Kachido` Lahen Yuus

Aksidiente, hulie` kachido` “Lahen Yuus” ni malagnos gi alacha. Ayu na kachido` muna` oppan haf` finapos i Sainata deste mamapotge` ñaihon nanaña as Santa Maria estake ha tutuhon chumogue tinagu` Yuus Tata gi idat dose años.

I bañgheliun San Juan `nai anog na tautau magahet i lahen Yuus ni umapagaye, sin ditension, na i satbasion i tautau gaige giya guiya taimanu disposision Yuus Tata. I dies na tinagu` Yuus mapega papa` deste tiempon Moises (Moses). I mensahe mapega gi dos pahinan tablon achu` ya managu` si Yuus Tata na umatatiye. Mattu dispues i lahiña Jesukristu ya ha kontinua chumalapon tinagu` tataña.

Espesiat i bañgheliu ni tinige` San Juan sa` ayu finenina `nai anog na tautau i lahen Yuus gi usun ayu na palabra i “guahu” (I am). Megai na man-malate`, menhalom yan famosu na relihiosu nina` fan matman ni fino` Jesukristu `nai sige ha pula` i tinagu` Yuus Tata gi sinagogiu siha. Mampos tagfe`na ke todu i hagas man-mapega kumu respetau na atoridat pot haf` dinanche yan tunas na disposision para i linahyan.

Dos patte gi ha`anen Jesukristu mampos ha gana sensiaghu: 1). Mapunu` sin umisau. 2). I minesñgon mañainaña gi ora `nai makastitiga antes de umapunu` gi kiluus yan sustansian siete na finihu` para si Yuus Tata yan nanaña as Santa Maria.

Mampos menhalom yan tomtum si Jesukristu na malie` ni manma`gas Judius yan otru siha nasion na siempre man-inamot disposision fuetsan niha. Poresu, mapunu` sin umisau pot no u fan estotba mas gi halom i fuma` rarai siha. Ti si Ponsiu Pilatu kumondena na i tautau ni man-estaba gi kotten Jesukristu. Makat para unna` mapunu` i inosiente lau hombre este hasuñgun i Sainata pot satbasion kinilu siha gi pastahen enteru elmundu. Mañasaunau hit guine na sakrifisioña!

Ai na manadan lagu` ha chuda` si Santa Maria `nai sige makastiga i lahiña. Ni unu siña ha falague pot ayudu fuera ke kanai asaguaña as San Jose. Dispues, tanu` enemigu `nai estaba. Mampos puti i irida siha gi tatautauña na esta mamaisen hulu` haf` na taiguihe madisponiña as Yuus Tata. Ha suñgun todu ya hagagauye asi`i i trumaidutegue sa` timatuñgu haf` bidan niniha.

Gi halom siete na finihu`, ha adiñgane lokue` papa` i tai nina` siña as nanaña Santa Maria. Ayu na finoña `nai anog pinitiña as nanaña ni tumatiyegue` gi halom mattirun kastigu estake mapunugue` gi kilu`us. Estaba ha` ta`lu si Santa Maria man-rikonose guihe na liyañg achu` `nai mahafot i lahiña ni kahulu` gi lañget gi mina` tres dias.

Yangin un` dia u fattu este na kachido` mage, keni` familia ya infan hamyu man-ega` sa sumen mauleg piot para i famaguonta siha. Si Yuus u bendise hit todus!

Magotden Babue

Para todu i difirientes na hatsada yan ma-utut sueddon man-ritirau, haf` na magodden balaku monedan familia `nai ti siña kalamten. I fuetsan moneda mas didog maribahaña. Sige pa`gu man-ensinahyau matriakan yan patriatkan familia taimanu para una` fan afagcha` mantension familia.

Huñgan, talie` mattirun hinanau i administrasion i Navy guine gi 1961. Megai gi mangai che`chu` guihe na tiempu mana` fan basta. Ensegidas mafalague i hagas gualu` ya sige man-mananum. Pa`gu na biahe mauleg na guaha katsun food stamps. Konsidera ya taya` este na ayudu. Muñga sa` man-apbende hit ampoduñg dadeg entalu` Oleai yan Puntan Muchot.

Satton na diniseha ginen i publiku na u guaha antau na tinilaika gi modun linala` niha pa`gu. Tat ti nina` fañuñufa` gi halom fache` miserapble. Ti isau i tautau soluke diskuidun i man-sabiun hegsu` I Deni`.

***

Sige hu akanteha haf` sustansian mamfog flores para korona ni mapega gi ilu `sino agaga` tautau. Un` amku` umesplika na kontodu manhokan flores ma`a`ayeg ginen i hatdin. I mas manbonitu yan gatbu na flores titife`.

Ilegña i amku` na gi duranten matufog korona, un` pepega mauleg na intension para ayu na prohimu `sino prohima i manae` dispues nu ayu na korona. Pues anog na ti kinibrutu matife` flores `sino matufogña. Deste tutuhon debi i mas manbonitu marikohe yan matufog gi hilu` mauleg na intension. Sumen mauleg na patte gi kutturan natibu!

***

Gi antigun na komunida, ma-ofresen ñañaihon etre manha yan fina` ame (mama`) kulan modun para tanae` mauleg na attension i bisita-ta.

I manha sinede i bisita muna` freskugue` mientras i templan mama` nina` batbaru fumotma palabras siha para u sañgan dibuenamente haf` finatoña. Puru este siha eksisiun tradision ni esta man-maliñgu gi modetnu na komunidan Marianas.

***