Gi bespiran Noche Buena

Agupa` na ha`ane i bespiran Noche Buena. Baba korason miyu kumu preparasion finatton i Nanalibreta. Ta tatiye tinago`ña pot inasi`i gi prohimuta ya u ñahlalañg siñiente-ta gi ha`anen Noche Buena. Ta gagau lokue` bendision-ta ya U ayuda hit gi nuebu na sakan.

Echa lokue` kada patgon bendision ya u felis kareraña gi nuebu na sakan. Tafan adiseha de nuebu gi hilu` pas yan ginefli`e unu yan otru. Felis Noche Buena!

Probleman Hanom
Entalu` Kanat Tabla esta iya Afetñas imbeninau i hanom ni gaselinan ruplanu. Hagas gaige este na problema lau ni unu kalalamten para umake satba pot proteksion hinemlu` publiku.

I CUC yan DEQ kulan maleletke i asuntu. Mina trabiha ti a`anog problemaña este na asuntu pot bubula ha` hanom ya ginen papa` `nai machochopchup hulu`. Gigon marebaha ñaihon siempre gaselina `sino imbeninau na hanom madispacha gi tautau siha.

Gaige gi menan St. Jude na gima` Yuus un` tupu` ni mahuchum pot imbeninau i hanom. Hafa ya ha chalapongue` gi señgsoñg siha ni mantineteka? Kau ginagau dispensu nahoñg `an guaha pininu` nu este na diskuidu? Nahoñg fondun CUC yan DEQ para `an makone` para i kotte pot diskuidu gi publiku?

Mina` kulan mahasñgon maletke i asuntu pot ni unu tumuñgu` kuantu na dañu yan haye para u responsable gi areglu yan apas publiku gi este na diskuidu. Kau i CUC, DEQ, Navy pat EPA? Deste ñgai`an na tiempu `nai masoda` i gaselina? Tiempun Navy, Trust Territory pat guine ha` gi alacha? Sin hafa mas na ditension debi umasatba este na problema antes de u lachai muna` fan malañgu mas i natibu!

Modun Pinepble
I kantan Añu Nuebu ilelegña patte, “Jesus Yuus mame gi nuebu na sakan, gai ase` nu hame, apatta i dañu, na`e nu i deskansu i mangaige `sta gi naftan yan ayu siakassu matai na sakan”.

Esta na` tuhu` lagu` `an sige ta kanta este gi misan gayu (Añu Nuebu). Kulan ensegidas tali`e i man-hanau `sta na man-guinaiya-ta kontodu mañaina-ta gi halom hinasso-ta. Todu modun grasia yan pinadese chinahlau lokue` ni nuebu na sakan.

“Tafan Magof Todu” i sunidu i muna`e hit kampu para ta aregla ha`anita dibuenamente. Na bonito este na ha`ane piot `an mattu i Niñu giya hamyu. Bien Añu Nuebu yan bendision para todu!

Mafañagu gi liyañg gaga`
Kuatdiba siñienteña si San Jose `nai man-dadakot gi gima` tautau siha pot esta mampos hihot para u deskatga si Santa Maria i Niñu Jesus.

Sumen maneñgheñg i pueñge, ni kandet gi señgsoñg lau sige ha` si San Jose ha usune mamaisen. Ni unu umaksepta-gue`. Ayu mina` humahnanau estake ha soda` un` liyañg ga`ga` `nai mafañagu i Niñu Jesus.

Milagrosu i pueñge `nai muma`lag iya Belen ini`ina ni man-malag pution ginen i lañget. Sige man-añghet mañganta ma-abibiba mafañagun i Rai i tanu`. I mañan tautau siha ni chumanda si San Jose inipos na bidan tailaye.

Hana` hahassu-yu` un` siniseden dos umasagua `nai mattu un` tautau mamaisen para u fan guasan ya taya` malago`ña fina` amotsan talo`ane. Gi lemlem tautau marikohe sinsiyun niha para umana`e i prohimu lau esta humanau. Sige ma`aligau gi bisinu lau ti masoda`.

Sige mona marepara na tatnai magasta pine`lun niha gi bañku. Mahusga haye pumoluluye lau ni bañku ti siña ha oppe sa` ni siha mismu ti siña ma-arastreha ginen mamanu ayu na fondu.

Mientras megai gi entre hita man-mafañagu gi modetnu na hospitat i Niñu gi liyañg gaga`. Na geftau hau na biahe piot guine gi tiempon gupot.

Apaga` pot apaga`
Tatnai in` repara na ni taimanu modun linala` tautau siempre man-afagcha` hit gi mismu hospitat, sagan katga gi plasan batkon aire, komun, tenda, simienteyu yan otru siha `nai todu mangai nesessidat?

Gi sagan maleta taya` guihe galun first pat economy class. Hala maletamu ya un` ritira hau. `An mana` saga hau gi hospitat, pues parehu lugat para otru malañgu. Gi simienteyu, mas taya` raya guihe sa` siempre tafan añañgon gi ge`papa`. Piot sa` ni neñkanu ni sitbesa guaha guihe papa`.

Pa`gu yan hayumu fumababa i otru, pues nanañgga biradan i batku sa` tat kaga ti para hagu. Dios mihu ya mana` fan fila gi menamu muñga sa` nahuñg kestatmu para esta`i finataimu.

Tai bali para un` aminasa i otru pot banida yan heñiun kabron. Gi finu man-amku` tat banidosu ti tumatke fondiyosña. Pues adahe na un` linaisen pachot putarian sanhilu`.

Minaipen tautau
Sessu hu huñgog gi man-amku` masañgan pot “minaipen tautau”. Tatnai hu attende `sino abirigua haf` sustansiaña. Adumididi` sige hu li`e kurentin i man-sañgan. Ya kanaha` todu birada mana` empas i tailaye na chechu` muron piot i mahasñgune.

Mas ke dies hu li`e pumadese minaipen tautau. Guaha ha` lokue` esta man-marehistra para u chule gi ti apmam patten niha. Gi uttimu besis sumen namase` este na hinanau. Dispues de mahafot i tautau suette `an guaha humassu maseha un` Tatan Mame.

I minaipen tautau kontodu dispues de seputtura un` tinatiye. Dos chatregalu para pattemu: Ginen i Saina, i otru ginen i unna` tailaye `sino fababa!

Pot chaleg: Hu soda` un` hagas fuetsudu na amiguhu. Sige hana`e animu guatu gi pettan hospitat para u ali`e yan mediku. Hu pada` na para bai`n ge`hiyoñg. Mamaisen na hafa guaha. Ileghu, para ta mumu na dos. Ai na chaleg `nai ilegña, “Esta Iku, un` a`ñauyu` diberas”.

Sen malañgu magahet i amiguhu. Diberas matulaikan i tiempu deste `nai manfuetsudu hit estake kontodu pokatta suspichosu. Kulan i atdau ni doku` `an oga`an dispues machum gi pupueñge. Parehu tapbla yan finapos tautau.

•••

Estaba un` amiguhu gi hiyoñg gima Yuus para u attende misan enteru. Ha sañgan dispues na ma`añau-gue` matai. Hu repite na tres asuntu ha` sumen seguru gi linala` tautau: Mafañagu, ma-tax dispues matai. Ni unu siña tana` para piot matai!