Hinanau Famaguon-ta

Gi fina` konbetsasion yan dos senadot ginen Luta sige de in` ebalua i hinanau manma-eduka siha na famaguon-ta para otru lugat pot taya` appottunidat disiente na cho`chu` guine para siha.

Ayu na hinanau seguru na petmanente. Mampos nina` chatsaga i dos senadot as Terry Santos yan Paul Manglona.

Dos patte `nai maliñgu iya Marianas: Gaston miyon pot miyon pesus gi salape scholarship ni otru umaprubecha dispues de manma-gradua famaguon-ta. I hinanau manlistu na famaguon-ta para u fan man-ayuda gi adelantun tano`ta.

Apenas `sino taya` appottunidat yan kampu guine piot gi inestablesen tinituhon familia. Bula mas appottunidat guihe lagu deste cho`chu`, mauleg na komunida, hospitat, yan eskuela para i famaguon niha. Estague` na patte gi litratu i taigue guine. Mauleg i hita mismu dumisplanta tautau-ta?

Ilelegña si Santos yan Mañgloña na debi man-ma`gas Marianas u ma-espiha manera `nai siña man-maprebeniye famaguon-ta appottunidat guine pot no u sige man-hanau para otru lugat siha. Magahet na na`pinite i taya` kampun niha guine mañaga `nai siña ginen manma-estudian niha u tutuhon muna` guaha siha mas antau yan edukau na tinilaika siha. Lastima!

Un` lahihu mampos disganau sa` dimas de u tutuhongue` geran ideu gi adelantun iya Marianas mas te`ug i politikan natatah `nai mantai bali i manma-eduka na grupu. Kumu saina hu tutuhon humusga kau este futtunan niha i manma-eduka siha na famaguon-ta? Haf` mohon hinassun miyu?

Tiempon Añglu` yan Maipe

Ha tutuhon humatme hit fotte na tiempun añglu` yan maipe. Este na mattirun klima finenina hana` añglu` i tipu` siha `nai machuchule` hanom i señgsoñg.

Puede ti mattu gi eskaleran sapet para i publiku. Siempre kontodu eskuela yan hospitat gumai problema hanom. Dios mihu na sapet para estudiante siha.

Haf` este na alifanten dañkulu ti halom sala ni ti siña ta dulalag. Fuera de higante ni unu tumuñgu` kau u lachai hit muna` fangalileg.

Mauleg kada familia u preparague` manlupog hanom parehu ha` gi halom kemun sanhalom yan bañu. Debi u gasgas i kemun kada monhayan manasetbi.

Antes, mauleg sa` gagaige ha` i kemun sanhiyuñg. Pa`gu, puru kemun atileg. Gigon taya` hanom todu dia mamadesi hau inatileg guieñg gi halom fina` ti senkilisyanu na paguan. Dios mihu na chandan modetnu na linala`. Preprara linipog hanom pot no in` fan mamadesi.

Machalapon Na Karera

Maseha machalapon, guaha `nai namagof ta huñgog grupu man-e`esalau pot direchon indihinau (natibu). `An un` ekuñgog, kada unu kumakanta difirensiau na sunidu. Unu gaige As Matuis, i otru gi Deni, Kagman, sige luchan esta As Gonno`. Sige machalegua` siha sin dinaña` yan otganisasion.

Nanalau `an man-e`salau para ta presetba finu` Chamorro. Muñga manasetbe lau presetba taiguihe inasnen tukon ni ta pega gi halom taru.

Dispues, sige ta`lu man-esalau para tafan finu` Chamorro. Lau nubenta pot sientu gi gima` Chamorro man-finu` E`Englis deste oga`an esta`i minachum atdau.

Dopble problema sa` mapega gi eskuela yan finana`guen famaguon hila` nanan niha kumu segundu liñguahe. Ha komple i PSS obligasioña gi este na asuntu. I mañaina lumaime famaguon niha guine na puntu sa` diariu man-finu` E`Eñglis. Haf` mohon?

—

Si bihahu: Hu pulan si biha-hu antes `nai sige ha tutoñg i mai`es. Ha pada `stake ridondu dispues `nai ha pega gi hilu` maipe na komat. Paire na pinada` titiyas para amotsan talo`ane yan flitadan babue.

Dispues, matachong ya sige ha ugas i mendioka. Ha pega gi un` banda para u tunog i asientoña antes de u tala` gi papa` somnag. Paire na asientu gi na`yen neñkanu` siha.

—

Fuetsan Espiritu: Guaha siha na lugat guine trabiha man-diskalentau kontodu kanton tasi. `An matuyu` Obyan kulan madudulag-yu` madudulalak. Ti hu komprende. Buente pot chagu yan i señgsoñg na matataguyu` humanau chadeg.

Gi kanton tasin iya Puntan Muchot otru lugat ni kulan trabiha ti kilisyayanu piot gi lemlem tautau. Guaha `nai huhuñgog burukan finattun galaide ni ma-esgagaihon halom gi kantun unai. Lau ni unu gaige. Kase mattu i ora `nai debi bai diñgu i lugat. Pot respetu gi man-antigu na humanau-yu` sin ditension.

I telai iya Tanapag otru lugat ni sessu-yu` manayuyot konrespetu gi un` ante. Era, guaha un` palao`an mapotge` `nai ha sufa` i haligen telefon ya achamatai yan neniña. Pot respetu tinayuyot-hu kada biahe.

I kanton tasin iya Chalan Laulau lokue` hu respeta i lugat. Chamu` chumachansa dumisatentu sa` mana` kilulog hau tula noche putin tuyan. Soluke ma-amte hau suruhanu, ti un` diniñgu estake machapag giya hagu.

Poresu na maseha ñgai`an na tiempu dañkulu respetuhu gi tafanana`an espiritu `sino animas. Ti achaiguata mina` mamirese respetu maseha gi hechuran espiritu.

Pa`gu i gima` mame maseha ñgai`an diskalentau i lugat piot ya huna` bubu i magahaga` gera. Mauleg na umapayune ham kustumbre.

—-

Inutet Na Patgon: Umasoda-yu` yan un` inutet na patgon, tañga yan udu gi alacha. Sumeha-yu` para bai` keli`e` haf` mañaña i prohimu. Sige chumaleg kulan mohon ti inutet. Puru usun señat kanai `nai ma-adiñgañgane.

Namagof sa` i famaguon matuñgu` na inutet i patgon ya kada ratu ma-asiste `sino marikonose haf` nesessidatña. Hana` chatsaga dididi` inasoda` mame layeye pot sige hu ebalua haf` mohon futunaña `an sige mona.

Kau u guaha ayudu suffisiente para guiya? Pot hu chage mañetbe kumakama na malañgu mina` hu komprende i asuntu ni binalulutan sa`pet parehu ha` para i saina yan malañgun patgoña. Hahassu i man-malañgu yan inutet siha gi tinayuyot miyu.

—

Ninalagun Nana: Sessu hu faisen maisa-yu` haf` na i ninalagun nana na sentada sumen mañge`? Achog hinegsa` pat kineman satdinas yan biriñgenas paire na boka maseha ñgai`an `nai ha planta. Todu mansilensiu ya duru magulusune finatinas nana. Haf` na taiguine este?

I mismu putahe guahu munalagu. Lamegai sopbla gi platun mañena guihe na pueñge. Parehu neñkanu` lau i finatinas nana i malachai. Hu repite lau parehu masusede. Hu birayu` tatte ya hu faisen maisayu` manu `nai gaige i difirensia.

Era, i ineppe gaige gi inañgoghun patgon gi as nanaña. Deste ke patgon si nanaña pumulan estake echu tautau. Estague` i difirensia, taigue gi neñkanu`. Haf` ha pacha debi u mauleg para i tropa maseha ñgai`an na tiempu. Kontodu guahu dispues tat ninalagun nanahu tihu daflogue kada ha planta gi lamasan sena.