Katma yan silensiu

Megai rumepara na mampus silensiu i tanu` pot `nos kuantus semana. Mañaga i tautau gi gima` niha gi minachum atdau. Kau pot hinalum tiempun maipe? Huñgan, inipus silensiu yan katma na esta na`tañga!

Hu ekuñgug ñaihon i metgut na intuision-hu (intuition) para bai li`e haf` guaha. Lau ni este inipus silensiu. Sen ti anog haf` na fina` mañglu` gaige gi oriya. Ha estotbayu` pot un` señat na gai tinatte seriosu, dispues.

I uttimu biahe `nai hafatoigue-yu` tirun silensiu gi 1995. Ha pañgunyu` `nai muma`lag i buttun Santa Maria gi halum kuattun mame. Kumahulu` dididi` dispues numa`lu tatte gi sagaña gi regulat na attura. Ayu na oga`an linau na dañkulu iya Kobe giya Japon `nai lamegai man-dimalas.

Poresu na este i modun silensiu gi oriya ti mattu ha` pot tinilaikan klima. Ginen hilu` este na señat para tafan le`an haf` man-masusesede. Tafan man-gagau ayudu gi Saina na una` fan libre hit ginen haf` na destrosiun ira.

Silensiu: Gi halum redondun politika komprendiyun i na`tañga na silensiu. I republican makat ha defende hatsadan suetdoña 80 pot sientu. I otru banda pa`gu ha areregla halum gima`ña antes de u huyuñg bumuruka publikamente.

Diberas makat kumandidatun republican. Haf` na trosun lamug matai bayena gaige gi tatalo`ña, era i hatsadan suetdu! In` ipus 14-mit na empleau pot betsan miyu?

Liñguahe: Agradesiyun animun PSS fumana`gue famaguon natibu ni hila` nanan niha. Guiya chumahlau ya ha repasa fotmat na modun konbetsasion yan finana`guen mañgi` gi finu` natibu, Chamorro yan Karolinas.

Este na finana`gue gai eskalera: konbetsasion yan matugi`. I tatatte `nai gaige mas fitme yan asegurau na modu gi ineyag liñguahe.

Professot liñguahe ginen enteru Pasifiku marekomenda finana`guen matugi` pot appruebau na este solu `nai siña i patgon mas ha gu`ot petmanente ineyag liñguahiña.

Motibu: I matugi` na materiat gai fotmalidat. Dispues, debi i titigi` u komprende i asuntu para u siña tumugi` gi klaru na presentasion.

Ti libianu mañgi`. `Nai hu tutuhun este na offisiu gi 1972 diberas manadan materiat hu chule` para bai taitai dopbladan presentasion siha. Kontodu lepblun kantan Guma` Yuus hu taitai. Hu hassu na i uttimu na finana`guen mañgi` letra i segundu gradu gi 1958. Ma-abandona dispues pot para tafan lagse` man-finu` Amerikanu! Dios mihu!

Haf` na peskan pueñge `nai kara ratu magtus i goman fisga. Lau ti sumeha-yu`! Hu hala halum pot presisu na bai tuñgu` finenina liñguahihu!

Kuttura: Hafaisen-yu` un` lahihu ñietu haf` sustansiaña man-ñgiñgi`. Hu esplika na finenina pot respetu gi man-amku` piot i mañaina. `Nai tumekun i patgon echa motmut bendision na u felis gi kareraña.

Mas ta pega sensian hinimiddi giya guiya ke kustumbren chiku. Estague` linie-hu gi ma`ug na mauleg na kustumbren tanu` gi ma-ñgiñgi`. Un` ma`gas na saludu para i man-amko`ta maseha ngai`an.

Bakasion: `Nai bakasion i eskuela mañaga i famaguon gi gima` niha. I sankattan na chalan gi gima` silensiu. Maliñgu burukan famaguon `an sige para iya siha.

Hombre guaha `nai hu ekuñgog `agañg chaleg niha pot manginen ayu hit na estau antes. Bos manhoben sige mangupu gi aire. Na`magof!

Man-malofan hit guihe na fina` kañada `nai ni futturu-ta taigue trabiha seriosamenten gi hinassota. Puru huegu umokukupa ha`anita yan mana` fonhayan tarehan guma`. Mampos silensiu mina` kulan mahalañgyu` ni burukan famaguon!

Usun Niyog: Animu tres ñietus man-afalu` yan niyog gi hegai. Humihut-yu` ya hu fanu`e taimanu mañgacha`. Machague ya mali`e na mas libianu. Mañaleg.

Dispues, man-mamaisen taimanu makamyu i niyog. Hu fanu`e finenina taimanu ma-ippe`ña dispues matachoñg-yu` gi kamyu ya hu fanu`e chechegueña. Siha dispues muna` fonhayan i tetehnan. Mauleg finanagueg-hu guihe na pupueñge. I niyog magahet na ha satba linala` natibu desde antigu na tiempu!

Adahe na manadan niyog hu kacha` yan kamyu para saibog choda, sune, kamute, dagu yan katdun guihan. Patte petmanente este na fina`pus gi linala` tautau isla!

Maliñgu: Pot dos besis antes huli`e komplimentu (magutus uttimu finihu`) un` pueñge antes de umakamu` (fandango) gi sigiente dia. Adumididi` mumaliñgu este na patte gi kustumbren umasagua guine. Kase i manadan gastu umutut sin ditension.

Kontodu fandañgo gi gima` mapega guatu gi hotel. Kase pot gastu lokue` este mina` mamueba petmanente. Magahet na apase, gupot, dispues hanau para i gima`. Ti un` fan nañga` grupun bulacheru gi tatten guma` `sino muna` gasgas. Ahe` ti pot miskinu lau makat na tiempu mañoda` monedan mantension familia!

***

Magahet na prontu setbisiun neñkanu` yan gimen gi hotel. Ti parehu yan fandañgon guma` ni debi ta asegura na masa i boka antes de u tutuhun umuñgag-gue` i kusuneru. Dispues, debi u guaha para manulaikan haf` hokog gi lamasa. Dios mihu!