Lache na tinituhon

Ilegña finu` i kuentos, “I tinatetta fumanunu`e haf` mamamaila`”. Leksion: Yangin baba na tinituhon, siempre baba uttimoña. Estague` tafafana` gi che`chu` achibau na inapprueban aktun casino guine gi alacha.
Ma`alulayeye ma-apprueba sin inekuñgog publiku kase pot chathinassun man-sabiu sa` dos biahe i publikun Saipan ha punu` este na diniseha. Dispues `nai marepapara na lamegai siha man-sustansiau na asuntun linahyan manaigue gi sanhalom ayu na aktu.

Ala kuenta ma-apprueba sin ma-ina kabales pot para u mataitai dispues haf` gaige gi halom i aktu. Na ti kulan tapega i toru gi menan karetan guaka? Na ti este sustansian masaulag hinalula i aktun casino? Dios mihu na che`chu` muron!

Displues, hafa para ta estotba kinalamten adelantu giya Tinian yan Luta? Presisu i tautau dos tanu` de umahusga representadot niha haf` na masupotta destrosiun Luta yan Tinian. Magahet na ti marepara aksion niha? Hombre dinanche Luta pinadesen ha`ilas ya para ta destrosia mas appottunidatña kalamten para i tautauña?

Lokue`, kulan mohon mantañga yan bachet aksion representanten Precinct I ni sumupotta aktun casino. Na ti ma`pos ha` na semana `nai masoda` dos Chinu man-mapunu, soñgge yan man-ma-utot adeñg niha? Kau ti man-inestotba hamyu na guaha este na finatai koneksioña yan grupun kriminat ginen China? Haf` na para in` na kilulog huyuñg guafag hinalom mas kriminat?

Afañielos, todu baba na tinituhon siempre baba uttimoña. Tatnai mauleg che`chu` hasupag poresu na todu botadot Precincts siha, maila ta suppotta muna` fan matachoñg ayu solu i kumontra i casino na aktu.

“Para`i Sainamu…”

Gi todu estotbu na asuntu, mauleg ta fan sehan ñaihon pot para ta yeñgyoñg yan asegura na gagaige ha` i talen añklata ni pinegan mañainata na ha gugu`ot galaide`ta. Gaige este gi un` palabra: Ekuñgog.

Dañkulu, chagu` yan anchu sustansian este na palabra. Esta man-echu hit tautau ya man-eyag hit lokuw` dichu amtau na che`chu` tautau. Nahoñg finaposta para talie` na todu che`chu` pinalala tatnai ma`ug. Pues halan ñaihon tatte sensian bastus ya tana` setbe i mas katma na sensiata.

Gi finu` i kanta, “Atan hulu` i pilan gi lañget…hai`ina i hemhum na chalan, para talie` hinanauta, kulan un` saina gi famaguon, ha pupulan maseha manu, ayu na hagu lokue` ni patgon,para i sainamu muñga ingratu.” Tana` fitme mas apunturian kabesata gi todu pinetsige para minauleg todus.

Finapos un` talayeru

Estaba un` talayeru kumakahat gi kanton tasi giya Puntan Muchot. Tatatte lahiña chiliguagua` ni chumuchule` i guagua` guihan. Hoben na patgon lahe ya sesen magof chalegña kada ha tantan si tataña kantidan kineni` gi hilu` unai.

Sessu tatte este na patgon ya adumididi` sige umeyag offisiun talaya. Ha atetuye deste ora, modun tasi, haf` na guihan gaige gi kanton tasi huyuñg esta i rubentason `nai mamagta` i napu. Umeyag lokue` lumulai, tekin yan panag.

I ineyag este na hoben, petmanente. Ha tatitye lastron tataña gi kanton tasi maseha guaha `nai ti ha hagu` ya esta nina` e`ensinahyau. Lau enfin ha atrebigue`. Hana` hahassuyu` un` finu` amku’, “Na`e` na`ña guihan sa` chumochu pagu. Fana`gue pumeska sa` chumochu` guihan maseha ñgai`an na tiempu. Magahet!

Finana`guen un` biha

Hu huhuñgog kulan guaha man-guaguadog gi fihon kolat i gima`. Estaba i nanan mame biha as Nanan Namar sige ha usune kumuha i edda`.

Siñko mesis dispues, ha hale` dididi` ya ha stone dispues ha agañyu`. Esta hana` matmanyu` na sakan tinanomña i amku`.
Un` dia in` tanume gualu As Perdido ladañkulu na plaset kamute. Fuera de in` benefisia, ha kubre nina`en familia guatu gi kuattro na fandañgo.

Bien felis man-gachoñghu

Dos gi Class of 1968 ginen Tinian dumiñgu hit na sakan: Francisco A. Hocog yan James A. Fleming. Mauleg yan dignu finapos niha para i tautau niha Tinian. Hu sen agradese i dos man-gachoñghu pot man-grasiosu gi tiempon mame Hopwood High School.
Animu deste tutuhon estake man-magradua ham ya ha bira siha tatte Tinian. Si Frank muaestro un` tiempo mientras si James man-ayuda gi bisnis mañainaña. Bien felis gi kareran miyu ya i Saina in` fan binendise.

***

Sige chaka chaleghu `nai hu hahassu na sen ti mattu gi hinasoghu na un` dia bai amku` lokue`. Gaigeyu` gi idat `nai kanaha` todu man-hoben pumapañgunyu` “pop” `sino “saina”. Hu aksepta piot `nai sigeyu` umensinahyau `an hu babale hiyuñg guma`. Dios mihu!
`Nai mattuyu` gi lanchu, hu gu`ot i kuha para bai hale` `an utut tañgantañgan. Taigue esta fuetsaghu hombre hu yotten ñaihon pot no bai malie` ni famaguon na tihu lañgag i hagas usuhu antes. Hu aksepta na estayu` tufai. Fuera ha` di chenot fatta sa` ayu `nai magpu` i nobena.

***

Ilegniniha na mauleg i aktun casino lau hasupag `nai ma-apprueba ni lehislatura sin inekuñgog publiku gi ma`pos na semana. I man-mañapotta ilegniniha na esta guaha tinilaika gi sentimientun publiku. Diberas?

Hu a`adu` haf` sustansian tinilaika ni malie` ni tita lilie`. Unu klaru na tinilaika: linala` miserapble gi señgsoñg siha pot diskuidon miyu. Este ha` huli`e na tinilaika guine.

Estague` na tinilaika finañagu ni diskuidun man-sabiun hegsu` I Deni` pot mas ke trenta años. Gatdun i miserapble na linala` tautau pa`gu gi halom un` sumen kuchinu` na fache` diskuidon man-ma`gas. A` Saina!

John DelRosario Jr. is a former publisher of the Saipan Tribune and a former secretary of the Department of Public Lands.