Makat na pesti

Kase 158 na nasion man-dinanche ni pipinu` na sagun coronavirus `nai megai man-matai. Gi hilu` este guaha inatuñgu` ina`ayuda para u tutuhun umaregla tatte ha`anen niha i los probes.

I chenut: hinatme mukus i sagan mañglu` gi gofes `nai chinema` humaguñg regulatmiente i tautau estake dimalas. Tai amot na sagu ya u fan dimalas piot i man-amku`.

Trabiha taya` nu este na pesti guine ya puede tiha fatoigue hit pot makat yan pipinu`. Propiu lokue` na otden halagnus i gobietnu `nai ha prohibe bisita siha ginen China yan otru lugat gi oriya. Taya` kampu `an sinaulag i man-amku` nu este na sagu.

I man-sinapet nu este na pesti ayu i mandaibites yan mangai problema korason yan gofes. Sumen makat na sagu gi pumadedese este siha na malakondision hinemlu`.

Iya New Jersey mampus sinapet pot megai gi tautauña gi `nos kuantus siuda man-kinikote nu este na sagu. Matutuhun man-manhatsa mas hospitat pot ti suffisiente kuattu gi presente na fasilidat hinemlu`. NJ `nai ha tutuhungue` i pesti.

Inipus chadeg hachalapungue este na sagu. Gi 24 oras na tiempu mas ke 700 man-tinatme nu este na pesti giya NJ.

Tinaya`
I pineduñg ekonomian iya America guaha 47 miyon na tautau para u fan tai-che`chu`. Ensegidas si Presidente Trump yan kongressu machoneg un` prinipone para u inataha matompu` ekonomia pot dañosu gi bandan offisiu.

Ginen cho`chu` `nai man-resisibe empleau suetdu ni kumukubre nesessidat familia tat kumu guma`, karera, magagu, neñkanu`, gastun hinemlu` yan otru siha nesessidat. Konsidera `an taigue offisiu kumu pisun familia. Sapet diariamente para umafana` gi inaligau moneda para mantension.

Malofan-yu` guine na kañada antes gi tinilaikan NTTU yan Interior. Makat na tiru i diariamente un` fafana` tinaya`. Mauleg na guaha hanum sinaga para katsun estomagun mame entalu` faha` niyug yan lemai `sino atulin kalamasa. Makat gi familia tirun ha`ilas.

Pisu
Gi fina` konbetsasion yan lahihu ñietu ilegña na ti presisu umeyag finu` Chamoru pot esta gaige finu` Eñglis. Dispues tai bali i liñguahen natibu ni pot dios.

Hu faisen haf` na par u dispressia i naturat giya guiya? Ha repite na tai bali na liñguahe fuera de usun konbetsasion. Hu adiñgane i lahihu na huna` pasensiague` ya hu atan haf` gaige giya guiya deste ha`ane `nai humuyuñg-gue` gi tiyan nanaña.

Hu esplikaye i patgon na i finu` Chamoru i sahyan kutturan natibu guine siha na petlas. Sin este pues kase lokue` hagas mapuha i galaide` Chamoru ya maiñgu kontodu sustansiaña.

Kase tiha komprende haf` mina` likidugue` na finañagu. Haf` taimanu para un` ñega haf` gaige gi haga`mu?

Kuatdrante
Kumu amku` sessu hu pulan kinalamten mañeluhu diariamente. Gai atburotu na responsablidat gi katkuet manera.

Un` biahe hu aminasa un` che`lu pot motibu. Ilegña i amku` nu guahu, “Muñga ihu mana` kuatdrau mampus kuatdrantemu”. Hu komprende haf` fino`ña na mantautau ha` i mañeluhu. Lau diberas gi halum estrakadan inaguaguat gi tropa haf` para un` chogue?

Hu estira talen pinasensia ya hu sottan ñaihon. Ayu `nai hu aliligau `an man-apañite pot che`chu` imbestidot. Lau otdinariu na burukan familia gi ha`ane. Magahet na kada unu konsu kustumbreña mina` guaguaha fina` inadisgustu. Diberas!

Fuetsau
Sais dias antes de bai komple sinku añus huna` appan i primet na satten hinegsa` gi foggun guafe. Era, ñalañgyu` lau malañgu si nanan mame ya ti siña kahulu`.

Hafana`gue-yu` manotne guafe, preparasion pugas estake hu pega gi hilu` foggun. Deste ayu na tiempu umeyagyu` preparasion totche deste estufau, katdu yan mana appan `aggun haya.

Kontodu mañotse matiteg magagu hu eyag dispues. Unu ha` na che`chu` palao`an tihu tuñgu: mandeskatga. Poresu na finu`yu` gi neñkanu` yan trahe ni para bai usa. Debi magaguhu uma-enkola, atbidun yan maprensan tisu para bai hatme.

Magahet kinalamten un` popblen guma` piot familia ni tumuñgu` obligasion espirituat na libianu yan felis hinanau todu diariamente. Kase kuattru añus ni guahu tumucha lisayun familia antes de oran sena, estudiu yan deskansu.

Man-eyag i pumalu parehu obligasion gi karera mina` makomprende lina`la` espirituat. Un` fitme na kreansa ginen as nanan mame. Todu man-mañetbe gi atat kumu tanores. Sumen namagof `nai hulili`e mona gi atat mañeluhu kumu setbiente.

Dispues `nai sige luchan para i gima` para preparasion amotsan oga`an. Magahet na magradua-yu` gi high school sin muna`lagu gi foggun elektrisida.

Gaige si Iku gi menan guafen hagas foggun munana appan hinegsa. Maseha popble na fina`pus ti mañotsutyu` ni unabes. Ayu `nai huna` fitme presisu siha na ineyag satbasion.

Inadiñgan
Kumuentus si Queen Elizabeth pot chinatsaga ginen sagun coronavirus. Lau kau ha komprende linala` popble yan sapet gi halum tinaya`? Sedi ham señora umusune i mant ###