Mattirun Pagyu Saipan

Ni NOAA—ahensian federat ni timatitiye mattiempu—makat ha danche haf` fuetsan Typhoon Soudelor gi mapos na semana.

Magahet na namatman i kinatmaña mientras hafalalague i tanu` estake ha mulinu todu i hasoda` gi pueñgen Dameñgo, Agustu dia 2.

Ha chaflileg yan fugu` dos fitme na troñku gi menan guma`. Ayu `nai huhuchom i petta ya manayuyot-yu`. Pot primet biahe luhan-yu` pot finatton pagyu.

Gi sigiente dia haf` na dinanche Saipan atomic bomb. Manadan troñkun gagu yan telefon manchinaflulon, binegbog yan hinilog. Megai numanañga propiu infotmasion ginen hegsu imperadot I Deni`. Inipos silensiu na megai dumiside asuntu siha gi kaprechun niha.

Anog na tai ekspiriensia i segundu paire gi che`chu` gotpe gi bandan linahyan. Hokog esperansa. Ni hanom taya` gi señgsoñg siete dias dispues de pagyu. Guam, todu mañgalamten hanomña gi mina` tres dias. Dios mihu!

Tiempun Kasko
Sige manadiñgan bisita siha gi lamasan fina` gupot pot chinatsagan niha. I kuestion kau guaha mancho`gue ni manma`gasta hegsu imperiadot I Deni para uma-ataha i mas chafleg na pinadesen familia gi enteru iya Marianas?

I ineppe ti ma-annunsia lau todu tumuñgu` i oppan na pinadesen mayotmente. Guaha mamaisen kau para u guaha na sakan ta`lu ayudun apas para kuentan niha gi CUC. Ni unu umoppe i kuestion kasi pot dañkulu dinida na umasusede pot esta magpu` i eleksion.

Ilegña un` prohimu, “Mauleg umana` guaha eleksion kada sakan puede suette”. Lau fana`an kontodu i manlagnos fufugu sa` kara` na biahe.

I otru ilegña na mauleg umafaisen i tropan casino mas kontribusion. Kasi ni este na grupu ti u mueba kalañgke`ña na biahe. Mattu gi kulan fugon pagyu.

Gi mismu tiempu menos i monedan iya Marianas ni hinehegse miyon pot miyon na dibi yan obligasion. Inipos maribaha hinalom aduana mina` mampos mansilensiu yan homhum i lañget I Deni`. Kontodu luseru taigue gi sagaña `an chatagmag.

Menos Aduana: Komprendiyon haf` na manambarambau hinasso-ta pot mampos kasko i kahan iya Marianas. Kumeke ilegña mas megai obligasion ke haf` humahalom na aduana gi tresureru.

Dos sinisede muna` tailaye i hagas homlu` na moneda-ta. I unu maliñgu gi santatte petmanente, i otru gaige ha` na ume`enañgga propiu disposision.

Anog namase` ekonomian un` popble na grupon perlas siha guine. Gigon lache na disposision ensegidas mapuha. `Nai sumalamañka ha hala todu papa` ya ha rastra gi hilu` kaskau sin ditension.

Mampos paska pisun ekonomia-ta. Presisu ta estudian ñaihon taimanu` para ta katsun maisa hit petmanente gi fiñkas ginen hiyuñg. Yangin taya` fina` añkla ginen manfitme mas na kometsianten ginen hiyuñg pues siempre u didog appenas fondu.

Lau haf` mohon i manehante na areglu ha petsisige gi hilu` este na chinatsaga? Kau pot appenas fondu pat mampos mandispiddisiau gi gastun dididi` na moneda gi kaha?

Dinaña` Familia: `Nai matai i internet gi mapos na semana, kulan bendision para megai na familia sa` pot primet biahe gumuaha intuñgu` gi halom membron familia. Todu manalag hilu` sa` taigue makenarian modetnu ni munafanalag papapa` siha. Esta magof un` nana na gumuaha kampu kumonbetsasion yan famaguoña.

•••

La`monña ha`aniña `nai solu para katsu hau gi nesessidatña maseha ti presisu. Masge` fanguo`otmu manguaguat nu ennau na patgon. Pasensiaye sa` hagu i saina. Guiya ennau na patgon espehosmu dispues de ha diñgu i pettan sanmena.

Yangin katgueti hau gi disposisionmu pues mas makat para un` guaguat i patgon gi kareraña mona. Mientras sisiña, halom ya hagu un` gu`ot talen disposision kumu saina.

Finatton Pagyu: Memegaiña ti manlistu para i iran pagyu guine gi mapos na semana. Mampos silensiu finattoña kulan un` saki gi pueñge. Ayu hit humoñgañg i yinilulog tata`lupueñge!

Debi tafan listu piot `nai katma i klima. Kada taiguenau masusede mas manrikohe fuetsaña i mamamaila` na pagyu. Kanaha` seguru na mauleg na dañu para u chogue gi finattoña.

Ni hanom ni kandet gi señgsoñg siha deste Dameñgo, Agustu dia 2. Ileghu na propiu na umahatsa komun publiku gi kada soñgsoñg para `an taya` hanom. Siña ha` manpau Sabalu hit lau malagnos i muna` chachatsaga i tilipas lodu`.

I Amiguhu: Ha gacha`yu` triniste `nai hu konsidedera mapresun un` amiguhu pot seriosu na keha ni inatisan impitu. Ni gaige para u inayuda apas kotte (bail bond) pot para umalagnos ya u preparague` para i kausaña.

Hana` lastima-yu` mampos i hagas mauleg kareraña yan asaguaña. Todu i dos manadaña` che`chu` niha gi rinikohen fiñkas para siha. Mauleg finatinas niniha kada sakan. Lau humalom i usun amot binenu. Estague` fuma` granum unai linala` niha. Lastima todu i hagas fitme na pisun hinanau niha. Pot fabot suhaye usun “shabu” `sino ice `sino kontodu hagu un` famadese sin ditension.

Sensian Yine`ase`: `Nai humuyuñg i nana taftaf para u fama` amotsan oga`an estaba i lahiña dumidimu namaisa gi menan mañantos sige manayuyot. Ha faisen haf` bidadaña. Ineppe na u famat kilu sa` ine`ekuñgog-gue` ni Saina gi tinayuyotña. “Todu hu faisen na ayudu hanana`e`yu` piot ya hu faisen ‘pot fabor’.”

Gi oran amotsa, finaisen haf` tinayuyoyotña. Ineppe na para i amiguña RJ ni “namase` yan inutet”. Era ayu na patgon tañga yan udu. Ha dobla dos chininaña ya ha pega gi un` paper bag. Ha faisen si nanaña para una`e` i amiguna RJ dispues.

I idat ayu na patgon i mananayuyot ayudu para i amiguña ennau i nuebe años. Ha pacha mampos korasonhu i hinibeña ya gaige sensian yine`ase` gi mannamase` ni numesessita ayudu. Sumen namagof sa` este na nietun diñga` matatñga gi hineñgeña lau gai mina`aggem gi maninutet yan mannamase`.

•••

Ilegña i biblia: “Este lokue` u suha”. Haf` kinemprende-mu nu este na atpahon? Siña mohon un` pula` ya un` esplika para benefisiun linahyan?