Foggun hayu antes

Gi fina` lanchun amiguhu, sige asu i feggun hayu `nai munana` loglug takurin kafe. Te`ug gi halom mañglu` ayu na mañge` pau kafe gi taftaf oga`an. Hana` hahassu-yu` ni hagas kusina gi señgsoñg iya Chalan Kanoa.

Ayu na foggun `nai man-eyag hit man-na`lagu sentadan familia. Tai talañga ayu na foggun. Hagu ni kusuneru un` suhun `sino chagua i guafe pot no u dogñgus ninalagumu. `An esta hau paire muna`apan hinegsa`, siempre un` gana sin seremonias galun kusunerun familia. Gi iya hame antes, sinigunduye i sena ni lisayu antes de estudiu yan deskansu.

Sentadan familia, piot i fina` sena, rumikohe yan muna` daña todu membro gi un` lamasa. Ala kuenta, sagradu na dinaña ni ma-echa bendision ni nanan guma`. Ginen este na dinaña` `nai ha repasa i dos amku` todu finapos kada unu guihe na ha`ane.

I pisun finapos kada patgon gaige gi finana`guen dos saina. Malulog hau bittun respetu, yine`ase`, inasi`i`, responsablidat yan inadahen echu tautau. Este siha na finana`gue pumega tunas yan fitme na sensia giya hita. Pas i komunida diariamente.

Pot megai pumadese hinanau i administrasion Navy `nai tumaya` cho`chu` na todus bimira siha tatte gi gualu` yan peskan tasi. Megai asoda`hu entalu` halom tanu` yan kanton unai. Parehu inaligau mantension familia. Este na ekspirensia mina` in` komprende haf` linala` popble.

I didog na chinatsaga-ta pa`gu guiya este i tumunog biradan siglu `nai enteru elmundu pumadedese poduñg ekonomia. Siempre u na`lu tatte lau mampos muñeru na biahe. Lau namagof minesñgon natibu gi halom todu mattiru. Dinaña` familia sumustetene hit gi todu chinatsaga-ta esta pa`gu.

Maseha makat finapos todu gi feggun hayu guiya ayu na satgen kusina i fitme na pisun tutuhon-ta. Lokue`, gi halom todu mattirun tinilaika ti mañeha hit ginen fitme na kinimite para ta sustene kutturan yan tradision natibu. Gaige este na kinimite gi espiritun tautau-ta siha. Sumen namagof na sentimientu.

Sensian Kilisyanu
Kontentuyu` sa` huli`e` na esta pa`gu gagaige ha` ayu na sensian kilisyanu gi mañan tautau-ta siha. Memetgot ha` trabiha sensian ina`ayuda gi ayu na tautau-ta i numesessita ayudu.

Para mattirun i tiempu, man-geftau tautau-ta man-manlagnos fina` ayudu para i mañeluta giya Yap yan Chuuk ni man-hinigua` dañosu na pagyu guine gi alacha.

Haf` na tirun Pagyun Jean gi 1968 `nai ha prensa enteru Saipan. Homhum i tanu`, todu man-hinalulula pumega tatte maseha temporariu na fina liheñg familia. Mauleg ayuduña i militat guihe na ira deste temporariu na yenereta` esta kusina gi todu eskuela `nai mana` guaha amotsan oga`an yan talo`ane kontodu sena.

Ayu na pagyu `nai huli`e` klaru fuetsan mañglu`. Todu buttu ni hasoda` mona ha chalapon naneñg kulan `an yute` papet gi halom mañglu`. Adumididi` sige ta ta`lun umaregla ha`anita estake manachu hit kabales otdinariamiente.

Huli`e` todu este siha na tanu` kumu empleau Congress of Micronesia. Hasan man-dinanche iran pagyu ayu buente na ti mana` presisu fanliheñf padet. Megai lokue` man-tagpapa` na isla ya ensegidas de mattiempu man-tinampe tinanom niha sune ni hanom tasi. Ta disesha na felis todu animon niha umaregla tatte destrosiun i pagyu.

Sensian Hinimidde
Muñga man-hinalañg gi halom este siha na chinatsaga. Dalai ya ti u doku` maseha dikiki` na na`magof na mensahe para i linahyan. Siempre u fattu tatte!

Seguruyu` na man-e`ensinahyau ma-estudiaye hafa masusede, masusesede yan para umasusede gi satbasion sige ha` mafondu na galaide` monedan familia.

Pa`gu `an mafondu pues kahlañg hau gi dodole` paluma puede pine`lu hau gi fina` hogsu`. Hana`e` hit tiempu umaberigua haf` na hita mismu fumondu galaide`ta.

Siempre u suha este i mattirun siglu ya u tutuhon bumirague` tatte gi otdinariu na tiempo ha`anita. Ti hita ha` man-mamadedese na enteru elmundu. Pinasensia yan ginagau ayudu gi Nanalibreta solu konsueluta mientras tantos.

Diberas kontodu hagas tinanom dagu in` guadog guine gi alacha. Esta gamla` lau in` usune kumatdu yan to`lañg guaka. Gi tiempon eskases todu bali dihemunos ke gamla` pat dage`.

•••

Umasoda`yu` yan un` prohimu ni dumeklara na kabilosugue`, tomtum, malate yan menhalom (gi finu` Eñglis “intellectual”). Hu fatkiluye pot finu` kabron yan banida. Ayu ha` guinahaña i settifikun Marianas High School yan menos de mediu manehante na eskalera gi offisioña.

Lau ha popo`lu na menhalom yan afamaugue` gi enteru Marianas. Pot dios ma`ase` nu hagu ya cha`mu chalelegua` mas ke esta un` na`yanyu`. Finu` man-amku` nañga mohon ya ula`la` i matai kairu` ya guiya un` tinina. Hinimidde! Si Iku.