Hinanau Amigu as ‘RC’

Solemne na saludu para i amiguhu yan tatan mame as “RC” (Jose C. Cabrera) ni dumiñgu hit guine gi mapos na semana. Respetau yan sumen mauleg na kilisyanu mina` mauleg atan tatte finaposña.

Maseha fotmat yan frañku si RC gi todu ha petsige, kariñosu yan gai yine`ase lokue` na korason tautau. Apmam yan i defunta asaguaña as Tan Rita de mumaestro. Apmam lokue` de ha ayuda si sugroña Tatan Bisku gi bisnis. Dispues mañetbe gi Marianas District Legislature esta i 1977.

Hafa si RC pinegaña kumu petmanente lastru yan rekueddu para i manatatte? Deste ke hu daña`e familiaña gi `nos kuantos fina` sena, hu li`e na fuera de metgot yan mañge` na dinaña familia, hana` ya hululu` edukasion yan kanta gi famaguoña.

Man-ma-eduka mauleg mientras dos dumadandan entre yan uttimon semana gi gima` Yuus. Estague` i dos achon ha pega kumu rekueddoña gi famaguoña. Un bittu ni hu tatiye ginen as RC i klaru yan frañku umadiñgan. Gi mismu tiempu grasiosu, kariñosu yan motmut yine`ase` gi mamopble na prohimuña siha.

Un` tiempu sessu man-hame sumugun ga`ña guaka `an guaha fina` matai ya mamaisen i familia guaka pot che`chu` pininite. In` chegue sin ditension ya in` ayudaye kumatga gi sahyan dañkulu. Guaha na apas ensegidas. Guaha ha` lokue` umahnanau ti ma-apase.

`An in` kaikai ham para bai`n fan mañgopbla ha choma ham sin ditension. Man-añgoghu gi disposision ginen hilu` ayu na ilelegña chamu kekepbla piot ya na`mase`. Dispues de ayu ni unabes `nai mente pot dibin guaka gi `nos kuantos familia.

Hu li`e mas mauleg sensiaña `nai finaisen ni ginen obispota tanu` giya Kagman para usun gima` Yuus. Sin ditension ha entrega ninaiña tanu`. Gaige pa`gu Gima Yuus Santa Soledat giya Kagman. Megai na famaguon para u fan matatpañge, primet kumuñion, konfitma yan madottrina pot lugat ni nina`en RC tanu para ayu na komunida. Fino`ña, nina`en i Saina ya dididi` ha` finaiseña para benefision todus gi machalapon finana`gueña. Estague` `nai mas `nai anog yan klaru gineftau i amiguhu as RC. Parehu ham man-na`e tanu` para Gima` Yuus.

Lokue`, kada sakan gi ha`anen gupot siha sumasaunau gi nobenan hagaña `ni manafagpu` kanta, “Tafan Magof Todu”. Ilelegña patte, “Jesus Yuus mame, gi nuebu na sakan, gai asi` nu hame, apatta i dañu, na`e ni deskansu i mangaige `sta gi naftan, yan ayu seha kassu matai na sakan”.

Kada sakan gi ha`anen gupot, sumaunau gi nobenan hagaña `nai sessu manafagpu` kanta, “Tafan Magof Todu”. Ilelegña un` patte, “Jesus Yuus mame, gi nuebu na sakan, gai asi` nu hame, apatta i dañu, na`e ni deskansu i mangaige `sta gi naftan yan ayu seha kassu matai na sakan”.

Esta humanau i amiguhu gi galaide`ña gi katman na tasi gi lemlem tautau. I lago`ta umarega gi halom mapagahes ya u fresku kareraña. Umatagam ni man-añghet ya umakonduse guatu gi Nanalibreta para u risibe I guaguan na premium. Pot todu RC Si Yuus Maase`, bien biahe. Si JR.

Gi halom man-tomtum

Macho`chu` yan malulog-yu` gi halom man-menhalom, tomtum yan edukau na man-ma`gas nasion isla siha gi todu atmos bandan tasin Pasifiku.

Deste primet palabran `nos kuantos guihe na redondu libianu un` li`e mañgalagtos niha. Ayu `nai hu pessan ñaihon i taduñg na kinemprenden niha gi man-sustansiau siha na asuntu. Todu i tiempu pot adelantu gi tautau ni marepresesenta ya hululu` gi intension yan disposision asuntun linahyan.

Megai `nai hu tañga na taiguine mohon na modu yan eskalera ni makondudukta dineskuten asuntun publiku guine. Lau mampos chagu` na puntan tasi `nai ta huhuñgog ekun haf` propiu para i linahyan. Sessu fatta mañan tomtum yan menhalom gi asuntota siha gi hegsu` I Deni`. Kau mampos kanifes i mañglu` guihe hulu`?

Dispues de hu akanteha hafa sessu mohon na taiguine finatsoña konsiderasion asuntun linahyan siha. Umanog primera defektu gaige gi eskaleran edukasion membron lehislatura. Man-diniñgu ni asuntu siha piot sa` lamegai ti man-paha gi tinaitai seriosu yan estudiau siha na materiat asuntu.

I asuntu siha mas man-komplikau `nai fuetsau debi i manma-eduka kolehu na tautau-ta mauleg ta pega deste pa`gu mona pot seriosu na che`chu` areglu. Yangin pot huntan masge` pues hagu mismu para un` sapet maisa hau sa` lache talu pinegamu halom. Haf` mohon? Puntu: Ta nesessita manma-eduka kabales na kabayeros gi kuetpon lehislatura. Ti hulat esta hinasson konsihiliun municipalidat!

Ginagau Tiempu

Presisu ta dimanda kualidat na representante gi kuetpon lehislatura. Satbasion tautau-ta gaige na mau`udai gi kualidat tautau ni ta pega gi hegsu I Deni. Debi ta suhaye asuntun makana` pantie famalao`an giya Garapan yan gayera. Haf` na in` i`ipos primera asuntun ekonomia?

`Nai kahulu` gaston linala` 85 pot sientu, guaha sineda` miyu atte para in` ribaha minasapet familia siha gi señgsoñg pat kadu` ti in` li`e i pinadese pot diskuidun miyu?