Ineyag Pinasensia

Sigi hu assimula haf` na sumen antau disision peskadot gi offisiun niha. Mauleg tata`lun bumisita pot para ta eyag sattun leksion pot disision.

Si Jesukristu hana setbi peskadot kumu ihemplu. Unu, mipasensia gi todu asuntoña. I otru, mehnalum, kabilosu, ha tuñgu` mangotdin haguet, mamegan katnada yan ñgai`an `nai para u dagau haguetña.

I ihemplu ha esplikakaye hit benefisiun pinasensia gi asunto-ta siha diariu. Sin pinasensia, libianu modun hasupag `nai katkuet tiempu manuguñg hau sin man-hassu. Mofo`na i heñun hasupag antau na hinasomu.

Huñgan, buenti pot man-tautau hit na mofona aksion sin antau na konsiderasion. Dispues de sattun umeyag-yu` sensian pinasensia `nai hu repara haf` gi finu` man-amku` signifikasioña “che`chu` echu tautau.”

Hu hala halum sensian respetu, hinimiddi, yine`asi`, yan kinemprendi gi nesessidat yan iniguñg namase` na prohimu-hu. Dimas de bai disfruta i prohimu, mamatkilu-yu` umekuñgog yan man-atan pot no bai na` puti. Dispues, taya` rason na para baina` putigue`.

Estague` na birada `nai siempre un` soda` impottansiaña mauleg na relasion yan prohimu-mu. I man-atuñgo`mu man-hihot ya esta namanman sensian gineftau niha piot gi oran gotpi. Mañge` na siñienti mi-atuñgo` sino amigu.

Bisiun Loru: I paluman loru mafana`gue kumuentos estake siña ha repite haf` finanagueña. `An chatfinu`, pues kasi todu dia chinatfinue` hau, yamu pat tiyamu. Ayu ha` ha repipite i mafanagueña.

Guaha ha` lokue` na tautau hapopo`lu na man-loru siha. Sessu teñga masañgane hit haf` kuttura yan tradision tautau-ta. Achog ti mafafaisen kumuentos sin presisu sa` mafanague lokue` bisiun loru.

Lau repara sa` puru finu` chatfayi ni mandañosu para hita. Masen tuñgu` batunes natibu para umana` fan bubu. Dispues, mañeha sa` hita humoka i ha diseseha na ineppe ginen hita mismu. Man-mapalala`e hit fina` latigasu pot para umaprisetba fuetsan niha politika!

`An un ebalua haf` probicho-ta, seru! Siha umatisa mas ginefsagan niha gi potput na sueddu yan linala` man-gefsaga mientras hita man-e`epineduñg `an sopblan imbarasus ginen i satgen kusina.

Patman Kanaita: Gi todu kinalamten gi ha`anita, taya` tumatachu gi uttimu besis fuera ke hita mismu dispues de manhanau todu.

Poresu na debi ta diskuti yan ebalua mauleg haf` asunto-ta siha gi karera mona. Yangin guaha sattun na diniseha para ta planeha futtunan famaguon-ta pues gaige gi dos patman kanaimu ennau na asuntu.

Nahuñg na insuttu yan diskuidu man-malapbla hit ni publiku gi priniponen hatsadan sueddun man-ma`gas 80 pot sientu. Dispues, madagau siñku pot sientu na to`lañg manog para tafan agululumi. Man-malefa na tatuñgu` lokue` haf` mauleg yan kombeni gi todu asunto-ta.

Debi tana` fan matatñga hit gi asunto-ta siha para mona. Che`chu achibau gi hilu` gulosu (ambenteria) para buchin niha esta nahuñg. Otru sakan na eleksion `nai mas presisu este na inadahe. Maila` tafanu`e i man-chatsabiu na nahuñg na intension destrosiu bidan niha. No Mas!

Nahuñg: Bes enkuandu, man-huyuñg i inetnun “indihinau” (NMDC) sigi ma-atisa asuntu siha ni hagas tatuñgu`. Mabohau ni guehan kuttura kulan mohon nigap hit ha` na finañagu.

Dispues, man-malefa na sumen taya` bidan niha para uma-adelanta modun linala` tautau tanu`. Lau duru machalegua` siha pot direchun tautau-ta. Hu atan i oriyahu para bai keli`e kau haye fumababa i natibu. Ti mañoda`yu` fuera ke manadan kuentos fabulas de chispas ginen tropan indihinau mismu.

Komprendiyun i mafa` presu kutturan natibu pot natatah na politikan niha. Haf` aidentifikat natibu? Siña in` pila` este na kuestion gi hilu` mehnalum yan kabilosu na esplikasion?

Kumu siña este in` pila` kasi siña bai`n tutuhun man-ekuñgog. Lau gi hilu` bulachu na kuentus fabulas de chispas, un` ratu ha` sa` guaha mas mauleg para bai`n che`gue. Dispues, in` tiñgu kuttura yan tradision natibu!

Dopble Balutan: Mafañagu-yu` lamayot patte Chamorro yan dididi` haga` Karolinas. I meskla gi haga`hu tatnai ha estotba-yu` desde pinatgon-hu. Hu tuñgu` na makreansa-yu fitme ginen petlas relihion yan kuttura-hu.

Gi halum dopble kuttura taimanu para bai pula` hafa dichu aidentifikasion kuttura-hu (cultural identity)? Poresu na hu bibirayu` sessu tatte gi pisun kutturan natibu relihion. Desde respetu, yine`ase`, inagofli`e, mehnalum yan todu masimientu giya hita ni natibu desde tiempun Españot.

I kutturan relihion Katolisismu i pisu, haligi, fanliheñg yan luserun Chamorro yan Karolinas. Ayu mina` man-ma`ug hit gi todu pinetsigi para ta adelanta hit kumu natibu! Maila` tafan agu`ot kanai sa` anaku` karera-ta yan famaguon-ta siha. Si Iku.

Pot Tautau-ta: Bes enkuandu mauleg ta abiba gi hechuran kanta-ta pot tautau-ta yan tano`ta. Tafan man-na`e mit grasias gi Saina pot rikesan este siha na man-gatbun petlas. Gi hilu` sattun na dinaña` siempre ta soda` ginefsaga-ta gi karera mona.