Inipos silensiu Na Eku!

Gi sumen katma yan silensiu na noche hu huñgog nachatsaga na eku taduñg gi papa` tanu`. Kulan mohon matomba dose miyas na pidason achu` halom gi Pacific Ring of Fire ya tinampe fotten napu enteru i tanu` gi sanmena.

Ume`ensinahyau-yu` taiguihe naufragu na pasaherun mapuan batku. Fatigau ya gi hilu` achu` uttimu hu hassu `nai estabayu`. Sigiente dia i maipen somnagyu` pumañgon. Sige ta`lu hu batsalan ñaihon tatautau hu ume`espiha tautau gi oriya. Ni unu hu soda`.

Sige dispues mañgilulog halom kuestion siha haf` sustansian i guinefihu. Kau mamamaila` un` ira ni dañosu para mayotmiente?

Kau guaha mababa grifun inachatli`e` ni ti mahuchum? Guaha mohon kampu para malimienda i difirensia antes de u sala` i asuntu? Esta ha` sala` i asuntu dispues de matucha i taduñg chigu`.

Ti namatman i masusede. Hagas hu nañgan ñaihon para u pagpag sa` hagas manrikohe manbinenu siha na gaselina. Taiguine masusede ni pattidan demokrats 40 tantus años antes.

Pa`gu na biahe maputa` gi entalu` sapottadot Jose (Joe) Ayuyu yan Lt. Governor Rafaet Torres. Kulan lamegai gi offisiales republican mangaige gi tatten Ping. Mauleg na geran dañkulu hafañagu este na estrakadan sanhalom.

Lastima sa` puru sensian gereru `nai taya` kampu para inadiñgan gi hilu` minenhalom: La kodu na biahe ke la rason. Kasi estake todu mandañosu `nai mana`afaisen “haf` lai masusede?”

Este siha na Perlas
`Nai umasoda` dos asut—lañget yan tasi gi sanhaya na banda giya paraisu—gaige un` kadena ni gumugu`ot filan perlas, punta pot punta, entalu Guam yan Maug.

Parehu madiletraña Guam yan Maug lau atlibes. Parehu guatdian iya Marianas gi kada punta gi enteru atkipelago.

I asut lañget yan apaka` mapagahes umadotna i atuf ridondu gi sanhilu`. I pilan yan miyon na pution umi`ina i lañget gi suenan pueñge.

Pañgpañg napu, freskon mañglu`, poduñg uchan, yan katen pajaru gi lemlem tautau i naturat na sunidon tanu`. Mañgontentu i tautau gi lugat niha gi oran sena yan deskansu.

Hu sen agradese tiempu gi inai Lali Fo` gi halom entalu` manmauleg na peskadot yan kapitan galaide`. Humidde na ineyag chumenchulu, talaya, tekin, peskan panag yan fisga. Na`magof!

Gi lanchu, in ` abahu un` lugat dispues in` tutuhon kumuha preparasion para sune, mendioka yan kamute. Todu in` chage umaprubecha i lugat ni esta inna` gasgas. Mañge` siñiente `an manhame yan mañeluhu kumusecha hinale` kamute, sune, mendioka yan dagu ni hame mismu tumanom.

I edda` ayu na gualu` muna` fandaña` ham pot nesessidat familia. Ni unu sumeha. Estague` sustansiaña i tanu` natibu, pisun linala` deste antigu na tiempu. Esta pa`gu gagaige ha` este siha na tanu`.

Fuera de sumaga i tanu` kumu pisu, oppan lokue` finana`guen dignu na respetu yan integredat ginen man-amko`ta. Este i dos i mas ma`ug na finanaguen mañaina-ta. Halom plaset spiritun respetu yan integredat `nai tana` oppan i sensian natibu dignu na finañagu.

Segundu Primera? I para bai` eyag liñguahihu mismu kulan oppan mampos na guaha taigue na ginetden te`chuñg tale gi menahu. Patte hu kikilili` huyuñg naturat`nai mafañaguyu` ya tihu hu tuñgu` usuña?

Dispues, mas namamahlau sa` `nai hu eyag mafañague-yu` usun liñguahihu segundu primera gi hilu` dinage na primera besis i leksion. In` gacha` haf` husasañgan? Atan i modun leksion sa` siempre in` li`e` i doblada siha ni manlache! Pot fabot!

Dispues, hu li`e` gi ñietus yan ñietas siha na taya` tiniñgu` niha finu` Chamorro. Desde oga`an manfinu` Eñglis estake mandeskansa. Manunog i finu` tanu` gi iphone, ipad, laptop yan hekua` haf` sihan na pad ni guahu umapase. Dios mihu!

Mattu gi triste na hiniyuñg bapot gi sagua` iya Tanapag pumañgonyu` un` tatalu` pueñge. Kareran uttimu despedida gi liñguahen natibu! Na ti guaha esta pa`gu man-e`esalau pot direchon tautau tanu`? Haf` sustansian programan miyu? Mauleg in` esplika para i publiku!

Gi mismu tiempu, sessu mañguentos pot natibu lau ni unu gai programa kabales haf` mafafama. Kulan huegon choñgka. `An hokog pues tama` magpu` gi huegu. Hanau ya un` afgue` hau mas afog puede suette i mama` ni un` kachet hau gi lataftaf. Dios mihu!

Tihu tuñgu kau kustumbre gi natibu i mampos ti ma`ug gi pinetsigen haf` probichosu para todus. Ha tutuhon dispues ha sotta ya ma`pos ha chogue otru kosa siha. Dudayu` kau estague` finanaguen mañainata. Gaige giya hita mismu i para ta pulan mañan yan heñiun manera `nai ta chochogue che`cho`ta. Debi tana konsiste yan fitme desde tutuhon esta`i uttimu!