Disision pot direchu

I kotten federat ha disidi na i kehante as John Davis ti siña machoma` dirichoña man-bota pat madiskrimina gi mapega na asuntu gi balotu para disposision publiku.

Ayu na disision pot direchon man-bota tat kumu Attikulu Dose. I jues ha usa haf` gaige gi konstitusion iya America pot direchon sudadanu.

Buenu! Ha atisa este kuestion ginen man-natibu: Hafa na para u saunau man-bota gi asuntun tanu` lau ti siña dumueñon tanu` guine? Yangin pot parehu direchu, hafa na America ha sedi Indian gumu`ot tanu` niha `nai mañega otru rasan tautau gumaitanu`?

Yangin pot direchon sudadanu, haf` na entut na modun representasion guaha gi Kongresson iya America lau todu man-parehu sudadanu? Haf` na ti masede tautau ni mangaige Puerto Rico, American Samoa, Virgin Islands, Guam yan Marianas mañaunau gi botasion presidenten America lau parehu sudadanu?

Ti hana` matmanyu` finaisen natibu gi asuntu siha pot mana` ke`yau i lai ya ti parehu direchon sudadanu. I man-ginen lagu parehu direchu. I natibu guine sumen fatsu. Yangin ti balansia i para todu, pues naturatmente na u guaha disniskontentu gi halom natibu.

Ha pañgon i tanu` ayu na disision. Seguruyu` na siempre maga`an i natibu ya u dimanda direchoña gi solu guiya siña dumispone.

Tanu` gi matan natibu

Para i tautau hiyuñg, i tanu` matrata kumu kosas ni libianu mabenden ñaihon piot ya para u muebague` para otru lugat.

Gi natibu, i tanu` `nai gaige gima`ña (gima` familia) `nai dumañkulu estake echu tautau. Kontodu gualu` familia ni sessu mafatoigue `nai ha soda` haf` sustansian tradision tanu`. Likidu lugat kumu plaset mantension yan linala` familia. Este na tanu` kulan nanan familia ni gumuaddia yan prumutohe finapos todu.

Ni achog u fan hanau i mañaina-ta, mapega gi santatte tanu` para usun famaguon niha. Tatnai huhuñgog masañgan fatsu na intension para umabende i solu ma`ug na kosas familia. Todu i tiempu sumaga kumu propiadat familia para i manatatte. Estague` likidu na tradision natibu gi presetbasion yan proteksion tanu` guine.

Guaha chumansa asuntun ekonomia. Lau `nai bo`bu` salape guine gi mediu ochenta siha na sakan gaige ha` i Attikulu Dose. Ti man-estotba. Bula na tanu` praibet yan publiku man-ma-atkila. Pues anog na ti materiat atgumentun ekonomia.

Mauleg lokue` ta hahassu disposision tanu` familia primera pot i manatatte. Pot ihemplo, yangin para unna` ma-atkila 55 años na tiempu tano`mu, pues man-amku` i famaguon antes de u siña kumusecha usun tanu` familia. Dispues, mauleg in` atan ya u guaha rinikonosen kontrata kada siñko años.

Yangin mauleg kinalamten bisnes i man-atkikila, pues umahatsa dididi` i atkilon. Este na modun kontrata nina`e lokue` i manatatte pudet bumenefisia atkilon tanu` niha. Debi u guaha este na patte gi kontratan atkilon.

Man-malañgu

Mauleg na numeron tautau-ta mangaige dos hospitat giya Filipinas pot seriosu siha na probleman hinemlu`. Deste asunutn korason, todu klasen kanset, yan didog na chetnot siha finañagun daibites umaminasa seriosamente i mana` fan hanau. Malañgu mampos i natibu.

I kuestion: Manu `nai gaige haleña probleman korason gi natibu? Hafa pumupunu` reñihion tautau-ta? Haf` na ensegidas megai man-ninanaye` todu klasen kanset? Kanset pachot lau ti chichipa ‘sino tai bisiu usun mama` tat kumu pugua, pupulu, afog yan amaska.

Debi i manehanten hospitat u atan ensegidas este siha na chetnot ya una`guaha estudiu para ta ketuñgu` hafa fumañañagu este siha na chetnot gi tautau-ta.

Gigon klaru establisau i pisu `sino` hale` problema, debi u tinatiye programan publiku para u infotma todu hafa presisu na uma-adahe piot gi famaguon.

Haf` na guaha na tautau-ta ensegidas pininu` ni probleman korason? Guaha chumansa pot katnen yan mantikan ga`ga` tat kumu guaka. Lau este na neñkanu` tiha fofotma mantika ni madipotsita gi halom gugat korason. Lamayot patte gaige gi asukat regulat yan asukat hinegsa`, pan yan pastre, agu`on haya yan gimen manmames siha.

Yangin hasan mañochu katnen guaka pot guaguan, ke ya hafa na megai man-tinatatme chetnot korason? Hu suspepecha na gaige lamayot problemata gi todu klasen asukat yan inipus na usun asiga. I unu para mama` mantika, i otru fotte gi muna` te`ug haga`.

Todu pot todu, taya` siña umatan hinemlo` kada unu ke hagu mismu.

***

Esta achacha tufai-yu` yan un` hagas mauleg na amiguhu. Ti sisiña esta hu hatsa akague na kanaihu. Pa`gu guiya, chadegña na megai i edot mamokat. Hu sañgane na una` tisugue` sa` man-bonitan infetmera mangaige gi oriya. Ilegña, “Po`lu ya maseha u fan mama` mediku lau sottayu` gi hinanauhu.” Ai, puti magahet chetnot dinalag. Kontodu gupun lalu` cha`otña.