Finatton Linala’ Miserable

Sige teti Primet Agua de Abrit gi mapos na semana. Hu lippan ñaihon chinatsagaghu ’nai manguaife i freskon mañglu’. Lau ti apmam pumara ya numalu tatte i maipe taiguihe antes de kuaresma. Sumen na’ fatigau.

Mampos didog na chinatsaga tafafana ayu buente na todu maipe yan diskalintau kinalamten i linahyan siha gi enteru atkipelagon iya Marianas.

Lau i mamamaila’ na kondision miserable lamita patte isau i publiku sa’ mampos konsentidot gi maseden mabotan parientela para che’chu areglon otdin publiku. Pues mauleg ta pañot hafa i mamamaila’ sa’ mañasaunau hit guine na dibina.

Yangin mampos chatsaga kinalamten tautau giya Saipan, kuandu menos i man-gaige Tinian yan Luta ni fuetsau debi u fan man-apase mas guaguan na presiun nesessidat familia. Mas ha fuñut i silensiu na patte gi hinasoghu. Makat hu aksepta lau estague’ finatton ekun napu.

Mampos man-diskuidau i man-ma-elihe gi che’chu’ linahyan. I man-apalo’pu’ siha na diskuidu gaige esta gi sagua’ na kakaghalom. Tat ti umapatte dididi’ gi paketen chinatsaga. Hakot ya un’ dispacha sa’ dudayu’ kau malago hau mana’ hassu nu i diskuidun representante ni hagas un’ pega gi lehislatura yan administrasion para che’chu’ linahyan.

Klaru ginen trompison diskuidu na trabiha chagu’ i hagas ta diseha para ta gobietnan maisa hit. Buente estake ha fondugue’ este na chinatsaga gi pisun familiata ’nai ta repara na lamayot patte hita umesague gi hechuran haye ta pepega kumu representanteta parehu ha’ gi administrasion yan lehislatura. Tatnai sisida para ta fafana’ doble diskuidu pagu.

Hu diseseha na u guaha mas antau na inebaluan haye magahet kapas yan preparau para u petsige edukau yan kabales na konsiderasion adelantun linahyan. Mampos gueku i “biba” ya ti nahoñg para fotmat na che’chu’ publiku.

***

Mafatañgaye Antau Na Abisu

Dies años malofan, ma-abisa i kabesanten man-retirau (board) na u gef atan haye para u ayeg kumu konseheron man-inbestan fondun i programa.

Ni unu humuñgog ayu na abisu na esta ensegidas ta kone’ tatte. Dispues, ta dispensa ayu siha na kompania kontempu siakassu na guaha sinida’ta lache bidan niha.

Mampos man-doli hit gi hafa sessu asuntota. Ti man-listu hit umekuñgog satton na abisu sa’ sessu tafa’ tatuñgu’ i tita tuñgu’. Kulan hit i tres na man-bachet famaguon cha’ka gi halom kusina. Dehemunos kau hafa ta sufa’ kumu man-sige hit mona man-epineduñg ’an soblan lamasan chumochu.

Gaige na kumeke matmos i fondu gi halom tasin diskuidu ni kinenduse ni man-sabiun i Hegsu’ i Deni. De dios na che’chu’ atrebisau i masusede.

Debi Marianas u ketuñgu sumañgan dibuenamente haf’ tiha tuñgu’ pot no u aminsa, sin presisu, i lina’la’ publiku pot ha apotsu i asuntu. Estague’ masusede i programan man-retirau ’nai hita mismu muna’ lamen i programa. Pot fabot sa’ linala’ i man-retirau gaige esta gi puntan kantit.

*****

Otru siha asuntota

’Nai esta i batku karera de para u mafondun, magahet na ayu ha’ siña un’ sañgan i “chatmiyu fan luluhan?” Haf’ na ti siña un’ soyu’ i marineru na umayute i boti siha ya umatutuohon matransferin pasaheru? ’An malagu’ hau matmos, hagu la’mon lau pot fabot chamu kekehala’ i pumalu papa’ gi halom fache’ kuchinada.

****

Kada sakan na un’ sapet linala’ i publiku, faktu kabales na tres años tatte ’nai un’ luñu’ ha’anen niha. Kuantu sakan esta deste ke man-mafondu hit gi halom tasin miserable? Kau magahet na kuerun kaiman lasas niha i man-gaige gi hegsu’ i Deni?

****

Giya Puntan Muchot, chumiliguagua’-yu’ as bihuhu ’nai sige ha dagau talayan tiau. Kada ha chuda’ ginen i talaya i kinine’ña siha, hu hafut gi halom unai ya sige hu hopyat para bai’ disgonaf. Dispues hu lie’ gi lachagu’ gi sanlichan man-susulu’ guihan dikiki’ lau i trahen niha mampos antigosu.

Hu sañgañgane si biuhu dispues haf’ linie’hu. Chumaleg ya ilegña na i man-mofo’na lokue guaha nesessidat niha ayu mina’ man-estaba guihe. Ti hu komprende lau huñgan magahet na i espiritun mañainata gaige ha’ gi oriyata. Buente ayugue’ na finanu’en niha i para bai’ tuñgu’ na i peskan tasi hagas patte gi tradision natibu deste tiempun antigu.

Lamegai siha hu fagcha’e na eksperiensia yan espirtun man-mofo’na. Lau megaiña besis lokue’ ’nai hu pañot ales. Hu aksepta hafa gaige gi oriyahu. Yangin enfin siha i mañainata, pues sin ditension hu faisen dispensasion yan bendision niha lokue’ gi mismu tiempu. Hu tuñgu’ na man-gaige gi fihonhu ya siha mina’ motmutyu’ proteksion maseha manuyu’ guatu guine siha na islas.

****

Un’ pitbetsu sige ha butleha un’ bachet na amku’. Sinañgane gi hilu’ pinasensia, “I bendisionhu u gaige giya hagu ihu pot no un’ lalacha’ gi tailayen heñumu”. Buenu!