Lisensian casino
Todu areglun lai mana` guaha fitme na aseguridat na makomple i intension para i tautau. Mauleg ta hahassu haf` achamauleg un` lisensian casino ni mana`e Best Sunshine pat dos na lisensia `nai guaha otru bisnis casino.
I unu na lisensia dañkulu na piniligru u mafañagu yangin ti siña i Best Sunshine ha kubre obligasioña gi papa` i lai. Lau `nai dos na lisensia, libianu i otru ha kubre finatsun i otru. Presisu na tapoñga este na asuntun gi mansabiun hegsu` I Deni`. Asuntun aseguridat! Libianu makubre kontodu hinemlu` yan edukasion guine.
Kuttura: Ta diseseha bien felis yan motmut minagof i selebrasion kutturan Chamorro ni ma-abibiba pa`gu na semana giya Luta.
Propiu i lugat sa` iya Luta `nai gaige i fitme na pisun liñguahe, kuttura yan tradision Chamorro desde antigu na tiempu.
Kumeke ileghu na maseha manhalum nasion siha guine desde tiempon Españot kanaha` ti ma-estotba iya Luta gi mattirun fuetsau siha otdin tinilaika ginen kada nasion. Poresu na sumaga fitme kuttura yan liñguahe guihe na gatbon petlas.
Hu sen agradesi lokue` ayudun tiuhu as Tom Mendiola `an guaha dinidahu pot liñguahe sino hinanau manantigu na mañainata. Bien felisitasion para todus i manpattisipau guine na okasion.
Kompleaños: `Nai manmatayu` gi ma`pos na Huebes hu komple 68 años. Ti listuyu` sumelebra i ha`ane. Hu tutuhun gi tinayuyot dispues hu atan tatte un` ratu finaposhu.
Mampos barañka na katsada `nai malofanyu` gi pinatgonhu. Esta mamatmus-yu` gi halum te`ug na sadog miserapblen pinepble. Megai besis `nai hu totpe ñalañg `nai hu kahlañgyu` gi uttimu hilun esperansa.
Maseha sumen makat ayu siha na tiempu mas ha simientu sensian miinetgut i para bai upus ayu na katsada. Felis adumididi` hinanau-hu ginen sattun na akonsehun mañaina-hu gi halum un` sumen popble na guma`. In` chahlau i mantaya` mame kumu solu guinahan mame.
Maseha felis offisioghu dispues, gaige taduñg gi konsensiag-hu ekun finana`guen hinimiddi yan integredat. Tumachuyu` gi dos pisu ya hu tatiye luserun sankattan. Deste ayu fitme disposisionhu kontodu asuntun linahyan siha guine na petlas.
Hombre: Hu totpi un` professot finu` Chamoru ni umesplilika finu` natibu gi finu` Eñglis. Era, naufragu i prohimu gi liñguahiña mismu. Hu konsidedera haf` mohon na finu` Chamoru hafanana`gue. Kabales pat puru entut? Hombre, na lagse finu` Chamorumu finenina antes de un` chalegua` sikosmu! Muñga mafa` champuladu i atulin te`ug.
Kantan Natibu: Fuera de asuntun guinaiya, i kantan natibu gai tinatte desde antigu na tiempu. Guaha man-ma`ug na esta pa`gu sessu takanta. Ha inklusu “I Mañaina-mu”, “Ti Gi Un` Palasyon Riku”, “Gi Talu` Gi Halom Tasi”, “Nobia Yangin Para Un` Hanau”, “Eskatminan Guinaiya” yan otru siha sunidu.
Mana` fan man-hahassu hit pot sattun na saina sakrifisiu gi famaguon, mañge` na lugat islata siha, bendision saina, yan fehman na guinaiya.
Kontodu pot satbasion mana` sesetbi kanta para u machalapun infotmasion gi halum natibu antes. Hu huñgog lokue` fina` kanta `nai sin konbetsasion hana` tuñgu` i lahe i palao`an haf` gaige gi hinasoña. Siña kumonbetsasion modun amares para u atulaika sentimentu.
Hu huhuñgog siha mafanana`an kanta Chamorro na tiempu. Inipos poble sustansia na esta hu faisen maisayu` kau ayu ha` china nina` siñan natibu. Unu ilelegña, “I Chamoru, I Chamoru, I Chamoru…” sinparat. Taya` otru mamenti guihe na fina` esalau. I otru matai “lamuna, lamuna, lamuna, tafan baila”. Kau gaige lamayot defektu i popble na kinemprenden mismu liñguahita? Na ti dididi` kulan diskuidu este?
Solemni Na Saludu: Para i amiguhu Kevin Atalig, un` solemni na despedida yan sinsiyu na agradesimientu pot un` pega gi pachot yan talañgan tautau-ta mensahen inadahe: Lachachai. U pañgpañg ekun kantamu para apmam na tiempu kulan pinegan lastru gi hatdin para bai`n e`ekuñgog gi karera mona. Bien felis yan si Yuus un` binendise. Si Iku.
Minala`et: Gi hilu` sensian hinimiddi siempre un` saluda prohimu-mu kumu achaigua-mu dimas de un` pohne. Magahet na makat para ta pañot sensian banida. Haf` taimanu un` adelanta hinimiddi giya hagu?
Muñga mamidi sino pesa haf` na guiya suette ya ti hagu. Fanna`e mit grasias yan bendision puede bira birada siña hinassu hau dididi`. Sensian betgansa yan imbidiu sumen tailaye giya hita mismu.
Para un` pohne i otru sumen tailaye na cho`chu. Dispues `an suette-gue` mas mauleg para hagu sa` ti u fattu mangagau ayudun miserapble. Na`e sinsiyu na bendision puede hagu lokue` un` sosoda` dispues suettemu ginen gasgas intension-mu.