Gi puntan kantit iya Magpi

Mediu pot para bai` e`fresku, hu sugun karetahu esta`i puntan Suicide Cliff giya Magpi. I tateghu katma `nai gaige finaposta siha. I me`nahu dañkulun tasin Pasifiku inadotna ni pajaru ya tinampen ñaihon ni asgun kulot apu gi chagu`.

Mientras hu haguguñge fresku na mañglu` sige umafulu` hinasoghu yan i presente na momentu ni basnag gi halom rimulinon sadog appretau na konsiderasion asuntun linahyan siha. Humalom ayu na finu` kuentos, “Pa`gu i futturu”. Gai minakat ma-akanteha signifikasioña pot fuetsau debi un` faisen maisa hau: “Hafa Futtuna-ta?”

Kulan mohon nina`ye timoghu granu matditu ni muna` ke`yau kontodu hinasoghu. Ti siña hu danche i dibinahu haf` na mampos abarambau areglon publiku siha na tiempu. Tihu li`e usun fotmat na planu fuerake masaulag supin tasi kulan nuebu na modun satbasion.

Seriosamente, areglon futtuna-ta, pa`gu. Yangin puru konbiñiente yan pot politika pues hafa i publiku para u ekspekta para guiya antau na disision deste otru sakan?

Inadahen Tradision
Magahet na megai na asuntu tumane` i katma na hinasso-ta na kontodu i mas man-presisu man-matcha gi papa` guieñg-ta ya tita repara.

Pot ihemplo: Deste antes kumu patgon Chamorro yan Karolinas ta konsidera kumu tautau-ta. Uttimoña mana` guaha areglu pot midision haga` lamayot patte pot dumueñon tanu` guine.

Mauleg na intension masustenen tanu` gi halom natibu. Lau `nai un` fatinase areglu ni tai bali pues haf` makomple fuera ke manadan chispas to`la?

I otru pot irensian tanu` mañaina ni hagas patte gi tradision natibu. Mana` guaha otru areglu pot este lau umakontra yan haf` hagas mapraktitika gi halom dinaña` familia. Acha lache na areglu ni mas propiu sagaña i kantit iya Agiñgan!

Puru che`chu` impetu yan aplacha` na intension. Lau `nai mabota i casino, mañaunau todu `nos pot prisipiu lau prinsipat patten moneda gi sanpapa`. Estague` na klasen representante debi fuetsau u fan mafanu`e ni uttimu layag para lagu gi puntan tasi!

Edukasion Famaguon-ta
Sige inayotten estrakadan moneda pot PSS, NMC yan priniponen nuebu na programan ritirau. Ni unu gai sustansia fino`ña. Todu lumetke impotansian edukasion famaguon-ta. Yangin tin inna` presisu pues ni hame lokue` ni mañaina taya` presisu botun mame giya hamyu na biahe!

Katgadu dibi yan obligasion, komprendiyon. Pues gi halom listan sisitan na asuntun publiku debi u fofo`na i edukasion yan hinemlo` i tautau. Polu i otru siha asuntu gi santatte. Dispues, atan sa` paramona mas menos moneda `sino fondu gi kaha. Lamegai na buruka para u fañgahulu` ginen este na chinatsaga.

Estague` na puntu `nai mafattu kabales i publiku man-hassu haf` futtunaña. Yangin para kada ratu in` fiñot gi un` banda, na ti pot famaguonta na kanaha` ha pupunu` siha man-machochu`? Na ti edukasion i solu asegurau na sahyan futtunan famagon-ta?

Ti gofha`an i tiempu
Ha saulag hit ti gofha`an. Nubladu. Dispues ha pegague` mafanana`an “uchan matde”. Un` klasen chata`an na puru espantu lau sumaga gi sanhilu`. Kasse sague` tasi `nai ha chalapongue`.

Estague` na klima chumoma` i paluma mañugu` gi troñkun lemon. Mampos silensiu ya taya` hu huhuñgog fuerake poduñg uchan ginen i pipoñg.

Dinanche i ha`ane yan katdun manog. Hu lagnos dos Corneys (manog dikiki`) para bai katdu. Gi dispasiu na guafe debi u paire kadoña. Hu kelaguen mana`ihu tiao ya huna pikaka. Kasse todas `an matachoñgyu sumena gi lapupueñge.

Mattu gi dispasiu finalagon este na ha`ane na esta hu birayu` tatte manaitai tinige San Pablo gi biblia. Guaha siha fino`ña na debi bai repasa pot para bai komprende sustansiaña. Si San Pablo i makonsidera kumu guiya i mas intellihente gi halom dose na disipulu. Bai bibirayu` tatte gi guaha siha na puntu ni ha esplika.

Halom simienteyu
`Nai sigeyu` halom gi seputturan dos che`luhu, hu huñgog gi bisinu un` tautau duru fumofu. He eñglu` ya era guaha pumega fechan ha`anen finataiña Disiembre 2013.

Hu faisen haf` chinatsagaña.

Ilegña, “Esta mauleg este pa`gu i ti siña-yu` matai?” Hu ñañgon na u sinset i mapega na fecha ya guiya mismu u aregla dispues de finataiña. Lau taimanu `an estague` matai? Ai na grasia ham na dos gi halom simienteyu.

Ha faisen-yu` haf` inañgai-hu. Hu oppe na ume`elugatyu` sa` malachai ni hagas applikanten homestead i tanu` simienteyu deste alacha. Sige ta`lu chaka chalegña.

*  *  *

Ha faisenyu` amigo Magoo hafa para u sañgane un` palao`an ni esta dos na black eye gi mataña. Hu uppe taiguine: “Sis esta dos biahe masañgane hau para un` huchum sikosmu”. Dos pot dos biahe! A` Saina!