‘Hita Ni Tautau’

Gi alacha ta sedi man-sabiun i hegsu I Deni` na siha u inina yan dispone asuntunto-ta siha. Pa`gu na eleksion, klaru na todus man-malagu` chumule` tatte ennau na direchu ya hita ni tautau ta dispone futtuna-ta. Mampos chatsaga linala` mayotmente punta pot punta guine. Ni unu mumirese sasalaguan na modun linala`.

Namatman na sen taya` yine`ase` gi tautau siha gi señgsoñg. Puru kaprechon betsan niha finenina ke adelantun kualidat linala` i publiku. Inipos este na insuttu gi tautau siha. Muñga mana` chagu`. Atan pagamientomu `sino monedan familia ya ennau `nai un` giha disision na biahe. Mattu oran tinilaika ya sumen presisu na este na diniseha u fattu gine kada unu.

Atan sueddomu ni gatdun pot 20 años na tiempu. Atan kumahulu` todu deste kandet, hinemlu`, yan balen nesessidat familia. Estague` na puntu i ma-upus ni man-sabiun I Deni`. Hita ni tautau siña muna` para este na diskuidu. Tana` fagpu` na Noviembre dia 4.

Aidentifikasion Kuttura
Sige i achagu` na diniskute pot hafa aidentifikasion kutturan natibu. Pot tatnai ta oppe klaru este na kuestion mina` kulan hit i paya`ya` pot mas ke kiñientos años na tiempu.

Buente pot 400 años ni man-madispone hit ni Españot, Haliman, Japones yan pa`gu Amerikanu na sige hit ha` man-gupu sin direksion gi guinaifen mañglu. Gi mismu tiempu todu chumage kumepunu` liñguahita lau ni unu felis. Diberas na insuttu i para tafan mafa` naufragu lau hita i dichu dueñun este siha na islas.

Hafa kuttura yan tradision? Kau gaige este gi estorian Taga` yan haligen achu`? Relasion natibu gi tanu` yan tasi? Modun tinilaika siha gi lina`la` natibu? Haf` `nau na modu? Liñguahe? Sunidu yan baila? Fandañgu? Antigu na haladun guaka? Sombra petmanente tat kumu troñkun niyog yan lemai?

Gi mismu tiempu dañkulu matulaikaña i hagas tautau guine. Esta megai tautau hiyoñg `nai gi mismu tiempu mesklau i tautau deste linguahe, rasa yan kuttura. Kau para ta petsige hafa tradision natibu pat tana` fan daña yan kutturan otru?

Mauleg in` atetuye este na asuntu siha sa` gai mutmorasion i ta fafana`. Bes enkuandu puede u guaha antau na inatuñgu` pot para ta ke pula` haf` aidentifikasion kutturan natibu. Mientras mas este chadeg ta komple mas lokue` libianu ta fanague famaguon pot haf` tinatten niha gi hilu` un` fitme na pisu. Ginen este na animu `nai siña ta pega famaguonta gi kabales na espiritun niha kumu famaguon natibu guine gi O`Perlas iya Pasifiku.

Ni unu ta displanta
`Nos kuantos besis hu repasa estorian este siha na islas pot para bai` li`e kau haye i natibu ha displanta deste antigu na komunida guine. Taya` sineda`hu fuera ke madisplantan natibu ni gobietnon ginen hiyuñg lau hita i man-dueñun tanu`. Dios mihu!

Magahet na guaha chinatsagan hinalom mesinariun Españot kontra man-ma`gas Chamorro pot kinembetten relihion. Dispues kumayada ya sige i natibu umeyag linala` kilisyanu. Ginen este na pisu na gumuaha nuebu na areglu pot haye siña man-gai tanu.

Adumididi` sige man-eyag i natibu areglon komunida estake guaha ma-apunta gobietnon Chamorro. Sige mona mas kapas i natibu gi pinetsigen hafa` mauleg para i tautau siha gi komunida. Tinaka` tiempu este siha na areglu lau enfin ta tutuhon umuma achon nina`en mañainata gi disposision linala` todu.

Deste Tutuhon Tautau
Deste ke mafañagu i natibu, dos asuntu ha fagcha`e: dikiki` tanu` yan dañkulun tasi. Este i dos rikesan iya Marianas `nai luma`la` i natibu.

I mañainata, deste antigu na tiempu, i tanu` `nai maprebeniye nesessidat mantension familia ginen fangualu`an. Ginen este na fiñkas `nai man-maprebeniye lokue` famaguon pidason tanu` gi inestablesen nuebu na familia. Kustumbren tanu` i para u hatsa fanliheñg familia i lahe antes de u akamu`.

I tasi sumetbe dañkulu gi mantension familia yan membron komunida. I galaide` sakman ni dañkulu manasesetbe pumeskan chagu` yan taduñg na tasi mas ke 500 miyas huyuñg. Mañugu` Mañagaha mana gasgas kineni` man-dañkulu siha na guihan antes de u tulus siha halom gi tanu`. Gi todu atmos banda, tanu` yan tasi, hagas dueñu i natibu ginen tradisiona usun tanu` yan tasi. Hu guadog pot asuntun tasi gi antigu na tiempu. Estague` pisun dueñun tasi gi oriyan iya Marianas.

Minan Tasi
Fuera de man-dañkulu siha na guihan ni lagse` gi metkao iya Japon, Taiwan yan otru nasion giya Asia, gai mina tasin iya Marianas gi man-guaguan.

Puede ginen mauleg na inatuñgu` yan federat u fan mirese Marianas ayudun salape` gi haf` siha na mina para u fan makusecha gi ge`fena.

Gaige futtunan ekonomian i tanu` gi minan papa` tasi. I offisiat iya Marianas debi u ekuñgog haf` siha man-masusesede pot este na asunto para mona. I man-dañkulu na kompanian man-dulog minan papa` tasi siempre u fan halom man-mamaisen petmissu man-bisnis guine minan fondun tasi.

Gi hayan Marianas, miyas pot miyas gi tasi-ta na “yellow fin” lumalauya hulu` yan papa` Japon. Estague` otru mina siña ta negosiu yan Japon makusechan este na guihan. Mauleg ta tutuhon kumayon inatuñgu` yan propiu ahensian federat taimanu `nai siña u guaha ayudu ginen siha gi este ns interes.

Relasion yan federat
Mauleg u guaha kinemprende gi halom natibu na i inakonfotman Covenant yan federat petmanente na areglu. I para takayon antau na relasion yan federat gaige ennau giya hita.

Debi ta tutuhon kumomprende hafa sustansian para ta gobietnan maisa hit. Muñga na kada ta fagcha`e problema ta sogne i federat. Hita timoneru ni goibetno-ta deste 1978.

Hita man-mamatinas disposision siha gi asunto-ta deste 36 años malofan. Taya` kumayon estao iya Marianas pa`gu soluke hita mismu.

Poresu na presisu ta tutuhon kumomprende hafa signifikasion operasion gobietnu. Este na obligasion hita ni manman-apapase kontribusion tax muna` posisible. Estague` na puntu `nai kada unu debi u kuestiona taimanu `nai manasesetbe nina halomña kontribusion tax. Kumu ta komprende este na puntu ya fuetsau ta choneg mas man-fitme siha na disposision, siempre u libianu mas hinanau-ta.