Manmalefa hit ni asunto-ta

Antes mohon de ta aksepta manana’lun tanu’ publiku yan manmachule’ siha na tanu’ praibet gi 1977, mauleg ta afuetsas i federat na u apase dibin tanu’siha. Ta upus i asuntu pot un’ dikiki’ na lepblun asut (pasapotte). Ni pusuelon kafe ti finahan gi plasan batkon aire. Kulan mohon diariu mañgarerera hit hiyuñg America tat kumu Japon, Asia yan Uropa. Suette gi sakan ‘an mattuyu’ Mañagaha.

I totat para apas este na obligason ti u menos ke $100 miyon pesus. Gaige na debi u masoda’e’ fondoña yan inapprueban appropriasion i asuntu para umasatba felis sin ditension. Makat na kontrariu na biahe.

Doble Problema: Problema mampos para mona monedan iya Marianas ni fuetsau nina’tostus ni dos seriosu na chinatsaga guine gi mapos na mes. Mas ke siete mit na bisita kumansela biahen niha mage Marianas. Umafagcha’ este yan dumespasiun kinalamten bisnis siha yan nuebu na tinituhon operasion CUC. Gaston hospitat yan eskuelan publiku nahoñg bento’ta malineg ulu pot kasi kuattru años sigidu.

U nahoñg mohon para apas pagamienton manritirau? Kuantos tiempu este na maliñgun fiñkas estake u na’lu tatte gi hagas eskalera? Dialu tafan apatten tiau, lau puede nahoñg para edukasion yan hinemlu’ famaguonta kontodu safu na komunida. Mattu gi nachatsaga i basnag moneda na biahe. Dos gotpe muna’ aliñgkeñg iya Marianas mina’ mampos dispasiu kinalamteña na biahe.

Maase’ Saina: Gi misan enteru, mattu un’ prohimu gumimen kafe. Mafaisen ginen manugue’. Ilegña na ginen manggao-gue’ ayudu gi Saina. Era mamamaisen kandet sa’ sumen maipe i pueñge ya esta sososgun masahalom gi maigoña.

Mafaisen haf’ na ineppe guaha. “Ilegña i Saina namesñgon hau esta i Desiembre sa’ taya’ salape pa’gu para fahan materiat”. Dios mihu! Kuattru mesis ta’lu na sasalaguan. Magahet, mas ke $30 miyon pesus madidibi i CUC. Kanaha’ mafafahan telefon yan alamli!

Komun Sense: Este i mauleg na sensia (common sense) piot gi bandan disision sumen impottante. Pa’gu ‘an timana’e’ hau, chamu lilihan sa’ mabebende ha’ “komun sense” gi Walmart. Famaisen luchan letran “K” ya un’ ayeg haf’ na komun yamu!

Diskuidu: Dos attikulu tasoda’ ‘nai manmafañagu hit: tanu’ dikiki’ yan dañkulon tasi. Megai manguaguan na guihan yan mina gi halom tasin iya Marianas. Ni unu malagu’ umekuñog sa’ mas manapresisu lepblon asut—pasapotte.

Kada pumeska Japon, Taiwan yan Korea gi tasi-ta siha kumusecha guihanta. Hita esta pa’gu ta apopotsu’ haf’ iyota desde guihan yan todu klasen minan tasi. Haf’ na mampos hit mandiskuidau nu este na asuntu? Guaha tiempu mohon para ta aregla este?

Bisnis Saru’: Gi sagan kafe, sige madiskute i ladañkulu na poduñg bisnis guine deste mapos na mes. Mas i operasion bisnis u dispasiu kontodu para otru sakan. Ilegña un’ amiguhu ni pa’gu humuhuchum bisnesña, “Pa’gu na tiempu, achog monkey bisnis siempre u mauleg ennau na bisnis.” Dios mihu!

Fahna: Matachoñg ham yan amiguhu Magoo sige in’ pasalista papa’ haf’ siha na produktu manfahna gi halom natibu. Dispues de siboyas hagun, pipinu, biriñgenas, tumates chaka, fioles yan a’gun haya magtus i listan mame.

In’ atan haf’ na paladat tautague i mesklau na tropa ni manhahalom gi tendan neñkanu’ diariu. Esta monhayan i kometsiante ha estudiaye haf’ yaña i fumatotoigue i tenda siha. Este na infotmasion ‘nai hana’ metgot mas haf’ ha produduse para sigiente birada.

Mauleg tafan eyag che’chu’ pinasensia yan hinimidde yangin para ta prekura umadelanta deste produktun gualu esta’i tasi. Debi ta dimemoria haf’ yaña i natibu kontra otru na rasan tautau.

Inipus Silensiu: Gi taduñg na fina’ kañada inipus silensiu na esta matachoñg-yu’ papa’ para bai’ ekuñgog kabales haf’ gaige gi oriyahu. Adumidide’ hu siente dispues fresku na guinaifen mañglu’ ginen i fondu. Chatseguruyu’ haf’ sustansian ayu na silensiu i esta na’tañga. Mamatkiluyu’ pot para bai’ ekuñgog mauleg ta’lu un’ biahe.

Gi chagu’ huli’e’ un’ galaide mababatsala halom ni kuattru na manfuetsudun lalahe. Dispues manmaliñgu ‘nai ma-añkla i boti. Guaha siha fina’ eku lau ti seguruyu’ haf’ i buruka. Hu huñgog un’ linañgitan na bos palao’an sige kumanta “Hagu I Inan I Lañget”. Ti huli’e’ haye kumakanta lau nahoñg ni bos kulan añghet.

Adumididi’ hu estirayu’. Era hagas maliñgu maigo’hu gi liyañg kanton tasi dispues de manpeska i tropa.

Pasensiaye: Mauleg unna’ guaha tiempomu umagradese pau nuebu na initot cha’guan, katen pajaru gi aire, guinaifen mañglu’ ni gumapot i hagon niyog, yan pañgpañg napu gi halom rubentason. Guiya este siha i muna’ guaguaha difirensia gi kinalamten hinemlo’ta diariu.

Yangin mampos tachoneg maisa hit, pues iya hululu’ ta aminasa i tatkilu’ haga’. Gigon kahulu’ este mas ke regulat na kinalamten, un’ chachansa “stroke”. Ti mauleg para hagu ‘an pinalo’pu’ hau stroke pot tatkulu’ haga. Ali’e’ yan medikumu ensegidas.

I puntu, piot para i manamku’: Na’e animu muna’ deskansan ñaihon parehu ha’ tatautaumu yan hinasomu. Ti debi na hagu mismu para un’ atisa muna’ kahulu’ haga’mu. Debi de un eyag umesgaihon papa’ ya u deskansan ñaihon. Chogue diariu pot hinemlo’mu mismu.

Katma: Guaha ‘nai un’ atan papa’ i katma na hanom ‘nai kontodu matamu un’li’e’? Estague’ na klasen katma ta aliligau diariu. Kontodu hinassta mas klaru ‘an sige un’ getiñg, para unna’ fañuha, i ti manpresisu siha na estotbu. Natinatiye un’ pas yan humidde na ginagau bendision ginen hilu’ sa’ areglau ha’animu.

***

Kada mattuyu’ ti kanton tasi, hu hahassu un’ patgon ni humahagu’ pasun tataña gi hilu’ unai. Esta malalagu ya ha galolope ayu siha na pasu i tiha hahagu’. ‘Nai kulan yayas guaha ‘nai kinata-uma ya sige i dos mona. Na’magof I fietmiente ha tatitye pinekat tataña maseha esta nina’ matotompu’. Animu!

‘Nai echu suttteru, sumiha i dos para i guahlu’ ‘sino tumalaya. Ma-establese ayu na sensian kompania kulan mohon dos amigu ni uma’ayuda diariu. Umakilili’ para i misan mona gi uttimon semana dispues umamotsa antes de u falag i gualu’. Estague’ (buddy system) mauleg i mantata umafanague famaguon niha.