Kau $30 miyon ha` balita?

Yangin man-fiet hit pumulan futtunan famaguon-ta, pues debi ta faisen i man-sabiun i hegsu` I Deni nu este na kuestion: Kau $30 miyon pesus ha` baliña i tautau yan Island Saipan ni mabenden ñaihon gi lai casino? Faisen kada unu ni sumupotta este na asuntu kau ennau ha` balita?
Bueno, mafa` katsu i programman man-ritirau. Lau na ti magahet na segun gi otden i kotte ha nesessita este $50 miyon gi sakan para umana` satisfechu apas man-ritirau? Tinahoñg $20 miyon pesus! Kau para umapatten tiau ta`lu haf` guaha? Ke lau kuantu mohon guaha para este na nesessidat?

Pot fabot fan mamaisen kau $30 miyon ha` balita, parehu tautau ya tanu`, taimanu `nai mabenden ñaihon ha`anen natibu gi papa` lai casino.

Si Santo Papa Francis

Si Santo Papa Francis ha chahlau un` palabra ya ha chalapon para umapraktika ni todu katdinat, o`bispo yan mamale`: Humidde. Ha inkatga na u fan huyuñg ginen konbiñienten palasyon niha ya umarikonose todus espesiatmente ayu siha i mamoble ni chagu` yan sentrun modetnu na linala`.

Yahu mañana si Santo Papa Francis `nai ha otdin todus man-ma`gas Katoliku na u fan huyuñg ya umadaña`e ayu na tautau siha i man-dinisplanta ni chatkabales na areglon linahyan.

Yangin u tachu fitme man-ma`gas Katoliku gi tatten tautau niha ni mas man-bahu yan chatsaga, siempre umali`e sin dinida haye gi kinilu gi halom pastahe man-gaige gi chagu` na kanton kolat.

Estague` sustansian i Saina ni ha ta`lon chumoneg si Santo Papa Francis para enteru kinilu siha gi pastahen elmundu.

***

Guaha dibate gi entalo` man-sabiu pot ti komprendiyon haf` tutuhoña si Jesukristu. Lau repara sa` oppan finaposña gi Santa Biblia kumu magahet yan sagradu na Yuus. Sige hu akanteha haf` finu` i mas man-afamau na button elmundu kontodu Albert Einstein.

Si Einstein mañgge` ya ha aksepta na guaha mas fuetsa ke haf` nina` siñan tautau. Gaige ennau na fuetsa gi un` “kampu”, kampu na para si Yuus ha` namaisa. Ti man-hulat hit guihe na kampu sa` maseñala kabales kumu kampun Yuus Tata, Lahiña yan Espiritu Santo. Manu `nai man-gaige hit estague` lugat-ta.

Mauleg in` ebalua silensiu `nos kuantos palabras gi tinayuyot miyu: Inañgoghu, dinida, hineñgge, batbaru na sensian integredat yan inasi`i. Petsonatmente este siha na palabras ha esplika un` pale` guine gi alacha pot finatton semana santa yan haf` ilelegña i bañgheliu.

Estague` kinemprendeghu: Hu añgoghu i tai hinekog na nina` siñan i Saina, taya` dinidahu nu ennau. Hu hoñgge finanagueña ya batbaruyu` dumefende hineñgeghu. Gi uttimon ha`ane bai repasa finaposhu ya bai fan asi`i gi ayu i umesague-yu`. Este na inasi`i sumede inasi`i ginen i Saina.

***

`Nai binatañgga i ichan ni freskon mañglo`, kontodu hagun niyog yan gagu man-ginapot gi maigu` niha ya esta nina` fan e`esalau.

I siñienteta difirensiau gi kada teti i ichan. Giya guahu, naturat na klima ni rumega i tanu` dispues de anaku` na tiempon somnag `sino maipe. `An uchan fresku, pa`gu `an kulan tiñgtiñg i semnag pues esta hana` fañichichi hit. Hagu un` negosiu haf` para un` chogue gi todu atmos bandan klima.

Lokue`, `an uchan gi ha`anen fandañgo ileg niha man-amku` na muñera i nobia. Pa`gu `an teti anaku` na uchan ni dispasiu, ileg niha ta`lu man-amku` “uchan ma`adde”. Guaha mohon uchan kinilag?

Lau lamayot patte namagof i finatton uchan sa` ha sede i tinanom ruminueba siha dispues de mana` fan tostus ni fette na tiempon somnag. Kontodu espirituta ha ta`lun ruminueba sa` fresko!

***

Hu li`e un` amiguhu na kulan hafa` bisiu malag i konfisenariu. Huna` hassu na yangin lokue` inipos bisitasioña guatu gi konfisenariu, siña ha` si San Pedro pinateg guieñgña `an mattu gi lamasan man-husga. Deste ayu ha utot mas malag i konfisenariu. Pindehu!

***

I otru appenas kumonfisat sa` hasan-gue` umisau. Hu faisen kau i sinakeña latan ham gi tenda mauleg manunog ñaihon? Piniloña buente na tinife` to`an papaya. Demoñu!

***

Ha faisenyu` un` prohimu kau guaha `nai hu li`e flitadan guaka `an mapega gi kahon ais. Lau dispues hana` maipe ya ha gulusune kulan mohon taya` agupa`. Dos semana malofan hu huñgog na gaige gi ICU pot chetnot korason. Hambientu!

***

Ilegña un` kandidatu na malalagugue` para offisinan gobietnu. Hu faisen na hafa guaha? Ha oppeyu` na ha espipiha i offisinan gobietnu.

Hu sañgane na gi uttimu na biahe `nai mattuyu` gi hegsu’ I Deni`, gagaige ha` guihe i offisina ni ha aliligau. Chumaleg tuyan! Demoñu!

***

Guaha lokue` muna` fan atotpe finu` Chamorro `nai ilegña na malalagogue “para bai gobietno”. Huna` hassu na trabiha chagu` i botasion. Lau ha insiste na para u gobietnu. Ayu ha` na konbetsasion mame maliñgu kuatru botu. Fana`an para gobietnun halom karisu! Tontu!

John DelRosario Jr. is a former publisher of the Saipan Tribune and a former secretary of the Department of Public Lands.