Kutturan relihion

Selebrasion kuaresma i mas dignu yan respetau na kutturan relihion mañgatoliku guine siha na petlas. Deste man-famaguon hit i mañainata machoneg finana`guen espirituat deste dottrina gi finagpu` eskuela yan tinayuyot familia gi gima` antes de oran deskansu.

Mañeha hit ginen otdinariu na ha`anita para ta assiste selebrasion pasun i Sainata espesiatmenti gi Bietnes Santo. Gi tinayuyot-ta ta hassu fehman `nai masentensia i Sainata sin umisau, makastiga, mapunu` gi kilu`us, mahafot dispues lumala` ta`lu gi mina tres dias. Tai achaigua na sakrifisiu ginen i Satbadotta pot para una` fan libre hit.

Espirituat un` añkla ni umadelanta fitme yan sattun na sensian yine`ase`, ina`ayuda, respetu yan inagofli`e gi halum tautau-ta siha. Mauleg na finana`gue lokue` gi famaguon-ta `nai man-eyag benefisiosu na linala` espirituat para satbasion niha.

Hu hassu antes i oran `las tres gi Bietnes Santo (`nai matai i Sainata) na enteru i señgsuñg siha mansilensiu. Mañaunau i tautau gi likau dispues de `las tres estake mahafot i Sainata.

Guaha ora para tinayuyot (kulan bela) gi halum Guma` Yuus. Sige mona esta i Sabalon Loria yan Pasguan Resureksion (Dameñgu) `nai kahulu` i Saina gi lañget. Kutturan relihion natibu! Felis Pasgua Resureksion para todu! Si JR yan Familia.

Kuttura: Sige sineyu` proteksion kutturan natibu gi fina` kanta siha. Mauleg! Lau ni unu umesplika hafa mafafama na kuttura.

Hafa kutturan Chamoru? Mauleg ta pula` yan esplika este para benefisiun todu. Sin fitme na infotmasion puru dispues finu` apotsu` na kuttura ni madagau ginen i chagu`. Debi tana` klaru pot uttimu besis haf` kutturata.

Atan haf` modun linala` natibu deste antigu na tiempu yan kau sumaga kumu patte gi linala`ta asuntun gualu` yan pinegsai. Siña ha` ti man-hanau hit para i lanchu lau rikonose tatten guma`.

Mañaunau ham man-malulog gi gualu` antes mina` chettun giya hame haf` benefisiun mananum yan mamogsai. Sumen namagof na patte i para ta hale` tinanum suni `sino kamuti para usun lamasan sena. Piot ya guaha katdun manog fresku pat to`lañg para una` libianu mañgañgas yan pañut `aggun haya.

Huñgan, gualu` yan tasi dos primera lugat kuttura. Lau hafa i primera kutturan natibu? Kumu `in seda` natutuñgu`yu`!

Botlu: Un` kantot mamaisen haf` na gigon mangai salape` hit kontodu mañata matulaika? Kulan finaisen chagu gi hilu` inosenteria yan insuttu.

Insuttu este na kuestion para i kanaha pumupunu` siha gi moseria manmacho`chu` para mantension familian niha! Ti dibatde sa` mafachochu`e pagamientun niha!

Animu i natibu macho`chu` para mantensioña. Ti na`banidosu i para tafan o`nañga finacho`chu` otru. Namamahlau gi fuetsudu na lahen natibu este na modun linala`. Poresu na humanau man-espiha offisioña gi moseria.

Disposision tanu` familia seguruyu` na todu mana fan mañage gi suetten niha. I kutturan ina`ayuda ya monana kontodu `nai guaha suette. Maseha dididi` lau todu mana` fan mañage. Disposision man-agofli`e na familia!

Pues i kanta dididi` tagfena gi bandan botlu sin motibu. Kustumbren tanu` i para un` apase nesessidat-mu ginen un` fachuchu`e na pagamientomu.

Nina`e: Gi fina` gotpe, i kustumbren natibu i man-na`e ayudu gi familia ni gai chinatsaga. Este na nina`e ha kubre pinadesin fina` matai, fandañgo, finagpu` nobena yan otru siha asuntun familia yan hihot na bisinu. Dispues de todu debi umanana`lu ayu na nina`e.

Chagu` na difirensia yan nina`en gineftau `sino regalu ginen man-atuñgu`. Namagof pot kanaha` todu gotpe mangeftau hit na tautague yan fitme gi oran ina`ayuda. Mas ha simientu respetau na dinaña` natibu!

Miskinu: Guaha lokue` kustumbren miskinu. Kumeke ileghu achog machuchuda buchiña ya sumen chatsaga hau gi un` banda, ti u hatsa kanaiña man-na`e maseha dididi` pot che`chu` karidat yan kilisyanu. Ti hu lañgag umupus prohimu-hu ni gai chinatsaga.

Gineftau gi namase` todu i tiempu ha bibirague` tatte dopble ke ninai-mu. Para i mamopblen mame hu soda` un` patgon ni matiteg todu magaguña na esta hu bira matahu pot tihu hoñge. Hu manau-yu` para iya hame man-aligau `an sopblan unu gi che`luhu para i prohimu. Felis ayu na ayudu-hu.

Benti tantus añus dispues, umasodayu` yan i prohimu. Esta magradua gi kolehu ya mauleg puestoña gi un` dañkulun kompania giya Los Angeles. Sin ditension, ha togtugyu` ya ilegña ‘Si Yuus Maase` nu i ayudumu”. Ha mente dispues na guahu ha pega kumu moduña gi bandan yine`ase` yan mauleg na akonsehu. Tatnai sumeha man-ayuda gi manchatsaga siha na famaguon giya LA. Mit grasias!

Finu` Chamoru: I kantata “Palasyon I Riku” guaha dididi` chinatsaga gi palabra yan ma-apotsu` na liñguahe. Ilegña un` kantot, “Ti gi un` palasyon i riku `nai gaige tano`hu”. I palabra “kamahu” ti “tano`hu”. Dispues repara sa` ni ñgai`an `nai siña unna` hulat un` tanu gi buttun guma`! Haf` mohon?