Induktu pot Chatdisision

Tantu de maletke apas dibin CUC mas ke $30 miyon pesus, ha palopu` hit un` dañkulon pagyu ni tumomba kasi mit na haligen telefon.

Yangin mohon prontu ta apasi i CUC siempre u famahan materiat kandet siha pot preparasion para `an ha gacha` hit seriosu na mattiempu. Lau mafa` huegu i asuntu.

Ti hu tuñgu` kau taya` fondu pat makat mapatten tiau i dididi` na sepblante gi monedan para pa`gu na sakan.

Dispues de fina` basula Saipan, ni unu gi hegsu` imperadot I Deni` fitme mamatinas disision haf` finenina para u fan mafalague gi bandan ayudu para i mas mansinapet tat kumu i manyinamag gima` niha. Manmama` i taguan!

Taya` satton na areglu tampoku para ayu i rumipot siha guatu gi sagan fanatukan pagyu ni esta manhiniga` seriosu na chetnot. Estague` `nai anog fatsun manehante gi operasion gobietnu gi haf` na ayudu siña maprebeniye sin ditension. Lastima i tinilanadan offresimientu ni mantai bali na biahe!

Heñiun Teguñg: Gi `nos kuantos mansustansiau siha na asuntu sin estudiu manmanugoñg i mansabiun I Deni. Haf` na tinatiyen tropan guaka ni manimpirau pot finatton linau.

I industrian casino ti ufacho`chu` gi ma-katkukula git nina` halom aduana (taxes). I presidenten iya China ha lachai umutot kinalamten mafanana`an “triad” ni umareregla hinalom mas manriku para u fan hugando Macau ginen China.

I masupone na miyon yan miyon pesus u inatisa ni casino giya America lau otru humuyuñg. Megai manmahuchom sa` lache katkulasion niha. I mas dañkulu na casino giya Bahamas (balin $3.2 biyon pesus) kara` antes de u fonhayan mahatsa. Kau ti in` tataitai este siha na sinisede? Hafa na estreyas lini`e` miyu gi lañget na homlu` este na industria?

Tradision Natibu: Deste finagpu` gera manhanau hit para i moseria gi praibet yan lamayot patte, gobietnu. Ta soda` libianuta kumu hutnalerus ke makat na che`chu` gualu`. Adumididi`, ta apatta hit ginen tradision linala` gualu` yan peskan tasi.

Maseha maliñgu i fangualua`an kumu modun tradision linala-ta, sige hit ha` tatte gi ayu na lugat `nai hagas manmananom i manguelo-ta siha pot mantension familia. Guaha umusune kumontinua mananom gi uttimon semana kontodu pinegsai. Gi todu pot todu, kada ratu ta bisita i lugat `nai ma-establese tradision-ta gi hechuran gualu` familia yan tasi pot peskan guihan.

I sumustene i hagas fitme na modun linala-ta kumu natibu i espiritun guelu ni umuma anaku` tiempu i achon espiritun Chamorro gi halom todu mattiru yan mattiempu. Gaige ennau na espiritu giya hita. Kau ula`la` pat mafnas dispues gaige i asuntu gi dos patman kanai-ta. Dañkulu konfiansiaghu na ti u faliñgu diripente.

Finu` i kuentos siña un` lagnos i Chamorro ginen espirituña lau ti un` lagnos i espiritu ginen guiya. Ni kuantu na manloka` lañgat gi halom chubasku siempre u katma ya u na`lu tatte espiritun natibu. Hita para ta esgaihon famaguon-ta halom gi safu na puetton espiritun Chamorro.

Denibette: Asolas, hu hatme fina` halom tanu` yan kanton tasi pot para bai` debetten ñaihon hinasoghu. Tai atparehu i freskon mañglu` gi papa` mayau na troñkun mames. Mangaige gi ge`hilu` pajaru siha na sige mañganta. Suena dumeskansaghu.

Gi kanton tasi hu apprubecha i ma`asin na mañglu` ginen hiyuñg rubentason. Homlu` na eksisiu para i tatautau-ta. Gi Sadog Kabayu katma i hanom. `Nai homhum huli`e pution siha gi talu` gi halom sadog kontodu minañgau pulan.

I troñkun gagu gi kantun tasi mamifila punta pot punta. Gi ge`halom i troñkun atbot mañila` floresña `an mes de Mayu gi todu i lugat. I hu fanana`an troñkun linala` (niyog) manpalalapa hagun niha ha`ane yan pueñge. I tautau mananimu gi kareran niha.

Kulan hu offisiona este pot para bai` suhaye manseriosu siha na asuntun linahyan ni megaiña besis ni taletke. Dispues de hu libette-yu` `nai sige tatte para iya hame As Gonno`.

Edukasion Famaguon-ta: Kasi bente años yan pa`gu `nai esta lamegai famaguonta manma-eduka kolehu mas libianu dinaña hunta pot para umafatinase fina` mapa futuron tano`ta.

I inadiñgan mas gi hilu` usun rason yan kabales na estudiu gi ideu haf` propiu pot adelanton iya Marianas. Estague` na eskalera `nai mas mankapas tautau-ta gi pot areglon futtunan todu.

Ni achog chalan, guaha pinegan señat pot direksion kosake siña un` tuñgu para manu hau. Estague` sustansiaña planun natibu. I areglu siha siempre mas guaha propiu tinilaika pot para u esgaihon i kinalamten mona. Areglu ni disbentaha umana` fañuhua, i bintaha yan mauleg u fan magu`ot fitme.

Ti siña ta pesa pinetsigen adelantu sin planu. Kada masge` un` estudiaye. Yangin areglu problema siempre ta ta`lun umadelanta. Desde turista yan otru siha patte gi ekonomia debi u guaha planu ni para ta implementa satton pot para ta abiba homlu` na kinalamten. Mas megai appottunidat para i tautau-ta siha dimas de umadiñgu i tanu`.

Malimitten Fanatan-ta: Manmafañagu hit gi mandikiki` siha na perlas. Huñgan, tinahoñg kampu para mandañkulu siha na fangualu`an yan adelantun otru siha industria. Hafa i puntoghu?

I pagpag botkan gi papa` tasi sige ha` ha umenta minedoñg tano`ta siha kada biahe `nai ha guaife hulu` mas tanu`. Gi ge`hiyuñg, gaige dañkulun tasi yan todu klasen rekessa ni siña ta fachuchu`e` para pisun ekonomian i tano`ta. Estague` `nai gaige dadañkuloña haf` guinahata. Sige ha ma-umenta minedoñg tano`ta dispues sumen dañkulu tasita.

Taimanu dinañkulo-mu mau`udai gi haf` hinassomu minidoñg-mu. Ti siña tamide este sa` naturat na abilidat manhassu yan manguife para adelanto-ta.

***

Machuchuda` hinegsa` i platuta na biahe. Dos sigedu na fotten pagyu. Haye maninkatga nu este ya hafa` taya`? Si Iku.