregla hamyu sa` guaha un` ira yan destrosiu para u fatoigue hit. Este na munton chinatsaga rekueddon i mansabiun hegsu` I Deni`. No siakassu kau mamadedese i publiku kontat ke maresisibe $60-mit esta $90-mit gi sakan. Haf` ti u fan kayus umupus i didog na pinadesen i publiku ni finañagon diskuidun niha!

Gi puntan tasi
Maseha maya` i buttu siha gi puntan tasi, gaige guennau manfitme siha na kometsiante ni siña tumulaika kinalamten tano`ta. Yangin ta sedi manhalom, libianu hinanauta dispues de tres años `nai sige humalom fondu siha para ta kubre mas manpresisu na nesessidatta.

Enfin, ha nesessita este na bisnis man-dañkulu man-estudiau yan eksperiensiau gi che`chu kada bisnis ni para tana` halom. Todu pakete u fan ma-esplika pot para u guaha kinemprende gi anaku` na benefisiu gi tautau i hinalom petmanente na añklan ekonomia guine. Estagu` ta nesessita pa`gu.

Dimasiau na diskuidu ginen mansabiun i hegsu` I Deni` pot siete años na tiempu. Poresu na didog na te`ug na pinadese gi todu familia guine!

Katman yan silensiu
Sige amiguhu Muron umensinahyau sin direksion. `Nai dumeskansan ñaihon hu faisen hafa guaha. Ha tanchu` papa` i aniñeñgña. Era ma`añau pot tinatitiye maseha manugue` guatu.

Ilegña i prohimu na ha taitai tinige`hu pot lastron deñgdeñg ya tiyaña haf` piniloña gi santatte. Sige ham dispues kumonbetsasion. Hu sañgane para u falag un` silensiu na patte giya siha ya una` katman ñaihon hinassoña. Ha faisenyu` haf` kumeke ileghu estake ha huñgog guinaifen silensiu?

Hu esplika na i tasi `an katma kulan laña. Kontodu ininan kalulot pulan siña un` li`e `an chatagmag. I guinaifen mañglu, suabe. Esta siña un` huñgog i mañglu` ni gumagapot i hagun niyog yan gagu. Silensiu yan katma i lugat. “Este na katma yan silensiu debi un` pega gi hinassomu diariu”.

Eyag muna` pas hinassomu kosake siña un` timon galaide`mu gi halom chubasku. Entrega inañgoghomu gi Saina diariu. Hafa na gi finatinas un` botin hayu siña kumarera gi halom taduñg tasi dispues kulan mafa` chalane? Guaha `nai in` hassu este?

Didog na triniste
Ginen un` tiempu sumen ma`gas. Pa`gu, parehu galun mame otdinariu na sudadanu. Lau ha chu`otyu` i huli`e kulan didog na hinassu `sino sinetsut gi mataña `nai ha a`atan hulu` hegsu` Tagpochau antes de u ma`udai gi batkon aire. Magpu` i nobena, lisayu kontodu misan tatte `nai mamaisa ha` i prohimu.

Magahet na hana` ma`ase`yu` sa` magof na matan tautau otdinariamente antes. Taigue esta ayu na minagof gi mataña. Kulan sessu pa`gu ginacha` didog hinassu. Kau sinetsut? Po`lu tasede i prohimu ya u o`mag fresku gi halom katman sadog hinassoña. Hu diseseha lokue` na ti u famadese minaipen tautau sa` estague` na kastigu i mas makat.

Hu diseseha pas para i prohimu pot guiya solamismu u fanna`e kuenta gi malabidaña! Guaha siha otru man-mamatcha hihot gi tateña. Adahe pinakat miyu sa` palagse i katsada!

Maliñgun kustumbre
Hana` chatsagayu` i hinanau hagas lancheru siha guine. Teñga `an hu bisita guaha fina` mañge` na neñgkanu` natibu esta maprepara para bisita. Mana` amotsa `sino miriendayu`. Gigon hu kaikaiyu` para bai hanau, mana`eyu` fina` gulusina, golai, agu`un haya pat tinala` guihan yan katne para i mañainahu.

Taigue esta este na kustumbre kulan mohon machule` hanau ni uttimu mañainata ni umusune man-gualu` antes. Hu sen agradese ayu na kustumbre pot un` rason: Bendision ginen ayu siha na man-amko`ta yan sensian gineftau ginen i gualu`. Todu i tiempu i kusinan niha a`asu. Gigon fresku dispues de talo`ane, ha bira siha i dos amku` tatte gi hatdin manrimpesa `sino mananum.

Maliñgu este na modun linala` natibu kontodu i bendision ginen i man-mofo`na. Si Yuus u fan binendise pot todu i konkariñu yan gineftau miyu.