Gatbu Na Petlas

Gi un` minañgau pulan, estabayu` gi baranda hu e`eñgulu` i kanai gualafun ginen entalu` ramas troñkun lemon gi tatten guma. Mofona mattu rinegan uchan yan freskun mañglu ginen haya. Hana katma yan pas siñientieghu.

Sige dispues dumandan-yu` ukulele `nai hututuhun humassu tatte hagas kanta-ta siha. Man-na`mahalañg na sunidu siha gi namagof na dinaña` familia piot gi tiempun Noche Buena. Esta guaha `nai hana` mesgu lago`hu.

Kulan ha gacha`yu` triste pot metgot kurentin tinilaika gi tanu` natibu ya gof hasan tali`e tautau-ta mañguentos haf` sentimientun niha. Kau man-atgoyau hit na tautague na inipus mansilensiu hit gi dirichota?

Gi mismu tiempu hu komprende na megai tumatitiye haf` hu tutugi` pot direchun tautau-ta. Hu atrebiyu` gi halum kañadan tituka` pot manyomahlau tautau-ta gi asuntun niha. No señot, pot fabot gachuñge-yu` sa` tihu lañgag namaisa este na katgu. Maila tafan agu`ot kanai gi madefendin direchu natibu!

Klassen Tautau
Maseha manu na tanu`, siempre un` soda` manguaha, kadu` manguaha yan taya` guaha. I mina tres na butai` `nai gaigeyu`.

I manguaha libianu hinaguñg niha, diariu. Todu nesessidat familia malañgag ginen fuetsan fiñkas niha. Walang problema!

I kadu` manguaha esta mandidibi para un` finanu`e na guahague`. `An hali`e na asut meyas-mu siempre mamahan pot para un` finatta.

I taya` guaha no siakassu haf` guinahaña. Kontentu gi taya`ña pat dididi` na suetteña. `An haf` unna`e ha agradesi. Mauleg na heñun tautau. Ti champada.

Hu chagi ayudun manguaha ni numa`e ham fina` neñkanu` un` Noche Buena. Mattu ginen korason niha sin banida. Malatgaye ayudu pot mali`e pinepblen mame.

I kadu` guaha makat ha tapbla nina`en manguaha guihe na biahe piot sa` motmut i tatten kareta regalu para hame. Umatog!

I tropan taya` guaha dumalalag ham yan manguaha man-manunu fina` katne yan guihan guihe na pueñge gi tatten guma`. Grasiosu na dinaña ya motmut chaleg ginen i tropa. In` agradesi i sumen sattun na amesta gi entalu` mame. Ma`ug na bisinu maseha esta man-achagu` lugat mame.

Sentimientu
Diskuidun offisiat Marianas muna` fuetsau man-mamadesi manadan familia guine, punta pot punta. Gi halum rimulinun diskuidu sige magñu` kualidat linala` familia.

Tat mattiru ti masuñgun kontodu i taya` adelantu gi monedan familia. Ke lau haf` bidan mimiyu dispues de todu i promesan kantun sisomyan?

Para todu i diskuidu, hihot muta`yu` `an hulili`e na malañgag man-kandidatu ta`lu. Guaha `nai hu toñgtuñg iluhu kau guahu lalañga` pat siha. Dios mihu! Ti man-mamahlau! Ke lau haf` motibu na malañgag mahasñguni i publiku `nai sentaya` ni hafa na adelantu mapetsige pot interes publiku?

Sinague` Tasi
Estaba un` amiguhu ha areregla butiña gi pantalan Fishing Base para u etupag guihe na pueñge. Antes de u tulusgue` huyuñg, sige ham umachatge pot kinalamten todus `nai manadan tautau-ta manmamatmus gi fache` sisonyan chinatsaga.

Mauleg na ha tuñgu` i prohimu `nos kuantos klasen peska `nai ha preniniye familiaña mantension. Asolas, humanau pumeskan halum tanu`. Animu man-espiha para mantension familiaña. Humanau dispues umetupag gi sagua`. Sigiente dia hana`eyu` `nos kuantos medianu na mafuti para inaflituhu. Ti manmanyu`sumaibog lasneg chodan galayan para gachoñgña.

Peskan Panag
Gi `nai hoben-yu` `nai sessu huli`e mangachoñg-hu manpeskan panag. Mapega i tekin mediu karera huyuñg gi rubentason dispues manridonduye ya sige mapanag i tasi para umadulalag i guihan guatu gi tekin.

Manpaire na peskadot. Marepite `nos kuantos biahe antes de u fan halum mandeskansa gi inai. Sige pa`gu marikohe kineni` guihan ya mapega gi sahguan. Lau maliñgu este na modun peska desde ke manhanau ayu na tropan peskadot para i taihinekog na deskansu.

Esta na` mahalañg `an malolofan-yu` gi kantun tasin iya Chalan Laulau `nai sessu antes manpeskan panag. Taigue esta ayu na hinerasion.

I peskan chenchulu ni sessu binatsala ni famiia esta lokue` maliñgu. Lau lamegai na talayeru huli`e sessu na tiempu gi kantun tasi. Mauleg na offisiu gi maprebeniyen mantension familia.

Sustansian Tanu`
Dos famosu na ma`gas gi estorian i tanu` mapega papa` talin niha mangobietna ya mahatsa tatte talin kabayu ni humahala i aladu. Era, ha bira siha tatte gi tinanum niha yan fangualu`an dispues de masetbe mauleg tautau niha.

Matuñgu haf` sustansian tanu` `nai gumuagualu` siha. Ginen i tanu` `nai mana fandoku` todu mantension tautau desde tinanum yan pinegsai. Este `nai masoda` ginefsagan niha–halum fangualu`an. Sattun i dos menhalom haf` sustansian pisun tanu`.

Abarambau
Kada ratu ma-annunsia na guaha mas adelantu gi ekonomia. Mauleg! Gi mismu tiempu i mansañgan na adelantu taigue gi monedan familia. Gaige gi pahinan gaseta!

I tautau-ta matuñgu` mumidi haf` mansañgan kontra haf` diberas gaige gi monedan familia. Pues lastima i manadan anunsiu ni ti mafattu papa` gi familia siha guine.

Huñgan, namagof `an enfin guaha adelantu gi rinikohen aduana sino tax. Lau estake mattu ennau na adelantu gi monedan familia, taya` baliña manadan anunsiu ni gueku!

Gi primet lugat pot diskuidun miyu na megai pinadesi na tiempu. Chatmiyu hahatsa esperansan i tautau `an ti siña in` asegura na i benefisiun adelantu magahet na gaige gi esta giya siha. Puru che`chu`fabulas de chispas!

Dispues, tomtum esta i publiku gi todu mattirun dinage ginen i hegsu` imperadot I Deni`! Maseha pot primet biahe sañgan i minagahet na sumen chatsaga i tiempu mina` in` letki ayudu para i publiku! Haf` mohon?

Chemchum
Estaba un` chomchum paluma gi troñku gi menan guma`. Gi primet biahe `nai hu rikonose estaba kuattru na chada` nosa`. Dispues, man-e`esalau famaguon paluma, man-mapulakes.

Sigiente semana ni unu gaige. Mangupu ya madiñgu i chemchum. Kulan famaguonta. Gigon manlistu, manhanau lokue` ginen i chemchum. Mafattu gi hinassota na puede todu felis hinanau niha. Mangupu libre!