Fitme pisun natibu

I natibu kuattru na nasion humatme lau ni unu felis gi para u funas yan tulaika petmanente kutturan yan tradision Chamorro.

Tat ti umafuetsas tinilaika `nai machage mata`lun umestablese i hagas establisau na linala` natibu.

Namanman i ti makomprende na ti siña un` tulaika i natibu gi kuttura yan tradisioña sa` patte petmanente giya guiya desde ke mafañagu. Gaige gi haga` yan anten natibu mina` ti tulaikayun. Poresu na ni un` nasion felis gi otdin siha ni man-malagnos.

Kada ratu mana` fañgahat i man-guelota kada man-masablasus man-tailaye siha na otdin. Halum ñañgun na kinalamten niha mina` ti maliñgu haf` sustansian kuttura yan tradision natibu.

Unu na inempeñan Españot ni sumaga kumu kuttura-ta i relihion katoliku. Estague` pisun tinituhun ineyag asuntun justisia.

Hu konsidera insuttu todu i animanasu ni manma-impeña kontodu mata`lun ma-aregla i hagas establisau na modun linala` natibu. Mauleg sa` tai atmas i natibu ni siña hana` setbi gi estrakadan madefendin tautau-ta.

Guinaiyan Nana
Gi fina konbetsasion yan un` sumen respetau na bihan mame ha estoriaye-yu` pot finapos familiaña antes de geran dos.

Entalu` bateha, foggun, kusina, gualu` yan tasi `nai sessu mapoñga i amku`. Ha esplikaye-yu` pot malansen chenchulu, lumulai, peskan panag, tekin yan talaya. I cheluña lahe sessu kumatokcha`.

Ha esplika lokue` pot magugan mai`es, matala`, ma-eskome, yan maguleg mitate para titiyas. Kanaha` todu finatinas natibu ha tuñgu` kontodu mañge` na motsiyas manog.

Sige mona, mattu ham gi namase` na estau yan linala` poble ni hali`e desde pinatgoña. Sin ditension ha sañgan na guiya unu matrata kumu “arastrau” pot poble.

“Mamoble ham ya solu guinahan mame i taya` mame”, ha sañgan gi hilu` sentimentun pinite. “Lau ni unu inna` chatsaga sa in` sakenguan pinegsai, tinanum sino kosas niha”.

Mientras uma`adiñgan sige hu akompara finapos mame gi parehu na eskalera. Taya` difirensia ya parehu pinadesi lamayot patte. Esta kulan nina` mesgu` lagu mataña i amku`.

“I peble mina` namase` sa` tai guinaha yan tai galun kumu afamau na familia mina` mañgetu silensiu. Lau ni unu sumeha gi areglau yan dignu na lina`la` familia”.

Magahet na dibota ayu na bihan mame. Sessu hu bisita antes piot `nai sumen taya` na`mame. Ha plantaye-yu` linemug lemai yan tininun guihan para bai sepin ñaihon-yu.

Kulan ha bisitayu` gi guinifihu gi suabe na finattun espirituña ha rikononose lahiña Iku. Guiya fumanu`e-yu` mañge` na guinaiyan nana. Suabe yan kariñosa na amku` ni fahagot umadiñgan.

I Tanu` Redondu: Este i para tana` mamahlau un` tautau pot estauña dididi` ti sen kilisyanu este na heñiu.

Huli`e este na heñiu mahasñgun gi un` palao`an buente pot muchacha. Mamahlauña-yu` sa` hu komprende na ti kombeni matrataña. Hu chage lokue` ayu na aminasu pot mantaya` mame gu un` sumen poble na guma.

Adumididi` sige hu asimula kau man-malefa na tautau i ma-mattrarata. Tinagu` i Saina para tatrata mauleg i prohimuta, ahe` ti tinago`hu!

Finu` un` biha, “Redondu i tanu` `nai todu kumilulog huyuñg siempre u birague` tatte”. Mauleg in` asimula lokue` este na finu` man-amku` gi kareran miyu.

Idat Rusketi: Humanau-yu` para bai fañule` amot gi hospitat. Hu soda` halum un` hagas fuetsudu na amiguhu. Sige chumichi` ni putin chenot dinalag. Hu ayu`us ya sige ham umachatge.

Esta tutuhu` lago`ña sa` sige machu`ot i dinalag ni sinparat na chaleg. Hu hasñgun pot para bai`na` fangagau pas. Ha dulalag-yu` dispues. Lau diberas na chaleg ni hachage amanu` i siña fumuñut. Hu sañgane na gaige ham esta gi idat chenot rusketi `nai megaiña tatte ke mona.

Da Eñglis: Gi tiempun Navy, mattu un` inspektan homestead para u atan i lugat. Estaba i nana na hana` pinañañales i neni. Ilegña i Amerikanu na inspekta, “Nice baby!”

Umesalau hulu` i palao`an ha agañg i asaguaña, “Halulaye mage sa` hasasañgan si pindehu chinigethu!”

A`saina, pot si baby ni uma`achule` pronunsiasioña yan materiat palao`an gi finu` Chamorro. Mauleg sa` tiha chage i muna fan trabut ham tat palabra kumu “shriek”. Hmmm! Tafan a`dispensa sa` guaha `nai finagcha`e umaya pronunsiasion!

Haf` Mas Puti? Dibuenamenti ha faisen-yu` un` amiguhu haf` mas puti gi hinanau tautau? Kase i mas makat i madiskrimina ni mismu tautau-mu sino familia-mu.

Esta e`eku na tiñgtiñg gi chagu`! Puti mayogua gi halum mala`et na sadog diskriminasion ginen halum. Man-paladañg ham todu nu este na tinailaye lau i bendision i Saina rumeskata ham diariu.

Kañon: Un` estoria pot dos umasagua ni duru malagu gi halum sakati `nai matutuhun mapaki halum Saipan balan kañon ginen batkun Americanu ni rumedonduye Saipan.

Ume`ensinahyau pot para u fan atok gi halum bokuñgo`. Lau dispues de tres biahe ni hinegse lahe na asagua tumalag hilu` ya ilegña, “Hafa, esta para puru ha` `otsi taya` para falagu?” De dios!