I Hagas Soñgsuñg

Malofan-yu` gi hagas lugat mami Lali Fo`. Esta ni unu gi hagas bisinu gaige. Todu man-amku` guihe na tiempu esta manhanau para i deskansun niha.

Hu hassu i fitmi na sensian kooperasion desde che`chu` familia esta komunida. Man-geftau gi haye numesessita ayudu. Machuchuda` inafamauleg yan inagofli`e gi halum todu. Mit grasias gi ayu siha na mañaina i pumasensiaye ham antes.

Esta pa`gu gagaige ha` i William S. Reyes na eskuelan elementariu. Megai na lastru man-malofan guihe na plasan eskuela desde mediu siñkuenta siha na sakan.

Gi ge`lagu, taya` hu soda` fuera ke dos fiet na troñkun lemai ni muna` fan libre manadan familia antes. Dañkulu na ayudu ni numa`e ham alimientu gi didog na tiempun ha`ilas.

Desde man-famaguon ham in` apprubecha tumifi` lemai guihe na dos troñku. Magradua-yu` gi high school ya sinparat in` falague `an taya` pugas gi gima`. Entre matunu, masaibog, sino masotni. Mauleg na katsu gi lamasan sena.

Kontodu i dueñu in` lalaladde na u suha `an in` tutuhun tumifi` lemaiña. Dispues `nai in` bibira ham man-mangagau dispensu. Mangeftau pot familia yan mauleg na bisinu! `An masa tininun mami in` tetchi gi sirasimi` yan asiga. Ha kubre nesessidat familia `nai appenas boka.

Amiguhu: Hu soda` un` atuñgo`hu mampus triste yan disganau. Hagas otdinariu na mañan tautau. Gi uttimu biahe `nai umasoda` ham magof yan i asaguaña yan famaguoña. Lau inadite mafanana`an “depression”.

Un` chenot ni parehu yan matai kandet `nai enteru sistema-mu homhum. Ha tutuhungue` gi titanus todu papa` gi tatautau-mu estake ni mona ni tatte. Ni para un` chochu problema pot malelefa hay oran sentada. Megaiña gi ha`ani-mu fana` luga gi halum guma`.

Makat na pinadesi este i maliñgu todu ganas yan esperansa. Masepara yan familiaña pot guaha minasa` na una fan tailaye. Lau katma yan pas ha`aniña. Hu ofresi ayudu lau kontentu gi para u saga giya siha sin u fan estotba. Hana` ma`ase`yu` pot hagas brabu yan magof na prohimu.

Biyinariu: Giya New York gi 1985 mamomokat-yu` para i UN `nai ha agañgyu` un` amku`. Ha pega un` puñu` kandin ridondu ni mandikiki` gi kanaihu. Hu chuli` ya sige hu kanu` gi karera-hu.

Kuattru oras dispues gi biradahu huli`e manadan tautau mamifila gi menan ayu na amku` masaluluda. Ti hutuñgu` na biyinariu ginen ayu na kandi i hana`e-yu` ni mabebendi todu estados, un sen kada unu. Sumugu`yu` ya hu gu`ot kanaiña pot ha pañgun sensian himimidi giya guahu guihe na pupueñge na tat ti siña gi hilu` animu!

Mauleg sa` guiya biyinariu. Guahu kara` yan banidosu-hu!

Un Popble: In` hassu gi mediu sisienta siha na sakan `nai lumiliku` i defuntu Tun Tomas Rios (Tagalu) mañañgane ni tinagu` Santa Maria tinayuyot lisayu? Era, finatoigue i amku` gi maigo`ña mina ha usune lumiliku enteru Saipan.

Taya` dinidahu `nai huhuñgug finu ayu na amku`. Gi primet lugat ha atrebigue` lumiliku` umesañgane haf` finu` Santa Maria. Taduñg yan sinsiyu ayu na sinisedi giya guiya i amku`. Dos mesis dispues huli`e gi sankatan siha na soñgsuñg animu chumalapun tinagu` nana-ta as Santa Maria.

Mientras tantu, i silensiu yan katma ni hu huhuñgug hana` chachatsagayu`. Guaha mohon dañkulu na ira mamamaila` para hita? Puede lache suspichoghu ya ti destrosiun ira para u fatoigue hit.

Fañuchanan: Mauleg i finattun tiempun uchan (fañuchanan) ni inesgaihon halum ni fresku na mañglu` ginen haya. Tinilaika i katma yan silensiu ni umestotbayu` pot dos mesis na tiempu.

Na chatsaga na klima pot ti otdinariu. Entre ira `sino dinimalas umuririya `nai sige halum kulan un` saki gi pueñge. Mit grasias sa` sumuha. Dañkulu inañguhog-hu giya guiya na u felis i tetehnan hinanau este na sakan. I bendisioña u gaige giya hita!

Ha kone` ñaihon-yu` tatte gi hagas kusinan mame gi antes na guma`. Ayu `nai makreansa-yu` muna`lagu gi feggun hayu. Tai atparehu magahet masan hinegsa` foggun kontra elektrisida. Fitme na krineansa ginen i mames yan sinatusan na nanan mame!

Mattiru: Umasodayu` yan un` tautau-ta ni prefektu kustumbren Chinu. Kontodu basula ha miskenuye! Ni pineduñg niyog ti un` finaburesi. Tihu komprende na kustumbren tautau. Hombre, tautau isla geftau na finañagu!

`Nai masuette-yu` atulai huna`e dididi` para i familiaña. Ti malagu` ha chule` pot no unafañage-yu` `an guiya gai suette. Pot abundansia mina` hu hassugue` i prohimu yan famaliaña. Ahe` ti ume`esuette-yu`. Dispues kustumbren tanu` i inana`e `nai bula fina` suettemu.

Desde ke huli`e haf` na kustumbren tautau hu chagu`e. Malolofan ha` sakan ni hoi ni goi. Ni para bai ayu`us sumen appenas. Magahet na kontentu giya guiya na maisa. Un` biahe hali`e na huhahala i tekin yan kantidan atulai. Umuriya para u fan ayuda. Hu señas na usuha sa` man-estototba. Ni un` atulai tihu na`e. Dimoñu!