Maseha Halom Chinatsaga

I Saina ha tagu’ si Moses para u lagnos i Israelitas ginen Ehiptu (Egypt) pot man-matrarata kumu eskablu. Este i dignun tautau sumen guaguan. Debi un’ unestu ya un’ respetan maisa hau. Gigon masge’ este giya hagu, un’ tutuhon mandage kontodu inisaguen familiamu mismu.

Piot ya un’ u’usa’ sensian dudus yan banida siempre un’ sufa’ achu’ mattiñgan gi halom chubasku. Dispues de machalapon malabidamu, makat un’ reskata i hagas un’ gogosa na reputasion-mu antes.

Gi bandan lalahe, mas buente i mañan chanseru ya kontodu kosas bisinumu un’ hasñgon sumaki para usumu. Na ma’agim korasonmu ya un’ guatdia mauleg i dignomu ’sino kulan hau machalapon basula gi kanton chalan.

—

Todu klasen tiempu guaha para maseha hafa na okasion. Guaha tiempun maipe, uchan, pagyu, katma, afnu’, ma’te, nubladu, klaru, finattu, despedia, abundansia, hai’las, pueñge yan haane.

Gai tiempun brabu, malañgu’, hoben, amku’, metgot yan dañge’, Gaige-yu’ pagu hihot gi tiempun kalun tomu. Dañkulun buraka ’an matagu’yu’ para bai’ na halom i siñkuenta libra na kostat pugas ginen i kareta. Mampos esta makat piot sa’ rusketiyu’ pagu. A` Saina!

—

Yangin unna’ setbe galun banida gi destrosiun linala’ tautau pues siempre u fattu ayu na ha’ane ’nai mismu dandan-mu un’ madandane. I para unna’ fan para empleau pot taya’ fondu ya un’ chogue silensiu gi hilu’ sinetsot, siempre un’ ma-asi’i nu ennau na aksionmu.

Lau yangin un’ banidosuye, pues kulan i tanu’ ni ridondou, nanañga tareha-mu. Ti umahñau siempre un’ finatoigue ’nai mas ti un’ ekspepekta. Este i minaipen tautau, sumen makat ’an mattu giya hita mismu. Anog na trabiha ti ta komprerende i finu’ i Saina ’nai ilegña chamu chechegue gi otru haf’ tiyamu na un’ machogue mismu.

—

Kada ’nos kuantos mesis, man-mahogse hit nuebu na hatsadan hanom yan kandet. I namatman i sensian no siakassu ginen i man-ma’gasta gi hegsu’ i Deni. Ti masesiente haf’ pinadesen tautau siha gi señgsoñg sa’ hita umapasisiye ni apas utilidat, kareta, gaselina yan proteksion polisia.

Hafañagu este na maña difirensiau na kuttura gi entalu’ siha yan i publiku sa’ manguaguan sueddon niha ke mayotmente. Kau buente nina’ fan ma-edut gigat niha na esta nina’ fan malefa ti makomple promesan adelantu gi publiku.

Yangin para u fan huyuñg na sakan umesalau “botayu’”, makat makonduse felis ennau na ginagau gi ’nai mampos ha sa’pet i publiku gi halom tasin didog na linala’ miserable.