Kapitan Hinemlu`

Kada unu guiya solu kapitan hinemlo`ña. Haf` disposision-mu hagu mismu para un` gosa `sino padesi. Gi diariu yan sattun na inadahe libianu ha`ani-mu katkuet ora.

Komprendiyun na megai besis na tita adahe bisiun paladat-ta. Ta sumuke pachot-ta mas ke regulat na kantidan neñkanu`. `An taya` homlu` na eksisiu un` chochogue pues umadulalag hamyu yan sinturamu.

Chadeg nina`ye hau daibites yan chenot korason. Gigon inadite hau sumen makat para un` bira tatte i rilos soluke fotmat un` petsige diariu na eksisiu sinparat. Maulegña inadahe taftaf ke `nai esta ni para un` gotde sapatosmu makat.

Pot para unna` gai grasia eksisiu, kone` i tropa ya in` fan hamyu manmamokat pot para in` estira i gigat gagu`. Siempre i famaguon makomprende impottansian eksisiu.

Kobransa: Motmut inadahe gi sasañgan niha kontodu kobransan dibi. Ti direktamente makopbla i gai kuenta. Mana` esgin petsonat na chinatsaga tat kumu “Ai, gai problema i lahihu man-apase atkilon guma` giya California”. Hagu ni man-didibi debi un` chahlau ensegidas ayu na mensahe. Gigon ha kaikaigue` humanau debi un` nana`lu kuentamu gi hilu` agradesimientu yan dispensasion.

Mamaisen…: Hu huñgog inali`e mamaisen saina ni gai ginatdun. Gi uttimu palabra ilegña i uma-adiñgan, “Parehu dinisehan todu atmos banda para ta pega i dos patgon gi sagan niha. Maila` echa motmut bendision ya u tutuhun familian niha mismu”. Un` dañkulu na pagpag kanai yan lagu` minagof!

Dopblada: Huna` sesetbi “minachum atdau” kuentan ekspressiu pot finatai. Mas suabe usun palabra lau komprendiyun sustansiaña segun gi dopblamu. `Nai matai un` amiguhu hu despide kumu hinanau minachum atdau. Gi puntan tanu` siempre u matagam ni man-añghet gi gua`ot i lañget ya umakonduse para iya paraisu.

Puti: Sige i dos amigu umetupag gi hiyuñg iya Garapan gi kantun rubentason. Tumalag hilu` i unu ya ilegña, “Pare, puti popble lau putiña mudoru!” Dios mihu na grasia. Era, mali`e probleman `an acha mudoru siha. Ni peska taya`!

Haga`: Guaha-yu` sumañgane na i Karolinas ti indihinau giya Marianas. Magofyu` sa` gai haga`yu` dididi ya ayu ha` na patte ti pinalala`e matdision Islas De Las Ladrones! Dios tiampare! Achog ti bai gai haga` rasan saki!

Kanastra: I usun mama` (pugua`, pupulu, afog yan amaska) ti pot para un` mana` agaga` pachot-mu `sino labios-mu. Gaige este na attikulu siha gi halum kanastra.

`Nai mattu hau manbisita mana`e hau ni kanastra para un` ami hau. I mama` siempre un` nina` bulachun ñaihon ya nina`e hau sensian batbaru sumañgan haf` teñga finato-mu. Estague` usuña antes i mama` gi halum kanastra.

Nina`e: Dos klasen nina`en chenchule` guaha gi kustumbreta: regalu yan ika. I mefe`na mediu pot minagof pot kompliaños `sino bautismu yan fandañgo. I ika nina`en oran chinatsaga tat kumu finatai. Este i segundu i matutuge papa` ni familia pot para umana na`lu `an gai chinatsaga i man-na`e. Estague` unu gi fitme na pogse` natibu.

Indihinau: Sige madibina asuntu siha ni para u fan madiskute gi konfirensian man-indihinau `sino natibu. Puede fotmat makonsidera haf` ennau siha na attikulu pot no tafan daña yan manadan mansañgan ni mangueku! Gi finu` i kuentus “Dispues de todu i hapbla megaiña hapbla ke sustansia”.

Espiritu: Guaha siha lugat guine gi tano`ta ni debi un` motmut respetu pot lugat espiritun mañaina-ta desde anitgu na tiempu. Iya Puntan Muchot un` lugat `nai siempre bai tekun mangagau dispensu pot hagas señgsoñg peskadot antigu.

Kontodu Chalan Galaide` papa` esta iya Chalan Reda mangai chalan i espiritun mañaina-ta ni debi un` adahe gi hilu` sinsiyu na respetu. Guaha siha fina` kantun tasi na maulegña lokue` un` suhaye gi lemlem tautau. Gigon un` disatentuye siempre un` mana` hineddan sin presisu.

E`salau: Tinatiye `nai ha kachet siha i professot karisu finabrikan kantan e`salau (chant). Kontodu pale` totut sige umesalau tinayuyot ni tatnai hu huñgog antes. Duru i amiguhu Magoo chaka chalegña `nai ha huñgog tinayuyot e`salau gi Chamoru. Ilegña, “Amanu este mage a`sake este guatu a`klasen kanta?”

Yangin un` komprende sustansian apusientu gi guma` familia pues libianu un` konfitma na desde antigu na tiempu taya` tinayuyot e`salau. Sagradu na lugat i apusientun familia. Pues i dos umasagua solu siña humalum guennau na kuattu. Pues manu na kampu `nai para un` tutuhun tinayuyot e`salau? Dispues hagas tai relihion i natibu esta i finattun Españot.

Peska: Maestron peska gi alacha siha na tiempu gigon makone` primet guihan ma-aka` ya mayotten ñaihon. Ala kuenta ginagau dispensu yan suette gi biahen niha. Kontodu halum tasi dañkulu na respetu para i man-mofona.