Inanalisan Tutuhon Natibu

Guaha un` grupu giya Guahan ha petsisige haf` tinituhon natibu yan haf` masusede yan Españot kiñientos años antes. I puntu pot planun Españot, manera `nai ha implementa planuña, yan kau guaha respetu gi dignun natibu.

Mauleg yan sustansiau na pinetsige primera besis pot para manalisan finapos natibu antes. Kabales magahet na gai sistema gobietnu i natibu. Ya pot hafa na para u dimu gi ininsisten Españot mana` fañgatoliku yan tinilaika siha gi haf` hagas aregloña.

Siempre ha totne chispas maches `nai ma-ebalua modun Españot gi destrosiun linala` natibu gi antigu na tiempu. Taimanu mohon para ta dispacha este yan otru siha aminasu kontra Chamorro?

Kasi mauleg gi hilu` hinimidde ta atan yan komprende haf` manmabidata desde antes, haf` esta pa`gu sige ha` manmachogue, kampon sensian inasi`i` ni malabidan niha, kinirihe adumididi` gi haf` propiu na che`chu` tautau pot para ta mueba chumule` tatte dignun natibu.

Gai minakat ma-esgaihon este na galaide` pot mantautau i pasaheru siha `nai kada unu libianu fumofofu pot impitu. Tatatiye inapagat mañaina-ta gi manasetben hinimidde yan pinasensia.

***

Manñahlalañg: I rasan tautau siha ni inayeg Yuus Tata para umana` famta` gi enteru i tanu` masoda` kontodu manbachigu` ginen iya Asia.

Sige maguadog ginen manu mage i rasan Chamorro. Guaha umatotga na ginen España pot relasion yan Magayanes. Lau i Españot a`paka`, bonito yan tunas gapot iluña. I Chamorro mampos mesklau. Ilegña i unu, “Pega papa` bastatdu!” A`saina!

***

Mafaisen i ginen segundu presidenten iya Filipinas as Erap Estrada para u pula` haf` kumeke ilegña “bacteria”. Ensegidas ha oppe, “Guiya `nau i santatte na pottan cafeteria”. Manimbeste i Chamorro na “baterian” kareta. Kasi chathuñgog. Dios mihu!

***

Un` oga`an gi traffic light ha totpe-yu` un` palao`an. Hu rikonose. Era nina`ye ni chetnotña mañague` ya ha sotta sinigoña. Hu pada fasuña para bai` pañgon. Dispues hu sañgane na tai bisnis-gue` gi tatten mañgu gi taiguihe na kondision. Buente pot nesessidat na ha atotga mañugun.

***

Sige mona, ha señasyu` un` tautau (era amiguhu) para u ketuñgu` chalan hospitat. Hu tamtam haf` pinadesisiña dispues hu sañgane na u tatiye-yu`. Gi halom hospitat `nai husoda` na nina`ye i prohimu chetnot hamalefa (dementia).

***

Este na chetnot piot gi man-amku` libianu mahassu kuarenta años antes. Lau ti siña marikohe haf` masusede nigap na ha`ane. Estague` este i chetnot hamalefa. Pulan i mañainan miyu pot no u fan huyuñg manlauya gi bisinu sin presisu.

***

I paluman payaya` sessu gumupu antes yan dispues de fina mañglu`. Anaku` yan anchu papaña ni ha estira ya ma`udai gi mañglu`. Haf` signifikasion palabra “pumayaya`?”

Na ti kumeke ilegña na gumugupu` hau esta pa`gu ya tatnai tumunog pot para un` gacha` i edda? Fan atan ya an` mapgao i inetnon siña gumupu hau namaisa sin un` mabatañga ni pumalu.

***

I tanu` redondu. Todu humuyuñg siempre u birague` tatte. Yangin mama` mañagun manog hau kontra i prohimumu piot ya un` hasñgune che`chu` tailaye siempre u na`lu tatte mismu disposision. Lau pa`gu na biahe mas ke dopble na sapet para hagu. Fana`an gi finu` Eñglis guiya este i “one pay de odda”.

***

I katdun to`lañg gi halom kalahe esta desabridu. Ni achog ta sohgue i espuma ti u tinilaika sabotña. Lastima i pigu` gi fondu. Debi ta tulaika `sino hana fan imbeninau hit todu. Fuera pot neñkano, haf` sustansiaña i pinedoñg palabra?

***

Manadan man-malañgu gi hospitat dispues de pagyu. Tat infetmera yan mediku ti kalalamten sinparat 18 oras gi ha`ane. Namagof na attension gi halom mattiru ni inafuetsas iran pagyu.

***

Estaba i FEMA giya Guam `nos kuantos dias antes de uttimu na pagyu ni sumablasus i tanu`. Guine, manmattu dos dias dispues. Hafa esta ha signififika? Na ti asuntun listu na kabayeru ni mafanana`an leadership? Prefektu golai faka`!

***

Makat na hinanau mayamag fanliheñg familia. Un` usune sumaga gi sagan fanatukan kau kabales nesessidat tat kumu hanom. Kada un` rikonose i gima` ayu ha` gaige i sitiu. Ayudu siempre u fattu lau hombre este tinaka` tiempu. Pasensiaye pot nesessidat familia.

***

Guaha siha manginacha` induktu pot diskuidu. Era machansa mañaga giya siha estake pinapa I atuf yan lugan gima` niha. Mansuette sa` ni unu dimalas. Metgot na pagyu gi todu lini`e`hu guine na ira deste antes.

***

Pa`gu ha` `nai huli`e` finigu` troñkun gagu dispues chinalapon kulan papet gi otru lugat. Megai troñkun telefon nina` fan alabadu esta pa`gu. Manadan `an gupun sin gi señgsoñg katkuet lugat.

***

Namatman i appenas preparasion pot iran pagyu kulan mohon ti sessu hit gi sakan manfina`um mattiempu. Lau mampos mañgontentu i mansabiun i hegsu` I Deni. Estague` `nai anog i apattau na siñiente kontra i mangaige siha gi señgsoñg.

***

Gi halom laundrymat, guaha siña mañaleg pot siniseden pagyu. Ilegña i unu, “Pa`gu `nai kori` i ‘Guandoñg mile?’” pot materiat guma`. Fuera ha` ayu na patte `nai ilegña si pindehu, “Ai na boniton gimah”—guma`.

***

Ilegña lokue` un` prohima na mapega i tento` yan kaman familia gi tatten sitiu. Machogue este pot mampos katma i guinaifen mañglu kasi pot hinala ni otru matklima ni pa`gu umu`upos hit. A`saina!

***

Dumaña i maipen pueñge sa` katma yan hiniyuñg miyon na ñamu. Duru ham mañaleg `nai mamaisen i lahihu, “Isar señko?”—kumeke ilegña kau taya` señko`.

***

Pot dos na ira, makansela fuetsau siete mit na bisita. Dispues dumespasiu i kinalamten bisnis. Ti sen mauleg gi maseñala na rinikohen aduana para pa`gu na sakan. Puede nahoñg gi kaha para i mas manpresisu siha na setbisiu tat kumu hinemlu`, edukasion yan proteksion publiku. Gai minakat este na biahe!

***

Kada biradan ginen plasan batkon aire i bus turis guaha `nai ha kokone` tres bisita. I uttimu biahe huli`e` dos na pasaheru. Era i kandakta (conductor), i otru i draiba. Pa`gu `nai magpu` nobenan taloa`ne. A`saina!

***

Mañgacha` niyog i lahihu para u fañoñge punot para sugun ñamu. `Nai kulan mamakat mañila, hu tagu gunot gi tagpapa` na troñku kosake libianu kimason i pinot. Mañila! Finanague gi manhoben mangai bali na sombra petmanente!