Humidde na gima’ saguale

I ha’ane nubladu inakompapaña chata’an. Ni un’ paluma mattu man-bisita gi troñkun lemon na oga’an. Sige lumiliku’ hinasoghu pot gima’ saguale ni hu hatsa gi un’ taduñg kañadan guinefi-hu.

I satge gaige dose pe ginen i tanu’. Bintanan sanhaya ha fafana’ ‘nai dodoku’ i atdau yan i pachot mañglu’. Hu afte añglu’ troñkun karisu. Gai gua’ot ni hu pepega gi un’ banda ‘an kahulu’yu’ dispues de lemlem tautau dumeskansa.

Ti nesessariu kandet sa’ suffisiente ginen ma’lag mapagahes. ‘An gualafon i pilan, gaige gi hilu’ tasi gi sanlagu gi oran ‘las kuattro ha i’ina i kusinahu gi sanpapa’. Oran manotnen guafe para bai’ na’loglug i primet na takurin kafe.

Todu katne yan guihan hu ha’me gi hilu’ i feggun ‘sino hu tala’ gi hilu’ sin i kusina. Mamagteyu’ hanom para usuhu, diariu.

Hu utut un’ to’a na tañgantañgan kulan baston. Huna sesetbe ‘an hu osñgan latan nababue ‘an para bai nachochu i gahu puetka.

‘An brabu siñienteghu, hu usune mañguha un’ iñgglera para kamute. Huna’ setbe kubu man-guadog hoyu para simiyan choda. Hu ususune i kama’ ‘an para bai fan rempesa gi oriyan tinanom golai siha yan gulusina.

Gaige gi oriyan guma’ man-loka’ troñkun mames yan niyog kulan payu ni umatahe ininan atdau diariu. Manotohge i paluman chuñge’ gi ramas tatkilu’ gi tiempun mañada’ yan kuleka ‘sino deskansu gi biradan tasi.

Tai bisinu i lugat pot ‘nos kuantos miyas. Pa’gu ‘an guaha man-bisita peskadot ayuyu yan binadu guaha ‘nai mapoluye-yu’ paketin chupa ‘sino mahulog i ramas troñku señat na man-ginen ayu siha. ‘An abundansia, huna’ guaha fina’ neñkanu’ gi kusina para usun niha.

I katen paluma pat finatton motmut uchan ‘an chatagmag-yu’ pumapañgon. Atbettu bintanahu ‘an pueñge ‘nai libianu hu li’e man-bonitan miyon pot miyon na pution siha gi lañget.

Hu dimimoria todu troñku gi oriyahu kontodu ‘an poduñg añglu’ ramas siha ni sessu man-binila ‘an chata’an.

Paluma ni umayu’us-yu’ ‘an oga’an hu poluluye na’ña poñgpuñg pan. I katun halom tanu’ lokue’ hu asisiste pot hana’ fan ñusuha i chaka’ siha. Libre pinegsaihu siha gi oriyan lanchu.

Gaiga’yu’ galagu hu fana’an Skipper. Hasan humauhau. Fiet na gachoñg. Pot ti sessu umesalau kumonfitma na pas yan safu i lugat. Lau lumililiku’ gi propiadat ha rikononose todu.

Guaha ‘nai man-dalagyu’ taleyeru layeye pot para bai’ libetteyu’.  Gi halom dos tapada ya ha kone’ buyadan tiao mauleg siempre patteghu para kelaguen pat inaflitun pattun. Finu’ un’ tiuhu, “finababa i finadeni’”.  Hu asnen tukun pumalu para ‘an guaha fina’ agu’un haya tat kumu saubog sune pat chodan tanduke ‘sino pinada’ titiyas.

Estorian lanchun kueru gi hinasoghu pot akomparasion yan modetnu na linala’ natibu ni muna’ fañgikilulog hinassota na tiempu. Guaguan guma padet ni chinaflulun interes ni bañkon ifit yan apas insurance fuera de ha gu’ot insurance ha’animu!

Gigon ti un’ pegaye air-condision pues haf’ na tostus panroyu hau. Pinalo’pu’ otru obliglasion gi guaguan kandet. Trabiha ti humahalom lamayot patte gi otru obligasion familia siha. Haf’ linala’ta na mamunu’ troñkun niyog. Buente ta letke haf’ diberas nesessidat-ta pot para tafan mama’ si Mr. and Mrs. Jones! I hinatsaghu gima’ saguale solu gi guinefihu!

Minagof gi sadog hinimidde
Ha tuñgu’ si nanan mame nesessidat kada unu. Lau megaiña besis na ni sinsiyu gi pottanmonedan familia. Mañaunau ham gi rinikohen para sentadan yan mantension todus.

Megai magahet man-chatsaga guihe na tiempu pot appenanas cho’chu’ gi hiniyuñg i Navy. Man-suette lamayot patte na memetgot ha’ trabiha tradision fangualu’an ni mafalague ensegidas.

Tat kusina ti a’asu ‘an chatagmag. Kontodu hame in’ usune finatinas amotsan oga’an antes de misa. Dispues de eskuela, in’ tilus ham para i lanchun As Perdido ‘in assiste tinanom yan pinegsai. Esta i lemlem tautau na in’ bibira ham tatte.

Gi uttimon semana, entre gualu, man-dalalag peskadot ‘sino peskan halom tanu’ ayuyu, manog hatsadu yan man-hale’ gatdu’. Magahet na man-suette ham guihe na tiru siha na metgot inarikonose yan inafoglfi’e bisinu siha. Todu mañaunau gi che’chu’ komunida tat kumu gupot patron yan nobena. Taya’ trastes mame ‘sino materiat lau man-machuchuda’ ham kinententu yan minagof!

Inebaluan adelanto
Yangin ta ebalua satton kinalamten-ta, ta pepesa kau haf’ na adelanto mattu gi linala’ta gi todu hinanau familia. Finenina ta pesa kuantu fuetsaña i pesu ni ta gagana pa’gu. Yangin giya Hawaii $.85 fuetsaña i pesu, kuantu mohon guine ‘nai mas guaguan i gaston linala’?

Maila ta po’lu na $5.50 gi ora un’ gagana. Ileghu na menos ke bente siñko sientimus fuetsaña kibleta gi kada pesu. Ala kuenta $.40 un’ chuchule’ para i gima diariamente. I tutat depende gi kuantu un’ gagana gi ora. Lau fuetsan kada pesu ennau i $.40 sientimus ya i monedan gi mediu mes $32 pesus. Siña mohon disientamente un’ prebeniye familia nesessidatña? Pega i mismu asuntu gi fumafaisen hau botu!